ທີ່ ຫວຽດນາມ: ເມື່ອປະມານ 5 ປີຢ້ອນຫຼັງ ມີຂ່າວໜຶ່ງທີ່ໜ້າສົນໃຈກ່ຽວກັບກອງປະຊຸມຮ່ວມລະຫວ່າງ ກະຊວງຍຸຕິທຳ ແລະ ຫ້ອງການຍຸຕິທຳທ້ອງຖິ່ນຂອງຫວຽດນາມ ຢູ່ບາເຣຍວຸ່ງເຕົ່າ ກອງປະຊຸມນີ້ ໄດ້ລົງເລິກກ່ຽວກັບມາດຕະການຄຸ້ມຄອງການແຕ່ງດອງລະຫວ່າງຄົນຫວຽດນາມ ໂດຍສະເພາະແມ່ນແມ່ຍິງຫວຽດນາມກັບຊາຍຕ່າງປະເທດ ກອງປະຊຸມໄດ້ຍົກໃຫ້ເຫັນສະຖິຕິ ການແຕ່ງດອງລະຫວ່າງຄົນຫວຽດນາມກັບຊາວຕ່າງປະເທດ ແຕ່ປີ 2011-2014 ວ່າມີຫຼາຍກວ່າ 50.000 ຄົນ ໃນນັ້ນ 80% ເປັນເພດຍິງທີ່ແຕ່ງດອງກັບຄົນຫວຽດນາມຢູ່ຕ່າງປະເທດ ກໍຄື ຜູ້ຊາຍຕ່າງປະເທດຈາກເກາະໄຕ້ຫວັນ ແລະ ສ ເກົາຫຼີ ເປັນຕົ້ນຕໍ ກອງປະຊຸມໄດ້ລະດົມຄວາມຄິດກ່ຽວກັບບັນຫາຕໍ່ໄປນີ້ຄື: ການປະຕິບັດມາດຕະການທາງກົດໝາຍ ກ່ຽວກັບການແຕ່ງດອງລະຫວ່າງຄົນຫວຽດນາມກັບຊາວຕ່າງປະເທດ ວິທີການເພື່ອໃຫ້ຄຳປຶກສາຫາລືແກ່ບັນດາເຈົ້າສາວຄົນຫວຽດນາມ ທີ່ຈະເຂົ້າສູ່ປະຕູວິວາກັບຊາຍຕ່າງປະເທດ ບັນຫາການຍົກສູງຄຸນນະພາບຂອງພະນັກງານທີ່ຮັບຜິດຊອບແກ້ໄຂຄະດີ ກ່ຽວກັບບັນຫາການແຕ່ງດອງກັບຄົນຕ່າງປະເທດ ແລະ ເລື່ອງຂັ້ນຕອນການແລ່ນເອກະສານ ເພື່ອການແຕ່ງດອງດັ່ງກ່າວ ຜູ້ແທນກອງປະຊຸມສ່ວນໃຫຍ່ເນັ້ນເລື່ອງການປົກປ້ອງແມ່ຍິງ ບໍ່ໃຫ້ຕົກເປັນເຫຍື່ອຂອງການຄ້າມະນຸດ ຫຼື ການໃຊ້ຄວາມຮຸນແຮງ ຈາກການແຕ່ງດອງກັບຜູ້ຊາຍຕ່າງປະເທດ ເຄີຍເກີດຂຶ້ນໃນຫຼາຍໆກໍລະນີ ດັ່ງນັ້ນ ຈິ່ງມີຂໍ້ສະເໜີໃຫ້ມີການແກ້ໄຂດ້ວຍການຍົກສູງລະດັບການສຶກສາຂອງແມ່ຍິງ ສ້າງຄວາມຮັບຮູ້ທີ່ຖືກຕ້ອງກ່ຽວກັບການແຕ່ງດອງກັບຊາວຕ່າງປະເທດ ສ້າງວຽກເຮັດງານທຳທີ່ຖາວອນໃຫ້ແມ່ຍິງໃນເຂດຊົນນະບົດຫ່າງໄກສອກຫຼີກ ມີມາດຕະການຮອງຮັບເພື່ອຊ່ວຍເຫຼືອບັນດາແມ່ຍິງ ທີ່ຕົກເປັນເຫຍື່ອການແຕ່ງດອງແບບຫຼອກລວງ ແລະ ກ່ອນອື່ນໝົດຕ້ອງມີມາດຕະການດ້ານກົດໝາຍສະເພາະ ເພື່ອປ້ອງກັນລ່ວງໜ້າບໍ່ໃຫ້ມີເຫດການທີ່ບໍ່ເພິ່ງປາຖະໜາ ຈາກການແຕ່ງດອງກັບຄົນຕ່າງປະເທດ.
ທີ່ ສ ເກົາຫຼີ: ຂ່າວໜັງສືພິມວຽງຈັນທາມ ສະບັບວັນທີ 25 ພະຈິກ 2019 ໃຫ້ຮູ້ວ່າ ທາງການປະເທດ ສ ເກົາຫຼີ ໄດ້ລິເລີ່ມແຜນປົກປ້ອງສິດຜົນປະໂຫຍດຂອງແມ່ຍິງ ຕ່າງປະເທດທີ່ສ້າງຄອບຄົວກັບຜູ້ຊາຍ ສ ເກົາຫຼີ ບໍ່ໃຫ້ຕົກເປັນເຫຍື່ອຄວາມຮຸນແຮງພາຍໃນຄອບຄົວ ແຜນດັ່ງກ່າວ ສະເໜີອອກໂດຍກະຊວງ ບົດບາດຍິງຊາຍ ຄວາມສະເໝີພາບ ແລະ ຄອບຄົວຂອງ ເກົາຫຼີ ຊຶ່ງກວມເອົາການໃຫ້ບໍລິການສາຍດ່ວນເປັນຫຼາຍພາສາ ປະຈຳໜ່ວຍງານຕຳຫຼວດ ເພື່ອຊ່ວຍເຫຼືອບັນດາແມ່ຍິງຕ່າງປະເທດ ທີ່ເປັນເມຍຂອງຜູ້ຊາຍເກົາຫຼີ ໃນເວລາຕົກຢູ່ສະພາບຄັບຂັນ ນອກຈາກນັ້ນ ລັດຖະບານ ສ ເກົາຫຼີ ຍັງໄດ້ກຳນົດຫ້າມຜູ້ຊາຍເກົາຫຼີ ທີ່ມີປະຫວັດກໍ່ອາຊະຍາກຳແຕ່ງດອງກັບແມ່ຍິງຕ່າງປະເທດ ແລ້ວນຳເຂົ້າໄປ ສ ເກົາຫຼີ ເດັດຂາດ ລັດຖະບານມີໂຄງການສົ່ງເສີມການສຶກສາອົບຮົມ ສຳລັບຄອບຄົວທີ່ມີຄູ່ຄອງເປັນຊາວຕ່າງປະເທດ ເຫດຜົນທີ່ທາງການຂອງ ສ ເກົາຫຼີ ຕ້ອງໄດ້ແກ້ໄຂບັນຫານີ້ຢ່າງຮີບດ່ວນ ກໍເພາະວ່າ ມີຫຼາຍກໍລະນີ ທີ່ຜູ້ຊາຍ ເກົາຫຼີ ທຳຮ້າຍຮ່າງກາຍຂອງເມຍ ຊຶ່ງເປັນຊາວຕ່າງປະເທດ ເຊັ່ນ ກໍລະນີຊາຍເກົາຫຼີ ທຸບຕີເມຍທີ່ເປັນຄົນຫວຽດນາມຕໍ່ໜ້າຜູ້ເປັນລູກ ໃນເດືອນກໍລະກົດ ປີ 2019 ແລະ ກໍລະນີຜູ້ເປັນຜົວ (ຄົນເກົາຫຼີ) ໃຊ້ມີດແທງເມຍຂອງຕົນທີ່ເປັນຊາວຫວຽດນາມຈົນເສຍຊີວິດ ໃນວັນທີ 23 ເດືອນພະຈິກ 2019.