ໃນຍຸກທີ່ການກ້າວກະໂດດທາງວິທະຍາສາດເກີດຂຶ້ນໄດ້ວ່ອງໄວນີ້ ນັກວິໄຈທີມໜຶ່ງປະສົບຄວາມສຳເລັດໃນການພັດທະນາເຕັກໂນໂລຊີ ພ້ອມອຸປະກອນທີ່ສາມາດອ່ານຄື້ນສະໝອງ ເພື່ອສັ່ງເຄື່ອງມືຕ່າງໆໃຫ້ເຮັດວຽກໄດ້.
ນັກວິໄຈຈາກບໍລິສັດທີ່ໄດ້ຮັບການສະໜັບສະໜູນຈາກສະຖາບັນ Harvard Innovation Lab ຄືທີມທີ່ສາມາດຄິດຄົ້ນ ແລະ ປະດິດອຸປະກອນທີ່ເຊື່ອມຕໍ່ຄື້ນສະໝອງຂອງມະນຸດ ເຂົ້າກັບເຄື່ອງມືເອເລັກໂຕຣນິກໄດ້ກ່ອນໃຜ.
ຕົວຢ່າງສິ່ງປະດິດທີ່ທີມນຳສະເໜີອອກມາມີ ເຊັ່ນຂອງຫຼິ້ນລົດແຂ່ງທີ່ຜູ້ຫຼິ້ນບໍ່ຕ້ອງໃຊ້ມືຈັບຄັນບັງຄັບ ຫຼືອຸປະກອນອື່ນໃດ ນອກຈາກສວມທີ່ຮັດຫົວ ຊຶ່ງຜະລິດໂດຍບໍລິສັດ BrainCo ແລະ ມີຕົວເຊັນເຊີ ມີສ່ວນປະກອບຂອງວັດສະດຸໄຮໂດຣເຈນ ຫຼືໂພລິເມີຊະນິດໜຶ່ງ ເຮັດໃຫ້ສາມາດອ່ານຄື້ນໄຟຟ້າສະໝອງຂອງຜູ້ສວມໃສ່ໄດ້.
ທ່ານ ແມັກ ນິວລອນ ປະທານ ບໍລິສັດ BrainCo ກ່າວວ່າ ອຸປະກອນນີ້ເຮັດໜ້າທີ່ປະເມີນຄວາມມີສະມາທິຂອງຜູ້ຫຼິ້ນ ເພື່ອຊ່ວຍໃຫ້ຄົນໆນັ້ນສາມາດຮຽນຮູ້ການຕັ້ງສະມາທິ ຫຼືຜ່ອນຄາຍ.
ທ່ານ ນິວລອນ ບອກວ່າ ເມື່ອຜູ້ໃຊ້ງານອຸປະກອນນີ້ມີສະມາທິ ຄື້ນສະໝອງກໍຈະມີຮູບແບບ ແບບໜຶ່ງ ແລະ ຍິ່ງມີຄວາມສະຫງົບນຶ້ງ ແລະ ຜ່ອນຄາຍຄື້ນສະໝອງກໍຈະປ່ຽນຮູບແບບໄປເປັນອີກແບບ ທີມງານຈຶ່ງຄຳນວນຄວາມແຕກຕ່າງຂອງຮູບແບບຄື້ນສະໝອງດັ່ງກ່າວ ແລ້ວແປງເປັນຄ່າຕົວເລກຕັ້ງແຕ່ 0 ເຖິງ 100 ຊຶ່ງໝາຍເຖິງຄວາມຜ່ອນຄາຍເຕັມທີ່ ໄປຈົນເຖິງການມີສະມາທິຂັ້ນສູງສຸດ ຊຶ່ງເປັນຄ່າທີ່ຊ່ວຍສົ່ງພະລັງຂັບເຄື່ອນລົດແຂ່ງໃຫ້ເຂົ້າເສັ້ນໄຊເປັນທີ 1 ໄດ້ສຳເລັດ.
ນອກຈາກນີ້ ນັກວິໄຈຍັງອອກແບບອຸປະກອນຈັບ ແລະ ອ່ານຄ່າຄື້ນສັນຍານໄຟຟ້າຈາກກ້າມຊີ້ນ ຊຶ່ງຢູ່ໃນຮູບແບບຂອງອຸປະກອນແຂນ/ຂາທຽມ ທີ່ມີສ່ວນປະກອບເປັນໜ່ວຍປະມວນຜົນ ແລະ ຕົວເຊັນເຊີ.
ລາຍງານຂ່າວບອກວ່າ ການທົດສອບອຸປະກອນແຂນທຽມກັບຜູ້ຮ່ວມທົດລອງ ຊຶ່ງເປັນຊາຍຊາວຈີນ ທີ່ປະສົບອຸບັດເຫດແຂນຂາດ ເຮັດໃຫ້ຜູ້ກ່ຽວສາມາດຈັບປາກກາຂຽນຕົວໜັງສືຈີນໄດ້ເໝືອນຄົນປົກກະຕິ ພຽງໃຊ້ສະໝອງບັງຄັບນິ້ວທຽມໃຫ້ເຄື່ອນເທົ່ານັ້ນ.
ທ່ານ ນິວລອນ ແຫ່ງບໍລິສັດ BrainCo ບອກວ່າ ເຕັກໂນໂລຊີລະບົບເຊື່ອມຕໍ່ສຳລັບຄອມພິວເຕີ ຫຼື Interface ທີ່ພັດທະນາອອກມາສຳເລັດນີ້ ສະແດງໃຫ້ເຫັນເຖິງທິດທາງການມີປະຕິສຳພັນກັນລະຫວ່າງມະນຸດ ແລະ ຈັກກົນທີ່ຈະເກີດຂຶ້ນຕໍ່ໄປໃນອະນາຄົດ.
ທ່ານ ນິວລອນ ບອກວ່າ ເມື່ອບໍ່ເທົ່າໃດທົດສະວັດກ່ອນ ມະນຸດເຮົາເລີ່ມຄວບຄຸມເຕັກໂນໂລຊີດ້ວຍການໃຊ້ມື ເຊັ່ນ ການໃຊ້ນິ້ວເປິດ-ປິດສະວິດໄຟ ຕໍ່ມາກໍເປັນເຕັກໂນໂລຊີສຳຜັດ ໜ້າຈໍຢ່າງກໍລະນີໂທລະສັບໄອໂຟນ ແລະ ປັດຈຸບັນ ຄົນເຮົາເລີ່ມຄຸ້ນເຄີຍກັບການໃຊ້ສຽງສັ່ງງານແລ້ວ ດັ່ງນັ້ນ ໃນອະນາຄົດຄົງບໍ່ແມ່ນເລື່ອງໜ້າແປກ ທີ່ຈະເຫັນການໃຊ້ສະໝອງສັ່ງງານເຄື່ອງຈັກ.
ໄດ້ຍິນກັນເຊັ່ນນີ້ແລ້ວ ອີກບໍ່ດົນ ເຮົາຄົງຈະເຫັນການໃຊ້ເຕັກໂນໂລຊີຮຸ່ນໃໝ່ໆ ທີ່ໃຫ້ຜູ້ບໍລິໂພກໃຊ້ພຽງຄວາມຄິດ ເພື່ອເຮັດໃຫ້ຊີວິດສະດວກສະບາຍຍິ່ງຂຶ້ນໄປອີກ.