ໃນໄລຍະຜ່ານມາ ກໍຄື ປັດຈຸບັນບັນ ດາຕົວເມືອງໃນນະຄອນຫຼວງວຽງຈັນ ໄດ້ເອົາໃຈໃສ່ໃນການຫຼຸດຜ່ອນການເກີດອຸບັດເຫດຕາມຖະໜົນຫົນທາງ ໂດຍສະເພາະໃນ 4 ຕົວເມືອງໃນເຂດເທສະບານຂອງນະຄອນຫຼວງວງຽງຈັນ ໃນນັ້ນ ກໍມີເມືອງສີສັດຕະນາກ ທີ່ຍາມໃດກໍໄດ້ເອົາໃຈໃສ່ຕໍ່ວຽກງານດັ່ງກ່າວ ເພື່ອຫຼຸດຜ່ອນການສ້າງຄວາມເສຍຫາຍແກ່ຊັບສິນສ່ວນລວມ ສ່ວນຕົວ ແລະ ຊີວິດຈາກການເກີດອຸບັດເຫດ.
ເຖິງແມ່ນວ່າທາງເຈົ້າໜ້າທີ່ຕຳຫຼວດຈະລາຈອນ ໄດ້ເອົາໃຈໃສ່ໃນການປະຕິບັດໜ້າທີ່ ເພື່ອຫຼຸດຜ່ອນບັນຫາດັ່ງກ່າວແລ້ວກໍຕາມ ແຕ່ປະຕິເສດບໍ່ໄດ້ໃນການເກີດອຸບັດເຫດໃນຂອບເຂດເມືອງ ເຊິ່ງໃນໜຶ່ງເດືອນຜ່ານມາ ກໍຍັງເກີດຂຶ້ນເຖິງ 13 ຄັ້ງດ້ວຍກັນ ສາເຫດຫຼັກຄືການບໍ່ປະຕິບັດກົດລະບຽບຈະລາຈອນ.
ຕາມຂໍ້ມູນຂອງ ແຟນເພຈ ປ້ອງກັນຄວາມສະຫງົບນະຄອນຫຼວງວງຽງຈັນ ທີ່ທ່ານ ພັຕ ບຸນຈັນ ບຸນນະສິງ ຫົວໜ້າກອງຮ້ອຍ ຕຳຫຼວດຈະລາຈອນ ປກສ ເມືອງສີສັດຕະນາກ ໃຫ້ສຳພາດໃນອາທິດຜ່ານມາເຫັນໄດ້ວ່າ: ໃນເດືອນກຸມພາຜ່ານມາ ສະພາບການສັນຈອນຢູ່ເມືອງສີສັດຕະນາກ ຍັງມີລັກສະນະສັບສົນຢູ່ບາງຈຸດ ໂດຍສະເພາະແມ່ນຖະໜົນລາວ-ໄທ ວົງວຽນໂສກປ່າຫຼວງ ເສັ້ນທາງທ່າເດື່ອເສັ້ນທາງຄູວຽງ ມີອຸບັດເຫດເກີດຂຶ້ນທັງໝົດ 13 ເລື່ອງ ມີຄົນໄດ້ຮັບບາດເຈັບເລັກໜ້ອຍ 3 ຄົນ ສົມຄວນ 10 ຄົນ ສາຫັດ 6 ຄົນ ພາຫະນະເປ່ເພເລັກນ້ອຍ 8 ຄັນ ສົມຄວນ 17 ຄັນ ມີຄະດີຕົກຄ້າງ 13 ເລື່ອງ ລວມກັນທັງໝົດເປັນ 26 ເລື່ອງ ສາມາດແກ້ໄຂໄດ້ 14 ເລື່ອງ ແລະ ກຳລັງດຳເນີນການແກ້ໄຂຢູ່ປັດຈຸບັນ 10 ເລື່ອງ ສ່ວນສາເຫດທີ່ພາໃຫ້ເກີດອຸບັດເຫດ ແມ່ນນັກຂັບຂີ່ບໍ່ປະຕິບັດກົດຈະລາຈອນຢ່າງເຂັ້ມງວດ ເປັນຕົ້ນ ຂັບຂີ່ລົດປ່ຽນທິດທາງກະທັນຫັນ ບໍ່ຮັກສາໄລຍະຫ່າງ ແລະ ຍ້ອນຜູ້ຂັບຂີ່ດື່ມສິ່ງມຶນເມົາແລ້ວຂັບຂີ່ລົດ.
ທ່ານຫົວໜ້າກອງຮ້ອຍຕຳຫຼວດຈະລາຈອນ ກ່າວຕື່ມວ່າ: ເພື່ອຫຼຸດຜ່ອນບັນຫາການເກີດອຸບັດເຫດ ແລະ ການສັນຈອນແອອັດ ພາຍໃນເມືອງສີສັດຕະນາກ ຕຳຫຼວດຈະລາຈອນ ຈະສຸມໃສ່ໂຄສະນາຕາມຈຸດຕ່າງໆເປັນຕົ້ນແມ່ນທາງ 3 ແຍກ 4 ແຍກ ຈຸດທີ່ມີຄວາມສ່ຽງພາໃຫ້ເກີດອຸບັດເຫດ ໂຄສະນາຕາມໂຮງຮຽນ ແລະ ລົງຕັ້ງດ່ານກວດກາຢູ່ບັນດາເສັ້ນທາງຕ່າງໆພາຍໃນເມືອງ ເພື່ອເຮັດໃຫ້ຜູ້ຂັບຂີ່ມີສະຕິ ຮູ້ ແລະ ເຂົ້າໃຈເຖິງກົດຈະລາຈອນໃຫ້ຫຼາຍຂຶ້ນກວ່າເກົ່າ.
ຈາກສະພາບອຸບັດເຫດທີ່ເກີດຂຶ້ນ ສາເຫດຫຼັກໆແມ່ນມາຈາກຜູ້ຂັບຂີ່ເອງນັ້ນກໍຄື ການບໍ່ປະຕິບັດກົດຈະລາຈອນ ດັ່ງນັ້ນ ການແກ້ໄຂບັນຫາອຸບັດເຫດບໍ່ຄວນປ່ອຍໃຫ້ເຈົ້າໜ້າທີ່ຕຳຫຼວດຈະລາຈອນ ເປັນເຈົ້າການໃນການປະຕິບັດຕາມໜ້າທີ່ຢູ່ຝ່າຍດຽວ ບໍ່ວ່າຈະເປັນການລົງໂຄສະນາເຜີຍແຜ່ກົດລະບຽບການສັນຈອນຕາມຈຸດຕ່າງໆ ແກ້ໄຂການສັນຈອນແອອັດຢູ່ແຕ່ລະຈຸດ ແລະ ອື່ນໆ ແຕ່ຝ່າຍຜູ້ຂັບຂີ່ເອງກໍຕ້ອງໄດ້ສັງເກດພຶດຕິກຳຕົນເອງ ການຂັບຂີ່ແມ່ນປະຕິບັດຕາມກົດຈະລາຈອນໄດ້ດີແລ້ວ ຫຼື ບໍ່ ທັງການຈອດ ການຂັບຂີ່ໄປມາ ແລະ ອື່ນໆ ແນໃສ່ເພື່ອໃຫ້ການຈະລາຈອນໃນນະຄອນຫຼວງວຽງຈັນ ມີຄວາມເປັນລະບຽບຈົບງາມ ພ້ອມທັງເຮັດໃຫ້ຈຳນວນອຸບັດເຫດຄ່ອຍໆຫຼຸດລົງ.
ໂດຍ: ເມັດຝົນ