ທ່ານ ຕຸ້ຍ ບຸນທະລາ ປະທານສະຫະພັນເທັນນິດ ນວ ແຈ້ງໃຫ້ຊາບວ່າ: ອີງໃສ່ປະຕິບັດຕາມແຈ້ງການຂອງລັດຖະບານ ແລະ ແຈ້ງການຂອງທ່ານເຈົ້າຄອງ ນວ ກ່ຽວກັບການຢຸດຊົ່ວຄາວ ໃນການເກັບຕົວເຝິກຊ້ອມນັກກີລາ ເພື່ອເຂົ້າຮ່ວມ ຊຽງຂວາງເກມ ທັງນີ້ ກໍຍ້ອນເປັນການປ້ອງກັນການຕິດເຊື້ອພະຍາດຈຸລະໂລກສາຍພັນໃໝ່ ໂຄວິດ-19 ທີ່ກຳລັງແຜ່ລະບາດຢ່າງໜັກໃນທົ່ວໂລກ ດັ່ງນັ້ນ ຈຶ່ງໄດ້ຢຸດການເຄື່ອນໄຫວເຂົ້າຮ່ວມແຂ່ງຂັນທຸກລາຍການ ທັງພາຍໃນ ແລະ ຕ່າງປະເທດ ເພື່ອເປັນການຮັກສາຄວາມປອດໄພໄວ້ກ່ອນໃຫ້ນັກກີລາ ແຕ່ພວກເຮົາຈະມາເນັ້ນການເຝິກຊ້ອມເປັນຕົ້ນຕໍ ເພື່ອຮັກສາມາດຕະຖານຄຸນນະພາບຄວາມສາມາດຂອງນັກກີລາໃຫ້ສະໝ່ຳສະເໝີ ໂດຍແມ່ນ ທ່ານ ອາລັນ ຄູເຝິກຊາວ ອົດສະຕຣາລີ ເປັນຜູ້ດູແລນຳພານັກກີລາເຝິກຊ້ອມ ຢູ່ທີ່ສະໂມສອນກີລາໄດມ້ອນ ເທັນນິດ ເຂດບ້ານປາກທ້າງ ເມືອງສີໂຄດຕະບອງ ນັບມາຮອດປັດຈຸບັນ ສາມາດປະເມີນຕີລາຄາໄດ້ສູງ ນັກ ກີລາ ຈຳນວນ 12 ຄົນ ຍິງ 6 ຄົນ ແມ່ນໄດ້ມີຄວາມພ້ອມຢ່າງເຕັມຮ້ອຍແລ້ວ ແລະ ພ້ອມທຸກສະຖານະການ ຈະເຂົ້າຮ່ວມຍາດເອົາຫຼຽນຄຳ ຊຽງຂວາງ ເກມ.
ໃນເບື້ອງຕົ້ນສະເພາະ ການແຂ່ງຂັນກີລາເທັນນິດ ຊຽງຂວາງ ເກມ 2020 ຈະມີການຊີງໄຊກັນທັງໝົດເຖິງ 7 ລາຍການ ປະກອບມີ: ປະເພດດ່ຽວຍິງ ດ່ຽວຊາຍ ທີມຄູ່ຍິງ ທີມຄູ່ຊາຍ ທີມຊຸດຍິງ ທີມຊຸດຊາຍ ແລະ ທີມຄູ່ປະສົມ ໂດຍຄາດວ່າຈະມີຫຼາຍແຂວງສົ່ງເຂົ້າຮ່ວມແຂ່ງຂັນ ສະເພາະທັບນັກກີລາເທັນນິດ ນະຄອນຫຼວງວຽງຈັນ ແມ່ນຈະສົ່ງນັກກີລາ 12 ຄົນ ຍິງ 6 ຄົນ ແລະ ເຂົ້າຮ່ວມຊີງໄຊຄົບທຸກລາຍການ ພ້ອມທັງຕັ້ງເປົ້າໄວ້ 3 ຫຼຽນຄຳ ໃນຊຽງຂວາງ ເກມ.