ພິທີມອບເງິນ 18 ລ້ານກີບ ຊຸກຍູ້ນັກກີລາເທັນນິດນະຄອນຫຼວງວຽງຈັນ (ນວ) ຈັດຂຶ້ນວັນທີ 25 ກຸມພາ 2020 ຢູ່ສະໜາມກີລາເທັນນິດ ສະຫະພັນເທັນນິດ ນວ ບ້ານປາກທ້າງ ເມືອງສີໂຄດຕະບອງ ກ່າວມອບໂດຍທ່ານ ສີຄອນ ອ່ອນສີພັນລາ ຫົວໜ້າພະແນກໄປສະນີ ໂທລະຄົມມະນາຄົມ ແລະ ການສື່ສານ ນວ ທ່ານ ສົມດີ ອິນທະວົງ ອຳນວຍການລູກຄ້າບໍລິສັດ ສະຕຣາໂທລະຄົມ ຈຳກັດ (ຢູນິເທວ) ແລະ ກ່າວຮັບໂດຍທ່ານ ຕຸ້ຍ ບຸນທະລາ ປະທານສະຫະພັນເທັນນິດ ນວ ມີຄະນະຄູເຝິກ ແລະ ນັກກີລາເຂົ້າຮ່ວມ.
ໂອກາດນີ້ ທ່ານ ຕຸ້ຍ ບຸນທະລາ ໄດ້ກ່າວສະແດງຄວາມຮູ້ບຸນຄຸນ ແລະ ຂອບໃຈເປັນຢ່າງສູງມາຍັງສອງພາກສ່ວນທີ່ໃຫ້ການຊ່ວຍເຫຼືອທີມນັກກີລາເທັນນິດ ນວ ຄັ້ງນີ້ຈະເປັນໝາກຜົນທີ່ສຳຄັນເຂົ້າໃນການເກັບຕົວເຝິກຊ້ອມ ແລະ ບຳລຸງກຳລັງໃຈທີ່ດີໃຫ້ທີມນັກກີລາ ເພື່ອກຽມເຂົ້າຮ່ວມແຂ່ງຂັນສ້າງຜົນງານຍາດເອົາຫຼຽນຄຳໃນຊຽງຂວາງເກມ ນັກກີລາເທັນນິດ ນວ ຊຸດນີ້ສາມາດຄັດເລືອກໄດ້ 12 ຄົນ ຍິງ 6 ຄົນ ໄດ້ມີການເກັບຕົວເຝິກຊ້ອມມາແຕ່ເດືອນສິງຫາ 2019 ທີ່ສະໂມສອນກີລາເທັນນິດເຈົ້າອານຸວົງ ແລະ ສະໂມສອນເທັນນິດສະຫະພັນເທັນນິດ ນວ ນອກນັ້ນ ຈຳນວນໜຶ່ງໄດ້ເກັບຕົວເຝິກຊ້ອມ ແລະ ເຄື່ອນໄຫວແຂ່ງຂັນທີ່ປະເທດໃກ້ຄຽງ ມາຮອດປັດຈຸບັນມີຄວາມພ້ອມເກືອບ 100% ພ້ອມທັງຕັ້ງເປົ້າໝາຍໄວ້ 3 ຫຼຽນຄຳ.
ສຳລັບການຊຸກຍູ້ທັບນັກກີລາເທັນນິດຄັ້ງນີ້ພະແນກໄປສະນີ ໂທລະຄົມມະນາຄົມ ແລະ ການສື່ສານ ນວ 8 ລ້ານກີບ ແລະ ຢູນິເທວ 10 ລ້ານກີບ ສ່ວນການແຂ່ງຂັນກີລາເທັນນິດຊຽງຂວາງເກມ ຈະຊີງ 7 ລາຍການປະກອບມີ: ປະເພດດ່ຽວຍິງ-ຊາຍ ທີມຄູ່ຍິງ ທີມຄູ່ຊາຍ ທີມຊຸດຍິງ ທີມຊຸດຊາຍ ແລະ ທີມປະສົມ ໂດຍຄາດວ່າຈະມີຫຼາຍແຂວງສົ່ງເຂົ້າຮ່ວມແຂ່ງຂັນ ສະເພາະທີມນັກກີລາເທັນນິດ ນວ ຈະສົ່ງເຂົ້າຮ່ວມຄົບທຸກລາຍການ.