ກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງໄຊທານີ ນະຄອນຫຼວງວຽງຈັນ (ນວ) ອັດລົງດ້ວຍຜົນສຳເລັດຢ່າງຈົບງາມ ໃນວັນທີ 12 ມິຖຸນາ 2020 ຢູ່ເມືອງດັ່ງກ່າວ ໂດຍເປັນປະທານຂອງສະຫາຍ ຄຳປະດິດ ເຂັມມານິດ ກຳມະການພັກ ນວ ເລຂາພັກເມືອງ ເຈົ້າເມືອງໄຊທານີ ມີສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເລຂາຄະນະພັກ ເຈົ້າຄອງ ນວ ພ້ອມດ້ວຍອະດີດການນຳ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມດັ່ງກ່າວ ບັນດາຜູ້ແທນສົມບູນໄດ້ພ້ອມກັນປະຕິບັດໜ້າທີ່ການເມືອງ ດ້ວຍຄວາມຮັບຜິດຊອບສູງ ແລະ ເປັນເອກະພາບຮັບຮອງເອົາບົດລາຍງານການເມືອງ ແລະ ແຜນພັດທະນາເສດຖະກິດ-ສັງຄົມຂອງຄະນະບໍລິຫານງານພັກເມືອງໄຊທານີ ຊຸດທີ VII ພ້ອມນີ້ ຍັງໄດ້ປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ ເຊິ່ງມີຜູ້ລົງສະໝັກ 31 ສະຫາຍ ເລືອກເອົາ 27 ສະຫາຍ ຍິງ 5 ສະຫາຍ ເລືອກເອົາຄະນະປະຈຳພັກ 9 ສະຫາຍ ໃນນີ້ ໄດ້ເລືອກເອົາສະຫາຍ ຄຳປະດິດ ເຂັມມານິດ ເປັນເລຂາ ສະຫາຍ ໜູກີ ສີຫາລາດ ສະຫາຍ ບຸນວັນ ຈະສົ໋ວເກົ້າ ເປັນຮອງເລຂາ ສະຫາຍນາງ ສີດາ ບຸນມາ ສະຫາຍ ຄຳເຫວີຍ ສິງຫາທຳ ສະຫາຍ ພັທ ທອງວັນ ປະເສີດສຸກ ສະຫາຍ ພັທ ສົມພອນ ວົງສາ ສະຫາຍ ຄຳພັນ ສຸລິຍະນັນ ສະຫາຍ ສີວິໄລ ຫຼວງລາດ ເປັນຄະນະປະຈຳພັກ ແລະ ເລືອກເອົາ ສະຫາຍ ບຸນວັນ ຈະສົ໋ວເກົ້າ ເປັນປະທານກວດກາພັກ ສະຫາຍ ພູວົງ ອ່ອນສີ ສະຫາຍນາງ ລັກພະນົມວັນ ບົວລະພາ ເປັນຮອງ.
ໂອກາດນີ້ ສະຫາຍ ສິນລະວົງ ຄຸດໄພທູນ ກໍສະແດງຄວາມຊົມເຊີຍຕໍ່ຜົນງານທີ່ອົງຄະນະພັກ ເມືອງໄຊທານີ ຍາດມາໄດ້ໃນໄລຍະຜ່ານມາ ພ້ອມທັງໄດ້ເນັ້ນໜັກໃຫ້ຄະນະບໍລິຫານງານພັກຊຸດໃໝ່ ເອົາໃຈໃສ່ພິຈາລະນາຄົ້ນຄວ້າໃຫ້ແຈ້ງຕື່ມຂໍ້ສະດວກ ສິ່ງອຳນວຍ ແລະ ກາລະໂອກາດ ນຳໃຊ້ທ່າແຮງຂອງເມືອງເພື່ອບຸກບືນຈັດຕັ້ງປະຕິບັດໃຫ້ສຳເລັດໜ້າທີ່ ກຳແໜ້ນເຊື່ອມຊຶມຜັນຂະຫຍາຍແນວທາງນະໂຍບາຍຂອງພັກ-ລັດຖະບານ ໂດຍສະເພາະ ກຳແໜ້ນເຊື່ອມຊຶມ ແລະ ຜັນຂະຫຍາຍມະຕິຂອງກົມການເມືອງສູນກາງພັກ ວ່າດ້ວຍການພັດທະນາ ນວ ໃນໄລຍະໃໝ່ (2020-2030) ສະບັບເລກທີ 107/ກມສພ ທີ່ໄດ້ກຳນົດ 3 ທັດສະນະ 4 ທິດທາງ ແລະ 4 ຄາດໝາຍ ໃນການພັດທະນາ ນວ ສຸມໃສ່ສ້າງເມືອງໄຊທານີໃຫ້ເປັນເມືອງເຂັ້ມແຂງຮອບດ້ານ ໃນ 5 ປີ ໃຫ້ເພິ່ງຕົນເອງ ແລະ ກຸ້ມຕົນເອງດ້ານລາຍຈ່າຍບໍລິຫານ ພັດທະນາ 17 ບ້ານໃຫ້ເປັນສ່ວນໜຶ່ງຂອງ 300 ບ້ານ ເທສະບານ ນວ ສ້າງເຂດດົງ ໝາກຄາຍ ເຂດດອນໜູນ ໃຫ້ເປັນເທສະບານເມືອງໄຊທານີ ສ້າງເຂດທ່າງ່ອນ ນາຕານ ເປັນຈຸດສຸມສຳຄັນ ແລະ ກ້າວໄປເຖິງການເປັນເມືອງໃໝ່ໃນອະນາຄົດ ໃນນີ້ ຕ້ອງຫັນປ່ຽນໃໝ່ຕໍ່ການຈັດຕັ້ງນຳພາໃຫ້ແຂງແຮງກວ່າສະໄໝທີ VI ແລະ ກຳແໜ້ນ ເຊື່ອມຊຶມ ຈັດຕັ້ງປະຕິບັດເນື້ອໃນຈິດໃຈຂອງບົດລາຍງານການເມືອງ ແຜນພັດທະນາເສດຖະ ກິດ-ສັງຄົມຂອງເມືອງຕົນໃຫ້ເປັນຮູບປະທຳ ໃຫ້ລົງຮອດຂະແໜງການ-ບ້ານໂດຍໄວ.