ກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງນາຊາຍທອງ ນະຄອນຫຼວງວຽງຈັນ (ນວ) ຈັດຂຶ້ນວັນທີ 12-13 ມິຖຸນາ 2020 ຢູ່ກອງບັນຊາການທະຫານ ນວ ໂດຍເປັນປະທານຂອງສະຫາຍ ວຽງຄຳ ສີຫາໂຄດ ຮັກສາການເລຂາພັກເມືອງ ຮອງເຈົ້າເມືອງນາຊາຍທອງ ມີສະຫາຍ ສີຫຸນ ສິດທິລືໄຊ ຮອງເລຂາຄະນະພັກ ຮອງເຈົ້າຄອງ ນວ ພ້ອມດ້ວຍພະນັກງານອາວຸໂສ ອະດີດການນຳ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ສະຫາຍ ວຽງຄຳ ສີຫາໂຄດ ກ່າວວ່າ: 5 ປີຜ່ານມາ ການຊີ້ນຳ-ນຳພາຂອງຄະນະບໍລິຫານງານພັກ ເມືອງ ນາຊາຍທອງ ມີທັງຂໍ້ສະດວກ ແລະ ຂໍ້ຫຍຸ້ງຍາກ ເປັນຕົ້ນ ໄດ້ຮັບຜົນກະທົບຈາກວິກິດການເງິນໂລກ ໄພພິບັດ ທຳມະຊາດ ການລະບາດຂອງພະຍາດ ປາກົດການຫຍໍ້ທໍ້ຕ່າງໆໃນສັງຄົມ ເຊິ່ງໄດ້ສ້າງຄວາມຫຍຸ້ງຍາກບໍ່ໜ້ອຍ ໃຫ້ການພັດທະນາເມືອງ ແຕ່ພາຍໃຕ້ການຊີ້ນຳ-ນຳພາຢ່າງໃກ້ຊິດຂອງຄະນະບໍລິຫານງານພັກ ນວ ຄວາມ ຮັບຜິດຊອບສູງຂອງຄະນະບໍລິຫານງານພັກເມືອງ ປະຊາຊົນບັນດາເຜົ່າມີຄວາມສາມັກຄີເປັນເອກະພາບ ພ້ອມກັນຈັດຕັ້ງປະຕິບັດມະຕິຄຳສັ່ງ ຄຳແນະນຳຂອງສູນກາງພັກ ຂອງຄະນະພັກ ນວ ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກເມືອງນາຊາຍທອງ ບັນລຸຜົນສຳເລັດຫຼາຍດ້ານ ໂດຍສະເພາະ ໄດ້ເອົາໃຈໃສ່ພັດທະນາເສດຖະກິດເປັນໃຈກາງ ຕິດພັນກັບການພັດທະນາສັງຄົມ ຂຸດຄົ້ນນຳໃຊ້ທ່າແຮງດ້ານເສດຖະກິດຂອງເມືອງ ຊຸກຍູ້ປະຊາຊົນຜະລິດເປັນສິນຄ້າຕາມກົນໄກເສດຖະກິດຕະຫຼາດ ຂະຫຍາຍຕາໜ່າງການຄ້າ-ບໍລິການເພີ່ມຂຶ້ນ ເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ ສະເລ່ຍ 8,05% ຕໍ່ປີ ລວມຍອດຜະລິດຕະພັນ ບັນລຸ 1.462,4 ຕື້ກີບ ທຽບໃສ່ 5 ປີຜ່ານມາ ເພີ່ມຂຶ້ນ 484,08 ຕື້ກີບ ເທົ່າກັບ 149,48% ສະເລ່ຍລາຍຮັບ 18 ລ້ານກວ່າກີບຕໍ່ຄົນຕໍ່ປີ ໃນນີ້ ຂົງເຂດກະສິກຳ ແລະ ປ່າໄມ້ ຫຼຸດລົງ 25,25% ອຸດສາຫະກຳ-ຫັດຖະກຳ ເພີ່ມຂຶ້ນ 47,3% ການຄ້າ-ບໍລິການ ເພີ່ມຂຶ້ນ 27,45%.
ຊຸກຍູ້ການເກັບລາຍຮັບງົບປະມານ ໄດ້ 66.731.498.560 ກີບ ທຽບໃສ່ແຜນການ 5 ປີ ເທົ່າກັບ 87,42% ທຽບໃສ່ມະຕິກອງປະຊຸມໃຫຍ່ຄັ້ງຜ່ານມາ ປີ 2014 ເພີ່ມຂຶ້ນ 275,05% ອັນທີ່ພົ້ນເດັ່ນສົກງົບປະ ມານປີ 2019 ສາມາດປະຕິບັດໄດ້ເກີນແຜນການ 106% ພ້ອມນີ້ ຍັງໄດ້ນຳພາຊຸກຍູ້ຊາວກະສິກອນຫັນປ່ຽນການຜະລິດແບບທຳມະຊາດໄປສູ່ການຜະລິດເປັນສິນຄ້າ ລະບົບຊົນລະປະທານອ່າງນ້ຳຫຸມ-ນ້ຳຊ່ວງ ໄດ້ຮັບ ການປັບປຸງ ສະໜອງນ້ຳເຂົ້າເນື້ອທີ່ການຜະລິດໄດ້ 2 ລະດູ ທົ່ວເມືອງມີເນື້ອທີ່ປູກເຂົ້າ 10.724 ເຮັກຕາ ຜົນຜະລິດໄດ້ 246.106 ໂຕນ ສະມັດທະພາບສະເລ່ຍ 4,23 ໂຕນຕໍ່ເຮັກຕາ ສາມາດກຸ້ມຕົນເອງ ດ້ານສະບຽງອາຫານ ແລະ ຂາຍເປັນສິນຄ້າ ເນື້ອທີ່ປູກພືດຜັກ 1.106 ເຮັກຕາ ຜົນລະລິດໄດ້ 43.829 ໂຕນ ອັນພົ້ນເດັ່ນປະຊາຊົນມີຄວາມຮູ້-ຄວາມເຂົ້າໃຈ ແລະ ມີການຫັນປ່ຽນຈາກການປູກ-ການລ້ຽງສັດແບບເກົ່າ ເປັນການຜະລິດເປັນສິນຄ້າຫຼາຍຂຶ້ນ ປັດຈຸບັນ ທົ່ວເມືອງມີຟາມລ້ຽງສັດ 242 ຟາມ ເພີ່ມຂຶ້ນ 47 ຟາມ ຜະລິດທາດຊີ້ນໄດ້ 14.206 ໂຕນຕໍ່ປີ ສ້າງຄອບຄົວຕົວແບບຜະລິດເປັນສິນຄ້າໄດ້ 498 ຄອບຄົວ ເພີ່ມຂຶ້ນ 268 ຄອບຄົວ ມີຫົວໜ່ວຍການຜະລິດເປັນສິນຄ້າທີ່ໄດ້ຮັບກາເຄື່ອງໝາຍໂອດ໋ອບ 6 ຫົວໜ່ວຍ ເພີ່ມຂຶ້ນ 5 ຫົວໜ່ວຍ ມີຕະຫຼາດ 13 ແຫ່ງ ໃນນີ້ 2 ແຫ່ງ ແມ່ນໄດ້ມາດຕະຖານຕົວແບບ ມີໂຮງງານ 250 ແຫ່ງ ອັນພົ້ນເດັ່ນເມືອງນາຊາຍທອງສາມາດຈັດງານຕະຫຼາດນັດວາງສະແດງ ແລະ ຂາຍສິນຄ້າ ກະສິກຳ ຫັດຖະກຳ ແລະ ອຸດສາຫະກຳ ເປັນປົກກະຕິທຸກປີ.
ສຳລັບທິດທາງຕໍ່ໜ້າ ຈະສູ້ຊົນເຮັດໃຫ້ເສດຖະກິດມີການຂະຫຍາຍຕົວຢ່າງຕໍ່ເນື່ອງ ໝັ້ນທ່ຽງ ແລະ ຖືກ ທິດ ດ້ວຍຈັງຫວະການຂະຫຍາຍຕົວ 7-8% ຕໍ່ປີ ຊຸກຍູ້ການຜະລິດເປັນສິນຄ້າ ກະສິກຳສະອາດ ຕາມທິດຊົນລະກະເສດທັນສະໄໝ ຂະຫຍາຍເນື້ອທີ່ປົກຫຸ້ມສີຂຽວໃຫ້ໄດ້ 75% ຕິດພັນກັບການພັດທະນາແຫຼ່ງທ່ອງທ່ຽວ ທຳມະຊາດ ປະຫວັດສາດ ແລະ ວັດທະນະທຳໃຫ້ໂດດເດັ່ນ ແລະ ຍືນຍົງ ສຸມໃສ່ແກ້ໄຂປາກົດການຫຍໍ້ທໍ້ ດ້ານວັດທະນະທຳ-ສັງຄົມ ໄພສັງຄົມ ການຄ້າມະນຸດ ການກໍ່ອາຊະຍາກຳ ບັນຫາຂໍ້ຂັດແຍ່ງ ແລະ ຄະດີ ຄວາມໃນສັງຄົມໃຫ້ຫຼຸດລົງຢ່າງຈະແຈ້ງ ແລະ ສູ້ຊົນສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໃນແຕ່ລະປີໃຫ້ໄດ້ 85% ສ້າງສະມາຊິກປອດໃສ ເຂັ້ມແຂງ ໜັກແໜ້ນ ໃຫ້ໄດ້ 80% ແລະອື່ນໆ.