ຫ້ອງການຄຸ້ມຄອງ ແລະ ບໍລິຫານຕົວເມືອງວຽງຈັນ (ຄບຕ) ເປັນອົງການຈັດຕັ້ງໜຶ່ງທີ່ມີພາລະບົດບາດ ໃນການຮັກສາຄວາມສະອາດ ແລະ ປະດັບປະດານະຄອນຫຼວງວຽງຈັນ ໃຫ້ມີຄວາມສະອາດ ສວຍງາມ ມີສະພາບແວດລ້ອມທີ່ດີ ພ້ອມນັ້ນຍັງໄດ້ປູກຕົ້ນໄມ້ຕາມພື້ນທີ່ຕ່າງໆທີ່ມີເງື່ອນໄຂ ເພື່ອສ້າງນະຄອນຫຼວງວຽງຈັນ ໃຫ້ເປັນນະຄອນຫຼວງສີຂຽວ ເຊິ່ງໄລຍະຜ່ານມາ ກໍຄືວັນທີ 1 ມິຖຸນາ ເປັນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ຫ້ອງການ ຄບຕ ໄດ້ສົມທົບກັບເມືອງສີໂຄດຕະບອງ ປູກຕົ້ນໄມ້ຢູ່ຮົ້ວດ້ານນອກຂອງໂຮງຮຽນມັດທະຍົມຕອນປາຍມິດຕະພາບ ນະຄອນຫຼວງວຽງຈັນ-ໂຮ່ຈີມິງ ຢ່າງເປັນຂະບວນຟົດຟື້ນ.
ທ່ານ ບຸນຈັນ ແກ້ວສີທຳມະ ຫົວໜ້າຫ້ອງການ ຄບຕ ໃຫ້ຮູ້ວ່າ: ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອນສາກົນ 1 ມິຖຸນາ ຫ້ອງການ ຄບຕ ໄດ້ສົມທົບກັບເມືອງສີໂຄດຕະບອງ ນະຄອນຫຼວງວຽງຈັນ ປູກຕົ້ນໄມ້ ແລະ ສວນຍ່ອມຢູ່ຮົ້ວດ້ານນອກຂອງໂຮງຮຽນມັດທະຍົມຕອນປາຍມິດຕະພາບ ນະຄອນຫຼວງວຽງຈັນ-ໂຮ່ຈີມິງ ເພື່ອເພີ່ມປ່າປົກຫຸ້ມສີຂຽວ ສ້າງຄວາມຊຸ່ມຊື່ນ ເຮັດໃຫ້ສະພາບແວດລ້ອມດີ ທັງເປັນການປັບຄວາມສົມດຸນລະບົບນິເວດໃນນະຄອນຫຼວງວຽງຈັນ ຫຼຸດຜ່ອນມົນລະພິດຝຸ່ນລະອອງ ແລະ ມົນລະພິດຈາກຄວັນລົດຕ່າງໆ ແນໃສ່ສ້າງຕົວເມືອງວຽງຈັນ ໃຫ້ເປັນຕົວເມືອງສີຂຽວ ກາຍເປັນຕົວເມືອງອັດສະລິຍະ ນອກຈາກປູກຕົ້ນໄມ້ຢູ່ຈຸດດັ່ງກ່າວແລ້ວ ຍັງຈະສືບຕໍ່ປູກຕາມຈຸດຕ່າງໆທີ່ມີເງື່ອນໄຂ ເພື່ອເຮັດໃຫ້ເສັ້ນທາງເປັນເສັ້ນທາງສີຂຽວ ພ້ອມນັ້ນຍັງໄດ້ຊອກງົບປະມານ ແລະ ລະດົມພໍ່ແມ່ປະຊາຊົນ ຜູ້ທີ່ມີເງື່ອນໄຂປະກອບສ່ວນຊື້ຕົ້ນໄມ້ມາປູກ ແນໃສ່ພ້ອມກັນປະກອບສ່ວນເຮັດໃຫ້ເປັນຕົວເມືອງສີຂຽວ ໜ້າຢູ່ ແລະ ຍືນຍົງ ສະນັ້ນ ຂໍຮຽກຮ້ອງມາຍັງພໍ່ແມ່ປະຊາຊົນ ແລະ ອົງການຈັດຕັ້ງທຸກພາກສ່ວນໃຫ້ມີສ່ວນຮ່ວມນຳກັນ ໃນການປົກປັກຮັກສາ ປູກຕົ້ນໄມ້ ເພື່ອເພີ່ມປ່າປົກຫຸ້ມສີຂຽວໃຫ້ແກ່ນະຄອນຫຼວງວຽງຈັນ.
ທ່ານ ຄຳມອນ ບົວພັນ ຮອງເຈົ້າເມືອງສີໂຄດຕະບອງ ໃຫ້ຮູ້ຕື່ມອີກວ່າ: ເມືອງສີໂຄດຕະບອງ ເປັນເທສະບານຂອງນະຄອນຫຼວງວຽງຈັນ ເພື່ອເພີ່ມປ່າປົກຫຸ້ມໃຫ້ກັບນະຄອນຫຼວງວຽງຈັນ ເມືອງກໍໄດ້ເອົາໃຈໃສ່ພ້ອມກັນປູກຕົ້ນໄມ້ໃນວັນສຳຄັນຕ່າງໆ ຢ່າງເປັນຂະບວນຟົດຟື້ນ ສະເພາະວັນທີ 1 ມິຖຸນາ ເປັນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ເມືອງສີໂຄດຕະບອງ ຂອງພວກເຮົາ ໄດ້ພ້ອມກັນປູກຕົ້ນໄມ້ປະດັບຕາມເສັ້ນທາງ ຢູ່ເຂດບ້ານອ່າງໃຫຍ່ ປະມານ 500 ຕົ້ນ ໂດຍໄດ້ມີຫຼາຍພາກສ່ວນເຂົ້າຮ່ວມ ນອກນັ້ນ ກໍຍັງໄດ້ຮ່ວມກັບຫ້ອງການ ຄບຕ ປູກດອກໄມ້ເຮັດສວນຍ່ອມ ແລະ ຕົ້ນໄມ້ຈຳນວນໜຶ່ງ ເພື່ອຜັນຂະຫຍາຍນະໂຍບາຍ 6ສ ຂອງນະຄອນຫຼວງວຽງຈັນ ໂດຍສະເພາະ ສ ສີຂຽວ ພ້ອມນັ້ນຍັງມີແຜນຈະປູກໃສ່ຕາມຈຸດຕ່າງໆ ທີ່ຍັງບໍ່ທັນມີຕົ້ນໄມ້ສີຂຽວ ພິເສດແມ່ນຈະໄດ້ຕິດຕາມບັນດາຕົ້ນໄມ້ທີ່ປູກໄລຍະຜ່ານມາ ຢູ່ເສັ້ນທາງຕັດໃໝ່ ບ້ານໜອງບຶກ ຖ້າມີຕົ້ນໃດທີ່ຕາຍຈະໄດ້ປູກທົດແທນ ແລ້ວມອບໃຫ້ບ້ານ ຫຼື ສຳນັກງານເປັນຂອບເຂດຂອງໃຜມັນເປັນຜູ້ຮັບຜິດຊອບເບິ່ງແຍງ ປົກປັກຮັກສາໃຫ້ຕົ້ນໄມ້ເຕີບໃຫຍ່ມີສີຂຽວງາມ ແລະ ຍືນຍົງ.