ພິທີມອບ-ຮັບ ໂຄງການກໍ່ສ້າງລະບົບນໍ້າປະປາ ແລະ ສຸຂາພິບານ ເມືອງປາກຊັນ ແລະ ເມືອງປາກກະດິງ ແຂວງບໍລິຄໍາໄຊ ຈັດຂຶ້ນໃນວັນທີ 16 ກັນຍາ 2022 ທີ່ແຂວງບໍລິຄຳໄຊ ໂດຍເປັນກຽດກ່າວມອບຂອງທ່ານ ນາງ ວິໄລຄຳ ໂພສາລາດ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ແລະ ກ່າວຮັບໂດຍທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ມີພາກສ່ວນທີ່ກ່ຽວຂ້ອງເຂົ້າຮ່ວມ.
ໂດຍສືບຕໍ່ຜັນຂະຫຍາຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ໄປຄຽງຄູ່ກັບການພັດທະນາໃຫ້ໄປຕາມ SDG ຂອງປະຊາຄົມໂລກ ເວົ້າລວມ ເວົ້າສະເພາະແມ່ນ SDG6 ແລະ ແຜນພັດທະນາ 5 ປີຂອງຂະແໜງ ຍທຂ ໂດຍສະເພາະແມ່ນແຜນພັດທະນາ 2022-2025 ຍຸດທະສາດ 2022-2030 ແລະ ວິໄສທັດຮອດປີ 2030 ຂອງຂະແໜງນໍ້າປະປາ ແລະ ສຸຂາພິບານ ເນັ້ນໃສ່ໃຫ້ປະຊາຊົນລາວ 90% ທີ່ອາໄສໃນເທສະບານແຂວງ ແລະ ເມືອງ ໄດ້ຊົມໃຊ້ນໍ້າປະປາທີ່ສະອາດ ແລະ ປອດໄພ ປະຊາກອນ 100% ທີ່ອາໄສໃນເທສະບານແຂວງ ແລະ ເມືອງ ໄດ້ນໍາໃຊ້ວິດຖ່າຍທົ່ວເຖິງ ແລະ ຖືກຫຼັກອະນາໄມ ແລະ ໃຫ້ນໍ້າເປື້ອນໃນເທສະບານແຂວງ ແລະ ເມືອງ 50% ໄດ້ຮັບການບໍາບັດຢ່າງຖືກຫຼັກການ.
ນ້ຳປະປາ ແມ່ນປັດໄຈໜຶ່ງທີ່ຈຳເປັນຕໍ່ການຍົກລະດັບຄຸນນະພາບຊີວິດຂອງປະຊາຊົນໃຫ້ນັບມື້ດີຂຶ້ນ ການຊົມໃຊ້ນໍ້າປະປາໃນຕົວເມືອງ ແລະ ຊົນນະບົດ ຍັງແມ່ນຕົວຊີ້ບອກພື້ນຖານອັນໜຶ່ງໃນການພັດທະນາເສດຖະກິດ-ສັງຄົມ ໃນແຕ່ລະໄລຍະຂອງປະເທດເຮົາ ສະນັ້ນ ລັດຖະບານ ຍາມໃດກໍໄດ້ເອົາໃຈໃສ່ພັດທະນາ ປັບປຸງ ແລະ ຂະຫຍາຍລະບົບນ້ຳປະປາໃຫ້ທົ່ວເຖິງທັງໃນຕົວເມືອງ ແລະ ຊົນນະບົດ ໃນທົ່ວປະເທດ.
ໂຄງການກໍ່ສ້າງນໍ້າປະປາ ແລະ ສຸຂາພິບານ ເມືອງປາກຊັນ ເມືອງປາກກະດິງ ເປັນໂຄງການໄດ້ຮັບເງິນກູ້ຈາກທະນາຄານພັດທະນາອາຊີ (ADB Loan 3041-Lao) ເພື່ອພັດທະນາລະບົບນໍ້າປະປາ ພາຍໃຕ້ໂຄງການນໍ້າປະປາ ແລະ ສຸຂາພິບານຂອງກະຊວງໂຍທາທິການ ແລະ ຂົນສົ່ງ ໂດຍແມ່ນກົມນໍ້າປະປາເປັນຜູ້ຈັດຕັ້ງປະຕິບັດ ຮ່ວມກັບພະແນກໂຍທາທິການ ແລະ ຂົນສົ່ງແຂວງ ພາຍໃຕ້ການຊີ້ນໍາ-ນໍາພາ ຂອງຄະນະນໍາ ກະຊວງໂຍທາທິການ ແລະ ຂົນສົ່ງ ຄະນະນໍາຂອງແຂວງບໍລິຄໍາໄຊ ແລະ ບັນດາພະແນກການຕ່າງໆທີ່ກ່ຽວຂ້ອງ ໂຄງການກໍ່ສ້າງນໍ້າປະປາຢູ່ເມືອງປາກຊັນ ແລະ ເມືອງປາກກະດິງ ໃຊ້ງົບປະມານທັງໝົດ 38,65 ຕື້ກີບ ລັດຖະບານປະກອບເປັນທຶນໃຫ້ລັດວິສາຫະກິດນໍ້າປະປາແຂວງ 70% ເປັນມູນຄ່າ 27,06 ຕື້ກີບ ສ່ວນ 30% ເປັນມູນຄ່າ 11,59 ຕື້ກີບ ໃຫ້ລັດວິສາຫະກິດນໍ້າປະປາແຂວງກູ້ຢືມ ໃນເງື່ອນໄຂດອກເບ້ຍ 6,4% ຕໍ່ປີ ໄລຍະທົດແທນຄືນ 25 ປີ.
ທະນາຄານພັດທະນາອາຊີ ຍາມໃດກໍເຫັນໄດ້ຄວາມສໍາຄັນ ແລະ ຄວາມຈໍາເປັນຂອງ ສປປ ລາວ ເຮົາ ຊ່ວຍເຫຼືອດ້ານແຫຼ່ງທຶນເພື່ອພັດທະນາພື້ນຖານໂຄງລ່າງດ້ານຕ່າງໆ ໂດຍສະເພາະຂະແໜງນໍ້າປະປາ ແລະ ສຸຂາພິບານຂອງລາວເຮົາ.
# ຂ່າວ – ພາບ : ເພັດສະໝອນ