ມີຄຳຂວັນອະມະຕະລະດັບໂລກ ປະໂຫຍກໜຶ່ງທີ່ສາມາດໃຊ້ໄດ້ກັບການເຄື່ອນໄຫວຕ່າງໆ ບໍ່ວ່າຈະເປັນການອະນຸຮັກສິ່ງແວດລ້ອມ ການລຶບລ້າງຄວາມທຸກຍາກ ບັນຫາສິດທິມະນຸດ ກົດໝາຍ ແລະ ອື່ນໆ ຄຳຂວັນທີ່ວ່ານັ້ນ ແປເປັນພາສາລາວ (ຕາມແບບຂອງຜູ້ຂຽນ) ໄດ້ຄວາມໝາຍວ່າ “ຄິດກວ້າງໆ ແຕ່ປະຕິບັດພາຍໃນຂອບເຂດຂອງຕົນເອງ” (Think globally-Act locally) ຕົວຢ່າງ: ເພື່ອແກ້ໄຂບັນຫາໂລກຮ້ອນນັ້ນ ຄົນເຮົາອາດຄິດເຖິງຜົນກະທົບຂອງມັນທີ່ມີຕໍ່ໝົດໂລກ ແຕ່ບໍ່ຈຳເປັນຕ້ອງທຽວໄປແກ້ໄຂບັນຫານີ້ ໃຫ້ທຸກໆປະເທດ ແຕ່ຄວນເຄື່ອນໄຫວປົກປັກຮັກສາສິ່ງແວດລ້ອມ ຢູ່ປະເທດ ແຂວງ ເມືອງ ບ້ານຂອງຕົນເອງ ດ້ວຍການອະນຸຮັກປ່າ ບໍ່ຈູດຂີ້ເຫຍື້ອຊະຊາຍ ເຊົາ ຫຼື ຫຼຸດຜ່ອນການໃຊ້ຖົງປຣາສຕິກ ແລະ ອື່ນໆ… ຄຳຂວັນທີ່ກ່າວມາຂ້າງເທິງນັ້ນ ໄດ້ແປຮູບເປັນການກະທຳຕົວຈິງຢູ່ຫຼາຍໆປະເທດ ຕົວຢ່າງ:
ທີ່ ອິຕາລີ: ຂ່າວຕ່າງປະເທດໃຫ້ຮູ້ຫວ່າງບໍ່ດົນມານີ້ວ່າ ອິຕາລີ ໄດ້ກາຍເປັນປະເທດທຳອິດຂອງໂລກ ທີ່ນຳເອົາບັນຫາການປ່ຽນແປງຂອງດິນຟ້າອາກາດ ເຂົ້າເປັນສ່ວນໜຶ່ງຂອງວິຊາວິທະຍາສາດ ທີ່ສອນໃນແຕ່ໂຮງຮຽນຂັ້ນປະຖົມ ຮອດສະຖາບັນການສຶກສາຂັ້ນສູງສຸດ ຫຼັກສູດການສອນດັ່ງກ່າວ ຈະເລີ່ມປະຕິບັດນັບແຕ່ເດືອນກັນຍາ 2020 (ສົກສຶກສາ 2020-2021) ເປັນຕົ້ນໄປ ວິຊາວິທະຍາສາດປະສົມປະສານກັບຄວາມຮູ້ ກ່ຽວກັບການປ່ຽນແປງຂອງດິນຟ້າອາກາດນີ້ ຈະສອນ-ຮຽນກັນ 1 ຊົ່ວໂມງຕໍ່ອາທິດ ນອກຈາກນັ້ນ ທາງກະຊວງສຶກສາທິການ ອິຕາລີ ຍັງໃຫ້ຮູ້ຕື່ມອີກວ່າ ພາກວິຊາດັ່ງເດີມ ເຊັ່ນ: ວິຊາພູມີສາດ ແລະ ວິຊາຟິຊິກນັ້ນ ກໍຈະເນັ້ນຄວາມຮູ້ກ່ຽວກັບການພັດທະນາແບບຍືນຍົງ ທີ່ຕິດພັນກັບບັນຫາອະນຸຮັກສິ່ງແວດລ້ອມອີກດ້ວຍ ອິຕາລີ ເປັນປະເທດໜຶ່ງທີ່ໄດ້ຮັບຜົນກະທົບຢ່າງຮ້າຍແຮງ ຈາກສະພາບປ່ຽນແປງຂອງດິນຟ້າອາກາດ ຊຶ່ງເຮັດໃຫ້ເກີດສະພາບນ້ຳຖ້ວມ ດິນເຊາະເຈື່ອນ ແລະ ຫຼາຍຕົວເມືອງ ມີຄວາມສ່ຽງຈະຖືກຈົມຢູ່ພື້ນນ້ຳໃນຕໍ່ໜ້າ ຍ້ອນກ້ອນນ້ຳແຂງຢູ່ຂົ້ວໂລກເໜືອເປື່ອຍຢ່າງໄວວາ.
ທີ່ ຫວຽດນາມ: ມີຂ່າວໜ້າສົນໃຈທີ່ອອກມາຈາກ ຫວຽດນາມ ຫວ່າງບໍ່ດົນມານີ້ ກ່ຽວກັບນະໂຍບາຍໃໝ່ຂອງບັນດາທະນາຄານຫວຽດນາມ ໃນການປ່ອຍເງິນກູ້ໃຫ້ຂະແໜງອຸດສາຫະກຳ ເລື່ອງນີ້ພົວພັນກັບການແກ້ໄຂບັນຫາມົນລະພິດທີ່ເກີດຈາກກອງຂີ້ເຫຍື້ອ ແລະ ຈາກການເຄື່ອນໄຫວຂອງບັນດາອຸດສາຫະກຳ ເລື່ອງມີຢູ່ວ່າ ທາງທະນາຄານ ຫວຽດນາມ ໄດ້ກຳນົດກົດລະບຽບກ່ຽວກັບການປ່ອຍເງິນກູ້ ໂດຍໄດ້ເນັ້ນວ່າ ກ່ອນປ່ອຍເງິນກູ້ໃຫ້ໂຄງການໃດກໍຕາມ ທາງທະນາຄານຈະຕ້ອງສຶກສາຕີລາຄາກ່ຽວກັບຄວາມສ່ຽງເລື່ອງມົນລະພິດ ທີ່ໂຄງການຮັບເງິນກູ້ອາດຈະກໍ່ຂຶ້ນ ເວົ້າງ່າຍໆ ກໍຄື ອຸດສາຫະກຳຂະແໜງການຜະລິດ ຫຼື ໂຄງການໃດກໍຕາມ ຖ້າຕ້ອງການກູ້ເງິນຈາກທະນາຄານ ຈະຕ້ອງມີເອກະສານບົດວິພາກກ່ຽວກັບມາດຕະການຂອງຕົນ ໃນການຄວບຄຸມມົນລະພິດ ເພື່ອໃຫ້ທາງທະນາຄານສຶກສາເປັນບ່ອນອີງ ວ່າຈະປ່ອຍເງິນກູ້ໃຫ້ຫຼືບໍ່ ບັນດາອຸດສາຫະກຳທີ່ເປັນເປົ້າໝາຍຂອງທາງທະນາຄານ ໃນການສຶກສາກ່ຽວກັບບັນຫາມົນລະພິດນັ້ນ ລວມມີອຸດສາຫະກຳ ຫຼື ໂຄງການພັດທະນາພະລັງງານ ໂຮງງານເຈ້ຍ ແລະ ໄຍໄມ້ ໂຮງງານຍ້ອມສີແຜ່ນແພ ປຸງແຕ່ງອາຫານທະເລ ແລະ ອຸດສາຫະກຳຜະລິດຖ່ານໄຟສາຍ.