ປັດຈຸບັນ ທົ່ວປະເທດມີອັດຕາການເສຍຊີວິດ ຍ້ອນພະຍາດໄຂ້ຍຸງລາຍສະສົມ 5 ຄົນ ໃນນີ້ ມີກໍລະນີເສຍຊີວິດໃໝ່ເພີ່ມ 1 ຄົນ ເຊິ່ງເສຍຊີວິດວັນທີ 8 ມິຖຸນາ 2020 ຢູ່ແຂວງບໍລິຄຳໄຊ ລວມເປັນ 4 ແຂວງ ທີ່ພົບກໍລະນີເສຍຊີວິດ.
ບົດລາຍງານຂອງກະຊວງສາທາລະນະສຸກ ວັນທີ 9 ມິຖຸນາ 2020 ໃຫ້ຮູ້ວ່າ: ນັບແຕ່ວັນທີ 28 ທັນວາ 2019 ຫາ 8 ມິຖຸນາ 2020 ມີກໍລະນີສະສົມຄົນເຈັບພະຍາດໄຂ້ຍຸງລາຍ 1.676 ກໍລະນີ ເສຍຊີວິດ 5 ກໍລະນີ ໃນນີ້ ນະຄອນຫຼວງວຽງຈັນ ຍັງຄອງອັນດັບສູງ ມີຄົນຕິດເຊື້ອພະຍາດນີ້ສະສົມ 391 ກໍລະນີ ເສຍຊີວິດ 2 ຄົນ ແຂວງວຽງຈັນ 235 ກໍລະນີ ອັດຕະປື 213 ກໍລະນີ ບໍລິຄຳໄຊ 174 ກໍລະນີ ເສຍຊີວິດ 1 ຄົນ ຄຳມ່ວນ 149 ກໍລະນີ ເສຍຊີວິດ 1 ຄົນ ສະຫວັນນະເຂດ 113 ກໍລະນີ ສາລະວັນ 98 ກໍລະນີ ໄຊຍະບູລີ 92 ກໍລະນີ ເສຍຊີວິດ 1 ຄົນ ເຊກອງ 48 ກໍລະນີ ຫຼວງນ້ຳທາ 39 ກໍລະນີ ໄຊສົມບູນ 32 ກໍລະນີ ອຸດົມໄຊ 32 ກໍລະນີ ຫຼວງພະບາງ 29 ກໍລະນີ ບໍ່ແກ້ວ 15 ກໍລະນີ ຈຳປາສັກ 10 ກໍລະນີ ຜົ້ງສາລີ 5 ກໍລະນີ ຫົວພັນ 1 ກໍລະນີ ສ່ວນແຂວງຊຽງຂວາງ ບໍ່ພົບກໍລະນີຕິດເຊື້ອພະຍາດນີ້.
ສະພາບໄຂ້ຍຸງລາຍປີຜ່ານມາ ຖືເປັນປີລະບາດໃຫຍ່ຢູ່ຂົງເຂດອາຊີຕາເວັນອອກສ່ຽງໃຕ້ ສະເພາະຢູ່ ສປປ ລາວ ໄດ້ມີການແຜ່ລະບາດຢ່າງກວ້າງຂວາງໃນທົ່ວປະເທດ ເຊິ່ງມີຜູ້ຕິດເຊື້ອ 39.000 ຄົນ ເສຍຊີວິດ 76 ຄົນ.
ເພື່ອປ້ອງກັນພະຍາດໄຂ້ຍຸງລາຍບໍ່ໃຫ້ມີການລະບາດເປັນວົງກວ້າງ ແລະ ບໍ່ໃຫ້ມີກໍລະນີໃໝ່ ທຸກຄົນຕ້ອງພ້ອມກັນປ້ອງກັນບໍ່ໃຫ້ຍຸງລາຍກັດ ໄປຄຽງຄູ່ກັບການປະຕິບັດຫຼັກການ 5ປ ທີ່ກະຊວງສາທາລະນະສຸກວາງອອກເປັນປະຈຳ ໂດຍສະເພາະທຳລາຍແຫຼ່ງເພາະພັນໜອນນ້ຳຍຸງລາຍ ບໍ່ມີໜອນນ້ຳ ກໍຈະບໍ່ມີຍຸງລາຍ.
# ຂ່າວ & ພາບ: ເພັດສະໝອນ