ກອງປະຊຸມປຶກສາຫາລືກ່ຽວກັບການພັດທະນາວຽກງານທ່ອງທ່ຽວ ຢູ່ແຂວງໄຊສົມບູນ ໄດ້ຈັດຂຶ້ນວັນທີ 8 ມີຖຸນາ 2020 ທີ່ຫ້ອງປະຊຸມພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ ໂດຍການເປັນປະທານຂອງທ່ານ ແດງ ປະທຸມທອງ ຮອງເຈົ້າແຂວງໄຊສົມບູນ ທັງເປັນຫົວໜ້າຄະນະຮັບຜິດຊອບຊີ້ນຳລວມ ໂຄງການພັດທະນາແຫຼ່ງທ່ອງທ່ຽວພູເບ້ຍ ມີທ່ານ ຕົ່ງມົວຊົວໂກ້ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ ພ້ອມດ້ວຍພາກສ່ວນກ່ຽວຂ້ອງ ແລະ ບໍລິສັດ ກຸ່ມຄຳໄພຊະນະ ຈຳກັດຜູ້ດຽວ ເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອປຶກສາຫາລືກ່ຽວກັບການກະກຽມ ຈັດງານຄາຣາວານທ່ອງທ່ຽວພິຊິດພູເບ້ຍ ໃນທ້າຍປີ 2020 ຫາລືຄົ້ນຄວ້າຄຳຂວັນ ໂຄສະນາການທ່ອງທ່ຽວຂອງແຂວງ ແລະ ຮັບຟັງການຜ່ານບົດວິພາກເສດຖະກິດ ແລະ ເຕັກນິກ ໂຄງການ KPG ພັດທະນາແຫຼ່ງທ່ອງທ່ຽວລະດັບຊາດ ສະຫວັນທະເລໝອກພູເບ້ຍ ໄຊສົມບູນ ຊຶ່ງໂຄງການດັ່ງກ່າວ ມີມູນຄ່າການກໍ່ສ້າງທັງໝົດ 500 ລ້ານໂດລາສະຫະລັດ ເປັນໂຄງການບຸລິມະສິດທີ່ມີຫຼາກຫຼາຍກິດຈະກຳ ຕິດພັນກັບທຳມະຊາດ ໂດຍປະຊາຊົນມີສ່ວນຮ່ວມ ສາມາດສ້າງວຽກເຮັດງານທຳໃຫ້ແກ່ປະຊາຊົນ ສົ່ງເສີມການຜະລິດກະສິກຳ-ຫັດຖະກຳ ສີໄມ້ລາຍມື ແລະ ວັດທະນະທຳຂອງປະຊາຊົນບັນດາເຜົ່າ ເພື່ອເປັນຈຸດດຶງດູດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມແຂວງໄຊສົມບູນໃຫ້ຫຼາຍຂຶ້ນ.
ການກໍ່ສ້າງໄດ້ແບ່ງອອກເປັນສອງໄລຍະຄື: ໄລຍະທີ 1 ແຕ່ປີ 2020-2025 ໂຄງການຈະສຸມໃສ່ການພັດທະນາຢູ່ເທິງພູເບ້ຍ ແລະ ຕີນພູເບ້ຍບາງສ່ວນ ໂດຍປະກອບມີກິດຈະກຳຍ່າງປ່າສຶກສາທຳມະຊາດ ແລະ ຊີວະນານາພັນ ການທ່ອງທ່ຽວແບບຜະຈົນໄພຂີ່ສະລິງ ໄຕ່ຂົວອູ່ ໄຕ່ໜ້າຜາ ແລະ ຂີ່ລົດຖີບພູເຂົາ ການນອນເຕັ້ນຊົມທະເລໝອກ ການທ່ອງທ່ຽວດ້ານກະສິກຳປອດສານພິດ ການພັກແຮມນຳເຮືອນປະຊາຊົນ ສ່ວນໄລຍະທີ 2 ແຕ່ປີ 2026-2032 ແມ່ນພັດທະນາການທ່ອງທ່ຽວແບບຜະຈົນໄພ ແລະ ທັນສະໄໝ ໂດຍມີກິດຈະກຳສວນສະໜຸກ ທີ່ພັກລະດັບ 5 ດາວ ກະຕ່າລອຍຟ້າ ສວນນ້ຳ ສູນວິໄຈພຶກສາສາດ ແລະ ຈຳລອງອະລິຍະທຳຊົນຊາດຊົນເຜົ່າຂອງປະເທດອາຊຽນ ແລະ ສະຖານທີ່ທີ່ມີຊື່ສຽງ.
ທ່ານ ຄຳໄພ ສົມຊະນະ ປະທານບໍລິສັດ ກຸ່ມຄຳໄພ ຈຳກັດຜູ້ດຽວ ໄດ້ກ່າວໃຫ້ຮູ້ວ່າ: ມາຮອດປັດຈຸບັນນີ້ແມ່ນໄດ້ສຳເລັດການສຶກສາ ສຳຫຼວດຄວາມເປັນໄປໄດ້ແລ້ວ ພາຍຫຼັງຜ່ານຄະນະກຳມະການ ແລະ ພາກສ່ວນທີ່ກ່ຽວຂ້ອງຂັ້ນແຂວງມີຄວາມເປັນເອກະພາບກັນ ຈະນຳສະເໜີຕໍ່ລັດຖະບານເພື່ອພິຈາລະນາຮັບຮອງ ໃຫ້ບໍລິສັດດຳເນີນການໄປຕາມແຕ່ລະຂັ້ນຕອນຂອງແຜນການ ນອກນັ້ນ ພາຍຫຼັງໂຄງການດັ່ງກ່າວສຳເລັດ ແມ່ນຈະສ້າງຜົນປະໂຫຍດຢ່າງຫຼວງຫຼາຍ ໃຫ້ແກ່ປະຊາຊົນໃນຂອບເຂດເທດສະບານແຂວງໄຊສົມບູນ.