ເປີດໃຫ້ບໍລິການທ່ຽວຊົມ ແລະ ຈັດກິດຈະກຳສະຖານທີ່ພິພິທະພັນສະຖານບູຮານ

ພາຍຫຼັງທີ່ລັດຖະບານ ກໍຄືຄະນະສະເພາະກິດ ມີຄຳສັ່ງຜ່ອນຜັນການສະກັດກັ້ນ ປ້ອງກັນພະຍາດໂຄວິດ-19 ເຮັດໃຫ້ການດຳລົງຊີວິດຂອງປະຊາຊົນບັນດາເຜົ່າ ກ້າວເຂົ້າສູ່ປົກກະຕິ ແລະ ສະຖານທີ່ທ່ອງທ່ຽວຫຼາຍແຫ່ງ ກໍໄດ້ກັບມາເປີດໃຫ້ບໍລິການເປັນປົກກະຕິ ນັບແຕ່ວັນທີ 1 ມິຖຸນາ 2020 ເປັນຕົ້ນມາ ເພື່ອຊຸກຍູ້-ສົ່ງເສີມການທ່ອງທ່ຽວພາຍໃນໃຫ້ນັບມື້ເຂັ້ມແຂງ.

ທ່ານ ພູວຽງ ໂພທິສານ ຫົວໜ້າອຳນວຍການພິພິທະພັນສະຖານບູຮານນະຄອນຫຼວງວຽງຈັນ (ນວ) ຮັບຜິດຊອບພິພິທະພັນຫໍພະແກ້ວ ສີສະເກດ ພະທາດຫຼວງ ແລະ ຫໍຫຼັກເມືອງ ໃຫ້ສຳພາດວັນທີ 8 ມິຖຸນາ 2020 ວ່າ: ພະຍາດໂຄວິດ-19 ເກີດຂຶ້ນຕົ້ນປີ 2020 ເຮັດໃຫ້ສະພາບການທ່ອງທ່ຽວລາວ ກໍຄືສະພາບການຂອງໂລກມີການປ່ຽນແປງ ໂດຍສະເພາະ ມີຜົນກະທົບຕໍ່ຊີວິດ ແລະ ເສດຖະກິດ-ສັງຄົມ ໃນນີ້ ການທ່ອງທ່ຽວຢູ່ສະຖານບູຮານ ນວ ກໍໄດ້ຮັບຜົນກະທົບເຊັ່ນກັນ ເນື່ອງຈາກໄດ້ຢຸດບໍລິການແຕ່ວັນທີ 1 ເມສາ 2020 ເປັນຕົ້ນມາ ໂດຍປະຕິບັດຕາມແຈ້ງການ ກໍຄືມາດຕະການເລກທີ 06/ນຍ ເພື່ອຕ້ານ ແລະ ສະກັດກັ້ນພະຍາດດັ່ງກ່າວ ມາຮອດວັນທີ 18 ພຶດສະພາ 2020 ລັດຖະບານໄດ້ມີມາດຕະການຜ່ອນຜັນອອກມາ ແລະ ອີງໃສ່ແຈ້ງການ ກໍຄືການເຫັນດີຂອງຄະນະພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນວ ສະຖານບູຮານ ໄດ້ກັບມາເປີດບໍລິການເປັນການທົດລອງ ເພື່ອຕິດຕາມສະພາບຂອງນັກທ່ອງທ່ຽວ ຜ່ານການເປີດບໍລິການ ກໍມີນັກທ່ອງທ່ຽວພາຍໃນ ແລະ ຕ່າງປະເທດ ທີ່ມາດຳລົງຊີວິດຢູ່ປະເທດລາວມາທ່ຽວໜ້ອຍ ຕໍ່ມາ ໄດ້ມີແຈ້ງການຂອງລັດຖະບານສະບັບຫຼ້າສຸດອອກມາອີກ ສະຖານບູຮານ ນວ ໄດ້ເປີດບໍລິການເປັນທາງການແຕ່ວັນທີ 1 ມິຖຸນາ 2020 ເປັນຕົ້ນມາ ເຊິ່ງຜ່ານການເປີດໃຫ້ບໍລິການ ມີນັກທ່ອງທ່ຽວລາວບັນດາເຜົ່າທີ່ມາຈາກຕ່າງແຂວງ ຕ່າງເມືອງ ໄດ້ພາກັນມາສັກກາລະບູຊາ ກາບໄຫວ້ ສ່ວນຄົນຕ່າງປະເທດທີ່ມາເຮັດວຽກຢູ່ລາວ ກໍໄດ້ມາທ່ຽວຊົມ ແຕ່ຍັງມີໜ້ອຍ ເນື່ອງຈາກດ່ານຊາຍແດນບໍ່ທັນເປີດ ຈຶ່ງເຮັດໃຫ້ບໍ່ມີນັກທ່ອງທ່ຽວຕ່າງປະເທດ ເຂົ້າມາທ່ຽວຊົມເທົ່າທີ່ຄວນ ເຊິ່ງພວກເຮົາຫວັງວ່າໃນຕໍ່ໜ້າ ສະພາບການລະບາດຂອງພະຍາດໂຄວິດ-19 ຢູ່ປະເທດເຮົາ ແລະ ຢູ່ປະເທດໃກ້ຄຽງ ຈະບໍ່ມີການລະບາດ ແລະ ສາມາດສະກັດກັ້ນໄດ້ ເຮັດໃຫ້ນັກທ່ອງທ່ຽວເຂົ້າມາທ່ຽວຊົມປະເທດເຮົາຄືກຄື້ນອີກຄັ້ງ ໃນໄລຍະທີ່ເປີດບໍລິການນີ້ ສະຖານບູຮານ ນວ ກໍໄດ້ມີມາດຕະການຮັບມື ເປັນຕົ້ນ ພະນັກງານພາຍໃນ ແລະ ນັກທ່ອງທ່ຽວທີ່ເຂົ້າທ່ຽວຊົມ ຕ້ອງໃສ່ຜ້າອັດປາກ-ອັດດັງ ກວດອຸນຫະພູມ ແລະ ລ້າງມືດ້ວຍເຈວ.

ຮຽກຮ້ອງມາຍັງປະຊາຊົນບັນດາເຜົ່າທົ່ວປະເທດ ກໍຄືທຸກພາກສ່ວນຂອງສັງຄົມທີ່ຢາກມາທ່ຽວຊົມ ກາບໄຫວ້ສັກກາລະບູຊາ ແລະ ມາຊົມໃຊ້ແຫຼ່ງທ່ອງທ່ຽວສະຖາບູຮານແຫ່ງນີ້ ເປັນຕົ້ນ ຈັດກິດຈະກຳຕ່າງໆໃນລັກສະນະການທ່ອງທ່ຽວ ແລະ ເຮັດບຸນສິນກິນທານ ກໍສາມາດມາຊົມໃຊ້ໄດ້ ເພື່ອພ້ອມກັນຟື້ນຟູໂຄສະນາປະຊາສຳພັນ ກ່ຽວກັບວຽກງານການທ່ອງທ່ຽວພາຍໃນໃຫ້ຫຼາຍຂຶ້ນ ໂດຍສະເພາະ ລາວທ່ຽວລາວ ເພື່ອສ້າງຄວາມໝັ້ນໃຈໃຫ້ຄົນຕ່າງປະເທດ ວ່າປະເທດລາວບໍ່ມີການແຜ່ລະບາດຂອງພະຍາດໂຄວິດ-19 ເຮັດໃຫ້ການທ່ອງທ່ຽວຢູ່ປະເທດເຮົາ ກັບມາຄືກຄື້ນມ່ວນຊື່ນອີກຄັ້ງ.