ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ ປະທານປະເທດແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຄຳນັບຂອງ ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊໍາຣິນ ປະທານສະພາແຫ່ງຊາດແຫ່ງລາຊະອານາຈັກກໍາປູເຈຍ ພ້ອມດ້ວຍຄະນະ ໃນວັນທີ 14 ກັນຍາ 2022 ທີ່ຫ້ອງວ່າການສູນກາງພັກ ໃນໂອກາດເດີນທາງມາຢ້ຽມ ແລະ ເຮັດວຽກ ຢູ່ ສປປ ລາວ ຢ່າງເປັນທາງການ ແຕ່ວັນທີ 14-16 ກັນຍາ 2022.
ໃນໂອກາດດັ່ງກ່າວ ທ່ານ ທອງລຸນ ສີສຸລິດ ໄດ້ສະແດງຄວາມຕ້ອນຮັບ ຊົມເຊີຍ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນຮັດແໜ້ນສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ກຳປູເຈຍ ກໍຄືສະພາແຫ່ງຊາດແຫ່ງ ສປປ ລາວ ແລະ ສະພາແຫ່ງຊາດແຫ່ງລາຊະອານາຈັກກຳປູເຈຍໃຫ້ຂະຫຍາຍຕົວຍິ່ໆຂຶ້ນ ແລະ ສືບຕໍ່ໃຫ້ການສະໜັບສະໜູນຊ່ວຍເຫຼືອຊຶ່ງກັນ ແລະ ກັນຕະຫຼອດໄປ.
ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊໍາຣິນ ໄດ້ຕາງໜ້າຄະນະ ສະແດງຄວາມຂອບໃຈຕໍ່ທ່ານ ທອງລຸນ ສີສຸລິດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງສະແດງຄວາມດີໃຈທີ່ເຫັນວ່າການພົວພັນຮ່ວມມືລະຫວ່າງສອງປະເທດ ກໍາປູເຈຍ-ລາວ ສືບຕໍ່ມີການພັດທະນາຢ່າງຕໍ່ເນື່ອງໃນຂົງເຂດຕ່າງໆ ນອກຈາກນີ້ ຍັງໄດ້ລາຍງານຫຍໍ້ກ່ຽວກັບຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍສະເພາະ ການພົບປະສອງຝ່າຍກັບສະພາແຫ່ງຊາດ ແຫ່ງ ສປປ ລາວ ທ່ານປະທານປະເທດ ໄດ້ຮັບຊາບ.
ໃນວັນດຽວກັນນີ້ ທີ່ສຳນັກງານນາຍົກລັດຖະມົນຕີ ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ຕ້ອນຮັ ສົມເດັດອັກຄະມະຫາ ໂປເຢຍ ຈັກກຣີ ເຮັງຊໍາຣິນ ພ້ອມຄະນະ ເຂົ້າຢ້ຽມຢາມພົບປະເຊັ່ນດຽວກັນ ແລະ ໄດ້ສືບຕໍ່ເຂົ້າຮ່ວມພິທີວາງພວງມາລາຢູ່ອະນຸສາວະລີນັກຮົບນິລະນາມດາວເເດງຮ່ວມກັບທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ເພື່ອສະເເດງຄວາມໄວ້ອາໄລ ກະຕັນຮູ້ບຸນຄຸນ ເເລະ ຈົ່ງຮັກພັກດີຕໍ່ວິລະຊົນເເຫ່ງຊາດ ນັກຮົບເເຂ່ງຂັນ ນາຍ ເເລະ ພົນທະຫານ ເເລະ ປະຊາຊົນລາວບັນດາເຜົ່າ ທີ່ເສຍສະຫຼະເລືອດເນື້ອ ເເລະ ຊີວິດຕໍ່ພາລະກິດຕໍ່ສູ້ກູ້ຊາດ ຍາດເອົາເອກະລາດຈາກພວກຈັກກະພັດຜູ້ຮຸກຮານ ຈົນສາມາດສະຖາປະນາເປັນປະເທດສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ ປີ 1975.
