ປະຊາຊົນໃນປະເທດຈີນ ໃຊ້ແອັບໂທລະສັບມືຖືໃນການຕິດຕາມ ແລະ ຊ່ວຍຖ່ວງການແຜ່ກະຈາຍຂອງໂຄໂຣນາໄວຣັສ ຫຼື COVID-19 ບາງແອັບພລິເຄຊັ່ນ ໃຫ້ຂໍ້ມູນຫຼ້າສຸດກ່ຽວກັບສະຖານະການການຕິດເຊື້ອໄວຣັສ ຫຼື ຂໍ້ມູນກ່ຽວກັບຜູ້ຕິດເຊື້ອ.
ລັດຖະບານຈີນ ເຮັດວຽກຮ່ວມກັບບໍລິສັດເຕັກໂນໂລຊີທີ່ໃຫຍ່ທີ່ສຸດສອງແຫ່ງຂອງປະເທດ ໃນການຕິດຕາມພະຍາດນີ້ຄື Alibaba Group ແລະ Tencent Holdings ສ້າງລະບົບບັນທຶກສຸຂະພາບຂອງບຸກຄົນ ຕະຫຼອດຈົນລະບຸພາຫະຂອງພະຍາດໂດຍການໃຊ້ສີ.
ເມື່ອໄວໆນີ້ Alipay ແອັບພລິເຄຊັ່ນໃຫ້ບໍລິການຊຳລະເງິນຂອງອາລີບາບາ ເປີດຕົວລະບົບທີ່ໃຊ້ລະຫັດ QR ທີ່ເປັນສີສະແດງເຖິງສຸຂະພາບຂອງຜູ້ຄົນໃນເມືອງຫາງໂຈວ ໂດຍຜູ້ໃຊ້ສາມາດໃຊ້ແອັບນີ້ລາຍງານໝາຍເລກປະຈຳຕົວທີ່ເປັນທາງການ ແລະ ຄົ້ນຫາຂໍ້ມູນ
ຜູ້ໃຊ້ທຸກຄົນຈະຕ້ອງໃຫ້ຂໍ້ມູນເລື່ອງການເດີນທາງນອກເມືອງຄັ້ງຫຼ້າສຸດ ລວມເຖິງໃຫ້ຂໍ້ມູນຫາກມີອາການຂອງພະຍາດໄຂ້ຫວັດໃຫຍ່ ເຊັ່ນ ຕົວຮ້ອນ ຫຼື ມີອາການໄອຮຸນແຮງ ຫຼັງຈາກທີ່ຕອບແບບສອບຖາມສຳເລັດແລ້ວ ຜູ້ໃຊ້ຈະໄດ້ຮັບຂໍ້ຄວາມທາງໂທລະສັບມືຖືທີ່ມີລະຫັດ QR ທີ່ໃຊ້ສີໃນການລະບຸສະພາບຮ່າງກາຍຕາມທີ່ຕອບແບບສອບຖາມໄປ.
ຜູ້ໃຊ້ທີ່ມີລະຫັດສີແດງ ຈະຖືກບອກໃຫ້ກັກບໍລິເວນຕົວເອງເປັນເວລາ 14 ວັນ ແລະ ລາຍງານສະພາບຂອງຕົນຢ່າງຕໍ່ເນື່ອງ ໂດຍໃຊ້ແອັບສົ່ງຂໍ້ຄວາມ DingTalk ຂອງອາລີບາບາ ສ່ວນຜູ້ໃຊ້ທີ່ມີລະຫັດສີເຫຼືອງ ຈະຖືກບອກໃຫ້ແຍກຕົວເອງເປັນເວລາ 7 ວັນ ໃນຂະນະທີ່ຜູ້ທີ່ມີລະຫັດສີຂຽວ ສາມາດເດີນທາງໄດ້ຢ່າງອິດສະຫຼະ.
ສື່ຂອງລັດຖະບານຈີນກ່າວວ່າ ລະບົບຂອງອາລີບາບານີ້ ຈະຖືກຕິດຕັ້ງຕາມສະຖານີລົດໄຟຖະໜົນສາຍຫຼັກ ແລະ ຈຸດກວດສອບການເດີນທາງອື່ນໆດ້ວຍ ແລະ ລັດຖະບານຈີນ ກຳລັງເລັ່ງເຮັດວຽກເພື່ອຂະຫຍາຍລະບົບນີ້ໄປທົ່ວປະເທດ.
ສ່ວນ Tencent ຊຶ່ງເປັນຜູ້ດຳເນີນງານ WeChat ແອັບສົ່ງຂໍ້ຄວາມຍອດນິຍົມຂອງຈີນ ໄດ້ເປີດຕົວລະບົບຕິດຕາມດ້ວຍລະຫັດ QR ທີ່ຄ້າຍຄືກັນນີ້ ໂດຍໄດ້ຮັບຄວາມຊ່ວຍເຫຼືອຈາກສະພາພັດທະນາ ແລະ ປະຕິຮູບແຫ່ງຊາດຂອງຈີນ (China’s National Development and Reform Council).
ປັດຈຸບັນນີ້ ມີລະບົບນີ້ໃຊ້ກັນແລ້ວທີ່ເມືອງເສິນເຈິ້ນ ແລະ ຄາດວ່າຈະນຳໄປໃຊ້ໃນສ່ວນອື່ນໆຂອງມົນທົນກວາງຕຸ້ງໄວໆນີ້.
ອີກໜຶ່ງໃນແອັບພລິເຄຊັ່ນທີ່ພັດທະນາໂດຍ WeChat ໃຊ້ໃນການລະບຸສະຖານທີ່ໃນເມືອງເສິນເຈິ້ນ ແລະ ກວາງໂຈວ ຊຶ່ງມີການຢືນຢັນວ່າພົບຜູ້ຕິດເຊື້ອໂຄໂຣນາໄວຣັສ ຜູ້ໃຊ້ແອັບພລິເຄຊັ່ນຄົນໜຶ່ງບອກວ່າ ແຜນທີ່ດັ່ງກ່າວຊ່ວຍໃຫ້ສະບາຍໃຈ ເພາະຢ່າງໜ້ອຍກໍສາມາດຊ່ວຍໃຫ້ຫຼີກລ່ຽງພື້ນທີ່ທີ່ມີການແຜ່ລະບາດໄດ້.