ປັດຈຸບັນ ມີຫຼາຍສຳນັກງານອົງການຂອງລັດ ຂອງເອກະຊົນ ລວມໄປເຖິງສະຖາບັນການສຶກສາຕ່າງໆ ກໍໄດ້ເອົາໃຈໃສ່ເຂັ້ມງວດ ແລະ ມີມາດຕະການປ້ອງກັນການລະບາດຂອງພະຍາດເຊື້ອຈຸລະໂຣກສາຍພັນໃໝ່ ຫຼື COVID-19 ແລະ ຫຼ້າສຸດວັນທີ 16 ມີນາ 2020 ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຖະແຫຼງຂ່າວອອກມາວ່າເລີ່ມແຕ່ວັນທີ 17 ມີນາ 2020 ເປັນຕົ້ນໄປ ໃຫ້ຢຸດການຮຽນ-ການສອນຊົ່ວຄາວຂອງໂຮງຮຽນຊັ້ນອະນຸບານ ແລະ ລ້ຽງເດັກທົ່ວປະເທດ ທີ່ສະແດງໃຫ້ເຫັນເຖິງຄວາມເອົາໃຈໃສ່ຂອງລັດຖະບານລາວທີ່ມີຕໍ່ປະຊາຊົນ ໃນນັ້ນກໍມີສະຖາບັນການສຶກສາ ມະຫາວິທະຍາໄລຊູໂຈລາວ ທີ່ມີສຳນັກງານຕັ້ງຢູ່ບ້ານໂພນທັນ ເມືອງໄຊເສດຖາ ນະຄອນຫຼວງວຽງຈັນ ທີ່ໄດ້ມີແຈ້ງການກ່ຽວກັບມາດຕະການປ້ອງກັນ ແລະ ຄວບຄຸມພະຍາດ COVID-19 ຢູ່ພາຍໃນຂອງຕົນນັບແຕ່ວັນທີ 12 ມີນາ 2020 ເປັນຕົ້ນມາ.
ທ່ານ ຮວງຊີງ ຮອງອະທິການບໍດີມະຫາວິທະຍາໄລຊູໂຈລາວ (ມຊລ) ໃຫ້ສຳພາດວັນທີ 16 ມີນາ 2020 ວ່າ: ມຊລ ໄດ້ມີແຈ້ງການກ່ຽວກັບມາດຕະການປ້ອງກັນ ແລະ ຄວບຄຸມພະຍາດ COVID-19 ຢູ່ພາຍໃນຂອງຕົນນັບແຕ່ວັນທີ 12 ມີນາ 2020 ເປັນຕົ້ນມາ ໂດຍໄດ້ເລີ່ມຮຽນພາກຮຽນ 2 ສົກສຶກສາ 2019-2020 ພາກວັນເສົາ-ວັນອາທິດ ເລີ່ມແຕ່ວັນທີ 14 ມີນາເປັນຕົ້ນມາ ແລະ ພາກປົກກະຕິເລີ່ມວັນທີ 16 ມີນາ 2020 ມີນັກສຶກສາປະລິນຍາຕີປີ 1 ທີ່ຮຽນຢູ່ ລາວທັງໝົດ 30 ຄົນ ນອກນີ້ຍັງມີນັກສຶກສາຮຽນບຳລຸງ 90 ຄົນ ສ່ວນນັກສຶກສາປີ 2 ຂຶ້ນໄປ ແມ່ນໄປຮຽນຢູ່ຈີນ (ຢູ່ຊູໂຈ) ແລະ ຢູ່ພາຍໃນ ມຊລ ມີອາຈານຄົນລາວ ແລະ ຄົນຈີນ ປັດຈຸບັນໄດ້ມີອາຈານຈີນທີ່ໄປຢາມບ້ານຢູ່ປະເທດຈີນໃນໄລຍະບຸປີໃໝ່ຈີນ (ກຸດຈີນ) ຍັງກັບມາປະເທດລາວບໍ່ທັນໄດ້ 15 ຄົນ ແລະ ຜູ້ທີ່ກັບມາກໍໄດ້ມີການຕິດຕາມເປັນຢ່າງດີ ຖ້າບໍ່ຈຳເປັນແມ່ນບໍ່ໃຫ້ອອກໄປໃສ ນອກຈາກມີວຽກສ່ວນຕົວທີ່ຈຳເປັນ ເປັນຕົ້ນອອກໄປຕັດຜົມ ແລະ ໄປຊື້ເຄື່ອງກິນເຄື່ອງໃຊ້ ເທົ່ານັ້ນ.
ສ່ວນຢູ່ຫໍພັກ ເວລາຮັບປະທານອາຫານເມື່ອກ່ອນກິນຮ່ວມກັນຫຼາຍຄົນ ແຕ່ປັດຈຸບັນໄດ້ແຍກອອກກິນໃຜກິນມັນ ນັກສຶກສາກໍບໍ່ໃຫ້ນັ່ງໂຕະດຽວກັນ 2-3 ຄົນ ຈະແຍກນັ່ງຄົນລະໂຕະ ຢູ່ຫ່າງກັນລະຫວ່າງນັກສຶກສາກັບຄູສອນ ມີການອະນາໄມເຮັດຄວາມສະອາດຂ້າເຊື້ອຫ້ອງຮຽນກ່ອນເຂົ້າຫ້ອງ ແລະ ເລີກຮຽນເປັນປະຈຳ ອະນາໄມຫ້ອງການ ແລະ ສະຖານທີ່ຕ່າງໆພາຍໃນສຳນັກງານ ມີນ້ຳຢາລ້າງມື ແລະ ຜ້າປິດປາກດັງໃຫ້ພະນັກງານ ຈະມີການກວດຄົນເຂົ້າ ແຕ່ປັດຈຸບັນ ກຳລັງຊື້ເຄື່ອງກວດຢູ່ຈີນເຂົ້າມາ ເວລານັກສຶກສາມາສຳພາດ ແລະ ລົງທະບຽນຮຽນຕ້ອງໃຫ້ເຂົ້າເທື່ອລະຄົນ ຄູອາຈານທັງ ຄົນລາວທີ່ເດີນທາງມາມາສອນ ບໍ່ໃຫ້ຂີ່ລົດສາທາລະນະ ໃຫ້ຂັບຂີ່ລົດຕົນເອງມາ ພ້ອມທັງແນະນຳບໍ່ໃຫ້ໄປເຂດທີ່ມີຊຸມຊົນ ແລະ ອື່ນໆຕາມແຈ້ງການຂອງລັດຖະບານລາວ ໂດຍໄດ້ເອົາໃຈໃສ່ເນັ້ນໃຫ້ຄວາມຮູ້ຄູອາຈານ ແລະ ນັກສຶກສາຕໍ່ກັບໄພ ອັນຕະລາຍ ມາດຕະການ ແລະ ການລະບາດຂອງພະຍາດ COVID-19.
ພ້ອມນີ້ ມຊລ ຍັງໄດ້ສ້າງຄູ່ມືແນະນຳ ວິທີປ້ອງກັນ ແລະ ຄວບຄຸມພະຍາດ COVID-19 ທີ່ມີເນື້ອໃນເປັນພາສາ ລາວ ພາສາອັງກິດ ແລະ ພາສາຈີນ ພ້ອມປະກອບຮູບພາບທີ່ເຂົ້າໃຈງ່າຍເພື່ອແຈກຢາຍໃຫ້ທຸກຄົນຕື່ມອີກ ໂດຍລວມ ແລ້ວ ຄະນະບໍດີ ມຊລ ໄດ້ມີຄວາມເອົາໃຈໃສ່ເປັນຢ່າງສູງໃນການປ້ອງກັນ ແລະ ຄວບຄຸມພະບາດ COVID-19 ທີ່ປະເທດລາວມີຄວາມສ່ຽງສູງ ເນື່ອງຈາກປັດຈຸບັນມີຫຼາຍປະເທດໄດ້ຕິດເຊື້ອພະຍາດນີ້ແລ້ວ ໃນນັ້ນກໍມີຫຼາຍປະເທດ ຢູ່ໃກ້ຄຽງປະເທດລາວ ດັ່ງນັ້ນ ມຊລ ຈຶ່ງໄດ້ເຂັ້ມງວດການປ້ອງກັນຢູ່ສະຖາບັນການສຶກສາຂອງຕົນເອງປັນຢ່າງດີ ແລະ ເປັນການປະກອບສ່ວນຊ່ວຍສັງຄົມລາວຕື່ມອີກ.