ເພື່ອສ້າງຂະບວນການປູກຈິດສຳນຶກປູກຕົ້ນໄມ້ ແລະ ປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມໃຫ້ມີບັນຍາກາດຟົດຟື້ນ ເຫັນໄດ້ຄວາມໝາຍຄວາມສຳຄັນຂອງວັນປູກຕົ້ນໄມ້ແຫ່ງຊາດ 1 ມິຖຸນາ 2020 ວັນສິ່ງແວດລ້ອມແຫ່ງຊາດ ຄົບຮອບ 21 ປີ ກໍຄືວັນສິ່ງແວດລ້ອມໂລກ 5 ມິຖຸນາ ຄົບຮອບ 48 ປີ ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ສຳພາດຕໍ່ສື່ມວນຊົນວັນທີ 5 ມິຖຸນາ 2020 ວ່າ: ຕໍ່ກັບວຽກງານດັ່ງກ່າວນີ້ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ສຳເລັດການສ້າງແຜນແມ່ບົດຈັດສັນທີ່ດິນແຫ່ງຊາດ ໃນນັ້ນ ໄດ້ກຳນົດຮັກສາເຂດເນື້ອທີ່ຂອງການປົກຫຸ້ມປ່າໄມ້ໃນທົ່ວປະເທດ ໃຫ້ໄດ້ 70% ນີ້ແມ່ນໄດ້ກຳນົດໃນມະຕິ 26 ຂອງຄະນະບໍລິຫານງານສູນກາງພັກກ່ຽວກັບວຽກງານທີ່ດິນ ແລະ ໃນກົດໝາຍທີ່ດິນ ທີ່ປະກາດໃຊ້ແລ້ວກໍໄດ້ກຳນົດໄວ້ເຊັ່ນດຽວກັນ ສະນັ້ນ ທຸກໂຄງການພັດທະນາເສດຖະກິດ-ສັງຄົມ ຈະຕ້ອງອີງໃສ່ແຜນຈັດສັນທີ່ດິນແຫ່ງຊາດ ແລະ ຢູ່ໃນແຜນພັດທະນາເສດຖະກິດ-ສັງຄົມ ກໍຕ້ອງໄດ້ມີແຜນການນຳໃຊ້ທີ່ດິນໃນທຸກຂະແໜງການ.
ປັດຈຸບັນ ການປ່ຽນແປງສະພາບດິນຟ້າອາກາດ ມັນມີຜົນກະທົບອັນຮ້າຍແຮງຕໍ່ຊີວິດ ແລະ ຊັບສິນຂອງປະຊາຊົນ ສະນັ້ນ ກະຊວງໄດ້ເອົາໃຈໃສ່ປັບປຸງວຽກງານອຸຕຸນິຍົມ-ອຸທົກກະສາດ ໃຫ້ມີຄວາມຊັດເຈນຂຶ້ນກວ່າເກົ່າ ສາມາດປະເມີນສະພາບອາກາດໄດ້ລ່ວງໜ້າກ່ອນ 10 ວັນ ພ້ອມກັນນັ້ນ ອີກວຽກໜຶ່ງທີ່ກະຊວງຕ້ອງໄດ້ດຳເນີນການສ້າງປະເທດລາວໃຫ້ເປັນປະເທດ ສີຂຽວ ສະອາດ ງາມຕາ ໃນນີ້ໄດ້ລົງເລິກກັບໂຮງຮຽນ ສຳນັກງານ-ອົງການຈັດຕັ້ງຕ່າງໆ ນອກນີ້ ກະຊວງໄດ້ຕິດຕາມກວດກາຄຸນນະພາບຂອງອາກາດ ໂດຍສະເພາະຄ່າ PM 2,5 ຄຽງຄູ່ກັນນັ້ນ ກະຊວງຍັງໄດ້ພະຍາຍາມສ້າງຄວາມເຂັ້ມແຂງໃຫ້ສາຍຕັ້ງຂອງຕົນຢູ່ບັນດາແຂວງ ແລະ ເມືອງ ໂດຍໄດ້ມອບສິດງົບປະມານ ແລະ ອຸປະກອນເຄື່ອງມືວັດແທກ ເພື່ອໃຫ້ດຳເນີນວຽກງານຂອງຕົນຕາມສາຍຕັ້ງຢ່າງສະດວກ.
ສຳລັບແຜນການຕໍ່ໜ້າ ກະຊວງຈະຂຶ້ນແຜນຈັດສັນທີ່ດິນ ແລະ ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ ໃນບັນດາແຂວງໃຫ້ສຳເລັດ ຂຶ້ນແຜນຮັບມືກັບຄວາມບອບບາງທາງດ້ານໄພທຳມະຊາດໃນແຂວງທົ່ວປະເທດ ເພື່ອຮັບມືກັບໄພພິບັດທີ່ອາດຈະເກີດໃນອະນາຄົດ ແລະ ອື່ນໆ.