ໃນໄລຍະຜ່ານມາ ຫຼາຍທ່ານກໍຄົງໄດ້ຍິນຂ່າວກ່ຽວກັບລົດຕຳສັດ (ຕຳງົວ ໝາ ແມວ ແລະ ອື່ນໆ) ຫຼື ປະສົບພົບພໍ້ດ້ວຍຕົນເອງ ທີ່ບາງກໍລະນີກໍໄດ້ຮັບບາດເຈັບ ພາຫະນະເປ່ເພ ສັດທີ່ຖືກຕຳຕາຍ ແລະ ບັນຫາທີ່ຕາມມານັ້ນ ບໍ່ມີໃຜອອກມາສະແດງໂຕເປັນເຈົ້າຂອງສັດ ກໍຄື ບໍ່ຢາກຮັບຜິດຊອບກັບອຸບັດເຫດທີ່ເກີດຂຶ້ນ ສ່ວນຜູ້ຕຳ ບາງກໍລະນີເສຍທັງຄ່າປິ່ນປົວຕົນເອງ ແລະ ຄ່າສ້ອມແປງລົດ ຫຼື ອາດເວົ້າໄດ້ວ່າ ທັງເໜົ່າທັງເໝັນເລີຍກໍວ່າໄດ້ ໃນຂະນະມີບາງກໍລະນີທີ່ຜູ້ຂັບຂີ່ຕ້ອງໄດ້ເປັນຜູ້ຊົດໃຊ້ຄ່າເສຍຫາຍ ຈາກອຸບັດເຫດທີ່ເກີດຂຶ້ນ.
ດັ່ງນັ້ນ ໃນຄຳລຳຈະລາຈອນ ໜັງສືພິມວຽງຈັນໃໝ່ສະບັບມື້ນີ້ ຈຶ່ງຂໍນຳສະເໜີສຳລັບຜູ້ທີ່ຍັງບໍ່ທັນເຂົ້າໃຈແຈ້ງ ຫຼືຂໍທວນຄືນ ສຳລັບຜູ້ທີ່ຮູ້ຢູ່ແລ້ວ ກ່ຽວກັບລະບຽບການຄຸ້ມຄອງສັດລ້ຽງ ທີ່ລະບຸໃນມາດຕາ 11 ຂອງກົດໝາຍວ່າດ້ວຍການຈະລາຈອນທາງບົກ ເພື່ອເປັນເຈົ້າການໃນການຈັດຕັ້ງປະຕິບັດ ຫຼຸດຜ່ອນການເກີດອຸບັດເຫດລົດຕຳສັດລ້ຽງ.
ໃນມາດຕາດັ່ງກ່າວ ລະບຸລະອຽດວ່າ: ບໍ່ອະນຸຍາດໃຫ້ລ້ຽງ ແລະ ປ່ອຍສັດທຸກຊະນິດຕາມເສັ້ນທາງຫຼວງ ການເຄື່ອນຍ້າຍສັດຕາມເສັ້ນທາງ ຕ້ອງມີຜູ້ຄວບຄຸມ ແລະ ຕ້ອງປະຕິບັດຕາມກົດຈະລາຈອນ.
ໃນກໍລະນີເກີດອຸບັດເຫດຍ້ອນສັດລ້ຽງ ເຈົ້າຂອງ ຫຼືຜູ້ຄອບຄອງສັດ ຕ້ອງຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນ ຕາມທີ່ໄດ້ກຳນົດໄວ້ໃນກົດໝາຍ ວ່າດ້ວຍຂໍ້ຜູ້ພັນໃນສັນຍາ ແລະ ນອກສັນຍາ.
ສຳລັບຢູ່ບ່ອນທີ່ມີການລ້ຽງ ຫຼືຍ້າຍສັດຕາມເສັ້ນທາງຢ່າງເປັນປະຈຳ ຕ້ອງມີປ້າຍເຕືອນໃຫ້ລະວັງສັດ ເພື່ອໃຫ້ຜູ້ຂັບຂີ່ມີຄວາມລະມັດລະວັງ ໃນກໍລະນີເກີດອຸບັດເຫດໃນຂອບເຂດທີ່ມີປ້າຍເຕືອນນັ້ນ ຜູ້ຂັບຂີ່ຕ້ອງຮັບຜິດຊອບຄວາມເສຍຫາຍທີ່ເກີດຂຶ້ນ.
ນອກນັ້ນ ການລ້ຽງສັດ ແລະ ການປ່ອຍສັດລ້ຽງຢູ່ຕາມເສັ້ນທາງ ຍັງຖືກລະບຸໃນມາດຕາ 21 ຂອງດຳລັດ 188/ນຍ ວ່າດ້ວຍຄ່າປັບໃໝ ແລະ ມາດຕະການຕ່າງໆຕໍ່ຜູ້ລະເມີດລະບຽບກົດໝາຍ ກ່ຽວກັບການຈະລາຈອນທາງບົກ ການຂົນສົ່ງທາງບົກ ແລະ ການປົກປັກຮັກສາທາງຫຼວງ ເຊິ່ງໃນມາດຕາດັ່ງກ່າວລະບຸວ່າ: ຫ້າມລ້ຽງ ຫຼືປ່ອຍສັດທຸກຊະນິດຕາມເສັ້ນທາງ ໂດຍສະເພາະໃນເຂດເທສະບານແຂວງ ຫຼືເທສະບານເມືອງ ການເຄື່ອນຍ້າຍສັດຕາມເສັ້ນທາງ ຕ້ອງມີຜູ້ຄວບຄຸມ ແລະ ປະຕິບັດຕາມກົດຈະລາຈອນ.
ເຈົ້າຂອງສັດ ຫຼືຜູ້ຄອບຄອງສັດ ຜູ້ໃດຫາກໄດ້ລະເມີດ ຈະຖືກປັບໃໝ 20.000 ກີບຕໍ່ວັນ ຕໍ່ສັດສີ່ຕີນໜຶ່ງໂຕ ໃນກໍລະນີທີ່ມີສັດລ້ຽງຂາດການຮັກສາ ຫຼື ຖືກປ່ອຍປະຕາມເສັ້ນທາງເຈົ້າໜ້າທີ່ຈະກັກສັດດັ່ງກ່າວໄວ້ ຈົນກວ່າຈະມີເຈົ້າຂອງສັດມາໄຖ່ຖອນເອົາຄືນ ໃນກໍລະນີທີ່ສັດຫາກເປັນຕົ້ນເຫດຂອງການເກີດອຸບັດເຫດ ຫຼືໄດ້ສ້າງຄວາມເສຍຫາຍແກ່ສິ່ງປະກອບຕ່າງໆຂອງເສັ້ນທາງ ເຈົ້າຂອງ ຫຼືຜູ້ຄອບຄອງສັດ ຕ້ອງຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນ.
ຢ່າງໃດກໍຕາມ ເພື່ອບໍ່ໃຫ້ເກີດອຸບັດເຫດຈາກສັດລ້ຽງນັ້ນ ເຈົ້າຂອງ ຫຼືຜູ້ຄອບຄອງສັດ ຕ້ອງໄດ້ເອົາໃຈໃຫ້ສອດຄ່ອງຕາມລະບຽບການສັນຈອນ ສ່ວນຜູ້ຂັບຂີ່ເອງກໍຕ້ອງເປັນເຈົ້າການໃນການປະຕິບັດກົດລະບຽບການສັນຈອນຢ່າງເຂັ້ມງວດ ແລະ ໃຫ້ເພີ່ມຄວາມມີສະຕິໃນການຂັບຂີ່ຕື່ມ ຫຼີກລ່ຽງຜົນເສຍຫາຍທີ່ຈະເກີດຂຶ້ນ.
ໂດຍ: ເມັດຝົນ