ນັບແຕ່ປະເທດຊາດໄດ້ມີການປັບປຸງສ້າງສາພັດທະນາມານີ້ ເພື່ອໃຫ້ມີບັນໜ້າໃໝ່ຢ່າງຈະແຈ້ງນັ້ນ ມີຫຼາຍຢ່າງດີຂຶ້ນຢ່າງຜິດຫູຜິດຕາ ເປັນຕາໜ້າຊົມເຊີຍ ເພາະສິ່ງອຳນວຍຄວາມສະດວກການຕິດຕໍ່ສື່ສານ ການຄົມມະນາຄົມ ຕະຫຼອດແສງສະຫວ່າງກໍເຫັນວ່າ ພິກໂສມໜ້າໃໝ່ ໃຫ້ມາສູ່ “ຄວາມຈົບເຈືອ” ໝາຍວ່າໂຄງລ່າງພື້ນຖານຈຳນວນໜຶ່ງພໍໄດ້. ບາງຢ່າງກໍຄ້າຍໆຄືບ້ານເພິ່ນເມືອງທ່ານ ແຕ່ກໍຍັງມີບາງຢ່າງຍັງມີລັກສະນະ ມະຍຸມະຍະ ຂີນຫູຂີນຕາ ກ້າວໄປເຖິງອາດເປັນໄພອັນຕະລາຍຍ້ອນ….
ຕາມຖະໜົນທີ່ບໍ່ແມ່ນສາຍຫຼັກ ຕາມຮ່ອມ ຫຼືຊອຍຕາມຄຸ້ມບ້ານ ຫຼືແມ່ນກະທັ້ງຖະໜົນໃຫຍ່ບາງແຫ່ງກໍຍັງເຫັນ ນັ້ນແມ່ນ: ບັນດາສາຍໂທລະສັບ ສາຍເຄເບິນ ສາຍໄຟຟ້າທີ່ພົວພັນເຈືອລະເນືອກັນຢູ່ ບາງມື້ກໍເຫັນເຮ່ຍຊະເປັນສາຍຍາວ ບາງກໍຂາດເປັນຍ່ານ ພໍລົດສູງມາເກາະເອົາຂາດກໍຫຼາຍ ຜູ້ຄົນທີ່ອາໄສການຕິດຕໍ່ພົວພັນຈາກບໍລິການຂອງສາຍດັ່ງກ່າວ ຫາວ່າຈະສະດວກນັ້ນບໍ່ມີເລີຍ ບັນຫາເກີດມີເລື້ອຍ ຕ້ອງໃຊ້ມືຖືໂທຫາເຄືອຂ່າຍມາສ້ອມແປງເລື້ອຍໆ.
ສຳຄັນເວລາໜ້າລົມໜ້າຝົນຈັ່ງຊີ້ ອາດຈະມີພາຍຸຕ່າງໆພັດລົມມາແຮງ ຟ້າຝົນຊົນລະທາຕົກລົງມາຖືກ ກໍເຮັດໃຫ້ບັນດາສາຍຮັບນ້ຳໜັກຈົນໂຢດລົງມາຕ່ຳເຖິງຫຼັງຄາລົດ ຄວາມອັນຕະລາຍຄືຢ້ານມີສາຍໄຟຟ້າປະປົນລົງມາ ເຮັດໃຫ້ຜູ້ຄົນໄດ້ຮັບອັນຕະລາຍຍ້ອນ ເພາະບັນດາສາຍເຫຼົ່ານັ້ນແມ່ນເກາະຫ້ອຍອາໄສອານິສົງຂອງເສົາໄຟຟ້າທັງມວນ ແມ່ນແທ້ຖ້າຈະເອົາສາຍອື່ນໆຕິດພັນຕ້ອງເຮັດເສົາໃຫຍ່ໆ (ຕົກລົງກັນເອງ) ແລະ ເສົາໄຟຟ້າໃນຮ່ອມໃນຊອຍບໍ່ໄດ້ໃຫຍ່ພໍປານໃດ ບາງເສົາກໍອາວຸໂສເຊ້ວງ່ຽງຄືຊິລົ້ມ ແຕ່ຄາບັນດາສາຍຄຶງໄວ້ເລີຍຢູ່ໄປວັນໆ.
ດັ່ງນັ້ນ ມາຮອດໄລຍະນີ້ຄືໜ້າຝົນ ພໍ່ແມ່ປະຊາຊົນກໍມີຄວາມກັງວົນຢ້ານຍາມຄ່ຳຄືນ ໄພອັນຕະລາຍຈາກສາຍມະຍຸມະຍະດັ່ງກ່າວ ຈຶ່ງສະເໜີຜ່ານມາທາງໜັງສືພິມ ເຖິງພາກສ່ວນກ່ຽວຂ້ອງດັ່ງນີ້:
1. ໃຫ້ຕິດຕາມກວດກາເບິ່ງສຸຂະພາບສາຍບໍລິການ ແລະ ເສົາຂອງຕົນເປັນປະຈຳ.
2. ຈັດໃຫ້ເຂົ້າລະບຽບ ແນມເບິ່ງແລ້ວໝັ້ນໃຈບໍ່ເປັນຕາຢ້ານ (ໂດຍສະເພາະ ຈຸດສາຍຂ້າມທາງ).
3. ປ່ຽນເສົາທີ່ມີທ່າອ່ຽງຈະລົ້ມ.
4. ຕັດກົກໄມ້ອອກຈາກແລວສາຍໄຟ ສາຍບໍລິການທີ່ຄຶງຢູ່ອອກ.
ດັ່ງນັ້ນ ຂໍໃຫ້ພາກສ່ວນຂ້ອງ ຮີບຮ້ອນແກ້ໄຂກ່ອນມັນຈະເກີດອັນຕະລາຍ ຈາກປາກົດການສາຍມະຍຸມະຍະດັ່ງກ່າວ.
ໂດຍ: ຊຽງເອງ