ໂຮງຮຽນມັດທະຍົມສົມບູນ ສຸກສະຫວັດ ມີຄວາມພ້ອມທຸກດ້ານ ໃນການເປີດການຮຽນ-ການສອນຄືນໃໝ່ທຸກຊັ້ນຮຽນ ພ້ອມວາງມາດຕະການປ້ອງກັນການຕິດເຊື້ອໂຄວິດ-19 ຢ່າງເຄັ່ງຄັດ ເປັນຕົ້ນ ໄດ້ງົດບາງກິດຈະກຳທີ່ເປັນການໂຮມຊຸມນຸມເຊັ່ນ: ການເຄົາລົບທຸງຊາດ ການຫຼິ້ນກີລາ ການອະນາໄມລວມ ແລະ ອື່ນໆ ພ້ອມດຽວກັນນັ້ນ ໂຮງຮຽນຍັງໄດ້ວາງມາດຕະການຮັກສາໄລຍະຫ່າງ 1 ແມັດຂຶ້ນໄປ.
ທ່ານ ບຸນຈັນ ສີດວງໄຊ ຜູ້ອຳນວຍການໂຮງຮຽນມັດທະຍົມສົມບູນສຸກສະຫວັດ ໄດ້ລາຍງານໃຫ້ຮູ້ວັນທີ 2 ມິຖຸນາ 2020 ວ່າ: ໃນໄລຍະເປີດການຮຽນ-ການສອນຄືນໃໝ່ນີ້ ໂຮງຮຽນໄດ້ມີຄວາມພ້ອມໃນທຸກດ້ານ ບໍ່ວ່າຈະເປັນຄູ-ອາຈານ ຫ້ອງຮຽນ ກໍມີຄວາມພຽງພໍ ແລະ ໄດ້ວາງມາດຕະການຕ່າງໆ ເພື່ອປ້ອງກັນການຕິດເຊື້ອຂອງພະຍາດນີ້ ໂດຍໄດ້ແນະນຳໃຫ້ນັກຮຽນທຸກຄົນ ຕ້ອງໃສ່ຜ້າອັດປາກ-ດັງ ລ້າງມື້ໃສ່ສະບູ ຫຼື ເຈວລ້າງມື ພ້ອມນັ້ນ ຍັງໄດ້ມີຈຸດວັດແທກອຸນຫະພູມ ຈຸດລ້າງມື ແລະ ອະນາໄມ ອ້ອມຮອບບໍລິເວນໂຮງຮຽນເປັນປະຈຳ ສຳລັບມາດຕະການຮັກສາໄລຍະຫ່າງໂຮງຮຽນ ໄດ້ຈັດແບ່ງໃຫ້ນັກຮຽນນັ່ງໂຕະລະຄົນ ຫ້ອງ 1 ບໍ່ໃຫ້ເກີນ 27 ຄົນ.
ທ່ານ ບຸນຈັນ ສີດວງໄຊ ຍັງໃຫ້ຮູ້ຕື່ມວ່າ: ມື້ທຳອິດໃນການເປີດການຮຽນ-ການສອນຄືນໃໝ່ ໂຮງຮຽນໄດ້ປະຕິບັດຕາມແຈ້ງການຂອງກະຊວງສຶກສາທິການ ແລະ ກີລາ ກໍຄືຄະນະສະເພາະກິດວາງອອກຢ່າງຈິງຈັງ ດ້ວຍສະເພາະມາດຕະການປ້ອງກັນການຕິດເຊື້ອໂຄວິດ-19 ເຊິ່ງເຫັນໄດ້ວ່າ ບັນດານັກຮຽນໄດ້ໃຫ້ການຮ່ວມມືເປັນຢ່າງດີ ໂດຍໄດ້ໃສ່ຜ້າອັດປາກ-ອັດດັງ ບໍ່ຊຸມນຸມກັນເປັນກຸ່ມເປັນກ້ອນ ພ້ອມດຽວກັນນັ້ນ ໂຮງຮຽນຍັງໄດ້ຕິດປ້າຍໂຄສະນາເຜີຍແຜ່ ກ່ຽວກັບການປ້ອງກັນການຕິດເຊື້ອພະຍາດດັ່ງກ່າວ ຢູ່ຕາມອາຄານແຕ່ລະຫ້ອງອ້ອມຮອບບໍລິເວນໂຮງຮຽນ.