ໃນບັນຍາກາດວັນປູກຕົ້ນໄມ້ແຫ່ງຊາດປີນີ້ ຜູ້ຂຽນຂໍສັນຫາມາເລົ່າກ່ຽວກັບບັນຫາໄຟປ່າທີ່ເກີດຂຶ້ນ ຍ້ອນສະພາບດິນຟ້າອາກາດມີການປ່ຽນແປງ ແຕ່ຈະຂໍເນັ້ນເລື່ອງການຈູດປ່າ ຊຶ່ງເປັນການກະທຳຂອງຄົນເຮົາເອງ ຢູ່ບາງປະເທດ ຊຶ່ງນອກຈາກໄດ້ສ້າງຄວາມເສຍຫາຍອັນມະຫາສານທາງດ້ານເສດຖະກິດ ຊີວິດຄົນແລ້ວ ຍັງໄດ້ກໍ່ໃຫ້ເກີດຄວັນພິດປິວຂ້າມຊາດ ກາຍເປັນມົນລະພິດສາກົນໄປໃນຕົວ.
ຂ່າວໄຟປ່າທີ່ເປັນຂ່າວໃຫຍ່ດັງໄກໄປທົ່ວໂລກຢູ່ເລື້ອຍໆນັ້ນ ມັກເກີດຂຶ້ນຢູ່ສະຫະລັດອາເມຣິກາ ໂດຍສະເພາະແມ່ນຢູ່ລັດກາລີຟໍເນຍ ສ່ວນໄຟປ່າຢູ່ປະເທດອົດສະຕຣາລີນັ້ນ ກໍໄດ້ກາຍເປັນເຫດການລຶ້ງຜຽກຄືເກີດຂຶ້ນທຸກໆປີ.
ຢູ່ອາຊຽນພວກເຮົານີ້ ອິນໂດເນເຊຍ ໄດ້ຮັບຜົນເສຍຫາຍຢ່າງໜັກໜ່ວງຈາກໄຟປ່າທີ່ເກີດຂຶ້ນ ຍ້ອນການຈູດປ່າເພື່ອສັບສ່າວເນື້ອທີ່ດິນອຸດສາຫະກຳ ສຳລັບປູກຕົ້ນປາມ ເພື່ອສະກັດເອົານ້ຳມັນ ແລະ ການປູກຕົ້ນໄມ້ ສຳລັບຜະລິດເຈ້ຍອຸດສາຫະກຳ ຜະລິດນ້ຳມັນປາມ ແລະ ໄຍເຈ້ຍນີ້ ສ່ວນໃຫຍ່ແມ່ນການລົງທຶນຂອງນັກທຸລະກິດຕ່າງປະເທດ ວ່າກັນວ່າ ນັກລົງທຶນຕ່າງປະເທດຈຳນວນບໍ່ໜ້ອຍ ທີ່ຫົວໃສໃຈຄົດ ໃຊ້ເລ່ລ່ຽມຊື້ຈ້າງຄົນທ້ອງຖິ່ນ ໃຫ້ຕັດຕົ້ນໄມ້ແລ້ວໃຊ້ໄຟຈູດ ຊຶ່ງເປັນວິທີງ່າຍໆ ບໍ່ໄດ້ໃຊ້ຈ່າຍແພງ ສ່ວນກົດໝາຍສິ່ງແວດລ້ອມ ສະບັບເກົ່າຂອງອິນໂດເນເຊຍ ເອງ ກໍມີຊ່ອງຫວ່າງ ຄືໄດ້ອະນຸຍາດໃຫ້ຊາວກະສິກອນທ້ອງຖິ່ນ ທີ່ມີເນື້ອທີ່ດິນຂອງຕົນບໍ່ເກີນ 2 ເຮັກຕາ ສາມາດໃຊ້ໄຟຈູດເວລາສັບສ່າວທີ່ດິນ ເພື່ອປູກຝັງ ແຕ່ຕ້ອງມີວິທີປ້ອງກັນບໍ່ໃຫ້ໄຟລາມໄປນອກເຂດດິນຂອງຕົນ ຕາມຂ່າວຫຼັງໆມານີ້ໃຫ້ຮູ້ວ່າ ການອະນຸຍາດດັ່ງກ່າວໄດ້ຖືກຍົກເລີກແລ້ວ ສ່ວນສິງກະໂປ ແລະ ມາເລເຊຍ ຊຶ່ງໄດ້ຮັບຜົນຮ້າຍຈາກຄວັນໄຟປ່າ ທີ່ປິວໄປຈາກອິນໂດເນເຊຍນັ້ນ ກໍໄດ້ເອົາມາດຕະການເດັດຂາດຕໍ່ບັນດາບໍລິສັດຂອງພວກຕົນ ທີ່ໄປລົງທຶນປູກຕົ້ນປາມ ແລະ ຕົ້ນໄຍເຈ້ຍ ຢູ່ອິນໂດເນເຊຍ ເພື່ອບໍ່ໃຫ້ມີສ່ວນໃນການຈູດປ່າ ພ້ອມດຽວກັນໄດ້ປຸກລະດົມທົ່ວປວງຊົນ ບໍ່ໃຫ້ຊື້ຜະລິດຕະພັນຂອງບັນດາບໍລິສັດທີ່ມີສ່ວນໃນການຈູດປ່າ ສຳລັບ ຢູ່ອິນໂດເນເຊຍ ເອງ ທາງການກໍໄດ້ເລີ່ມໃຊ້ໄມ້ຕາຍກັບບໍລິສັດທັງພາຍໃນ ແລະ ຕ່າງປະເທດທີ່ໃຊ້ໄຟຈູດປ່າ ເພື່ອສັບສ່າວເນື້ອທີ່ດິນ ດັ່ງຂ່າວໜັງສືພິມວຽງຈັນທາມ ສະບັບວັນທີ 24 ທັນວາ 2015 ໄດ້ໃຫ້ຮູ້ວ່າ ທາງການອິນໂດເນເຊຍ ໄດ້ເລີ່ມລົງໂທດ 23 ບໍລິສັດ ທີ່ເປັນຫົວໂປ່ໂຕການຈູດປ່າໃນເກາະຊູມາຕຼາ ແລະ ບອກນຽວ ທີ່ກໍ່ໃຫ້ເກີດຄວັນພິດປິວໄປປົກຄຸມຫຼາຍປະເທດຢູ່ອ້ອມແອ້ມ ການລົງໂທດປະກອບດ້ວຍຮູບການປັບໃໝ ແລະ ອື່ນໆ ໃນນັ້ນ 3 ບໍລິສັດຖືກຫ້າມດຳເນີນທຸລະກິດຕະຫຼອດໄປ 16 ບໍລິສັດ ຖືກຖອນໃບອະນຸຍາດ ອີກ 4 ບໍລິສັດ ຖືກຕິດຕາມການເຄື່ອນໄຫວຢ່າງໃກ້ຊິດ.
ບົດຮຽນຈູດປ່າໃນອິນໂດເນເຊຍ ຄວນເປັນຕົວຢ່າງທີ່ດີ ເພື່ອຄຸ້ມຄອງນັກລົງທຶນ ບໍ່ໃຫ້ແຕກປອກອອກທາງ.