ນາຍົກລັດຖະມົນຕີຍີ່ປຸ່ນ ທ່ານ ຊິນໂຊ ອາເບະ ປະກາດໃນວັນຈັນທີ 11 ພຶດສະພາຜ່ານມາວ່າ ຍີ່ປຸ່ນຈະຈັດຕັ້ງໜ່ວຍປ້ອງກັນທາງອະວະກາດ ເພື່ອປົກປ້ອງປະເທດຈາກໄພຄຸກຄາມຕ່າງໆ ໃນໄລຍະເວລາທີ່ປະເທດທີ່ເປັນສັດຕູກັບຍີ່ປຸ່ນ ກຳລັງພັດທະນາຂີປະນາວຸດ ແລະ ເຕັກໂນໂລຊີດ້ານອະວະກາດສະໄໝໃໝ່ກັນຢ່າງຄຶກຄັກ.
“ໜ່ວຍປະຕິບັດການດ້ານອະວະກາດຂອງຍີ່ປຸ່ນ” ຫຼື Space Domain Mission Unit ຈະຢູ່ໃນສັງກັດຂອງກອງກຳລັງປ້ອງກັນຕົນເອງທາງອາກາດ ແລະ ຈະເລີ່ມພາລະກິດຕັ້ງແຕ່ເດືອນເມສານີ້ເປັນຕົ້ນໄປ ໂດຍຈະເຮັດວຽກໃກ້ຊິດກັບກອງບັນຊາການອະວະກາດຂອງສະຫະລັດອາເມຣິກາ ທີ່ປະທານາທິບໍດີ ໂດນັລ ທຣຳ ຫາກໍເປີດຕົວເມື່ອໄວໆນີ້ ແລະ ສຳນັກງານສຳຫຼວດອະວະກາດຂອງຍີ່ປຸ່ນ ຫຼື JAXA ດ້ວຍ.
ລັດຖະບານນະຄອນຫຼວງໂຕກຽວ ຈະຈັດສັນງົບປະມານປະມານ 51.000 ລ້ານເຢນ ຫຼືປະມານ 460 ລ້ານໂດລາສະຫະລັດ ສຳລັບໜ່ວຍງານໃໝ່ນີ້ ໂດຍຂະນະນີ້ ກຳລັງລໍຖ້າການຮັບຮອງຈາກລັດຖະສະພາຍີ່ປຸ່ນ.
ນາຍົກລັດຖະມົນຕີ ຊິນໂຊ ອາເບະ ກ່າວເປີດຕົວໜ່ວຍງານໃໝ່ ລະຫວ່າງການເປີດປະຊຸມລັດຖະສະພາໃນວັນຈັນ ໂດຍບອກວ່າ ພາລະກິດສຳຄັນຂອງໜ່ວຍງານນີ້ ຍັງລວມເຖິງການປ້ອງກັນໄພຄຸກຄາມຈາກໂລກໄຊເບີ ແລະ ຈາກການໃຊ້ຄື່ນແມ່ເຫຼັກໄຟຟ້າລົບກວນດາວທຽມຂອງຍີ່ປຸ່ນທີ່ຢູ່ນອກໂລກ ທ່າມກາງຄວາມກັງວົນວ່າ ຣັດເຊຍ ແລະ ຈີນ ມັກໃຊ້ວິທີດັ່ງກ່າວໃນການສອດແນມ ຫຼືທຳລາຍດາວທຽມຂອງຍີ່ປຸ່ນ.
ສຳລັບຖານບັນຊາການຂອງໜ່ວຍປະຕິບັດການດ້ານອະວະກາດຂອງຍີ່ປຸ່ນ ຈະຕັ້ງຢູ່ທີ່ຖານທັບອາກາດຟູ ຊຸ ຊານ ນະຄອນຫຼວງໂຕກຽວ ໂດຍໃນໄລຍະເລີ່ມຕົ້ນ ຈະມີເຈົ້າໜ້າທີ່ປະຈຳການປະມານ 20 ຄົນ ກ່ອນທີ່ຈະຂະຫຍາຍຈຳນວນເຈົ້າໜ້າທີ່ໃນໄລຍະປີ 2022.