ເພື່ອເປັນການສືບຕໍ່ການສະກັດກັ້ນ, ຄວບຄຸມ ແລະ ປ້ອງກັນເຊື້ອພະຍາດ COVID-19, ບໍ່ໃຫ້ກັບຄືນມາລະບາດອີກເທື່ອໃໝ່ຢູ່ປະເທດເຮົາ. ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການສະບັບເລກທີ 597/ຫສນຍ, ລົງວັນທີ 29 ພຶດສະພາ 2020 ໄປຍັງທຸກກະຊວງ, ອົງການທຽບເທົ່າ, ນະຄອນຫຼວງ ແລະ ບັນດາແຂວງໃນທົ່ວປະເທດ ກ່ຽວກັບການສືບຕໍ່ຈັດຕັ້ງປະຕິບັດ ບັນດາມາດຕະການຜ່ອນຜັນ, ມາດຕະການໃນການປ້ອງກັນ, ຄວບຄຸມ, ສະກັດ ແລະ ແກ້ໄຂ ການລະບາດຂອງພະຍາດ COVID -19 ໃນໄລຍະແຕ່ວັນທີ 2 ມິຖຸນາ ຮອດວັນທີ 30 ມິຖຸນາ 2020.
ເນື້ອໃນຂອງແຈ້ງການເລກທີ 597/ຫສນຍ ໄດ້ຊີ້ອອກວ່າ: ຜ່ານການຈັດຕັ້ງປະຕິບັດມາຕະການຜ່ອນຜັນ ແລະ ມາດຕະການປ້ອງກັນໃນໄລຍະທີ່ຜ່ານມາ, ພວກເຮົາສາມາດຄວບຄຸມການລະບາດຂອງພະຍາດ COVID-19 ໄດ້ໂດຍພື້ນຖານ ຊຶ່ງມາຮອດປັດຈຸບັນນີ້, ສປປ ລາວ ບໍ່ພົບການແຜ່ເຊື້ອໃໝ່ ແລະ ລັດຖະບານກໍໄດ້ຍົກເລີກ ບັນດາມາດຕະການເກືອດຫ້າມທີ່ສຳຄັນຈຳນວນໜຶ່ງ ເພື່ອສ້າງເງື່ອນໄຂໃຫ້ທົ່ວສັງຄົມ ສາມາດກັບຄືນມາດຳເນີນຊີວິດປົກກະຕິພາຍໃຕ້ເງື່ອນໄຂໃໝ່.
ແຕ່, ໃນປັດຈຸບັນ, ສະພາບການລະບາດຂອງເຊື້ອພະຍາດ COVID-19 ຢູ່ໃນພາກພື້ນ ແລະ ໃນໂລກຫຼາຍປະເທດໃນທົ່ວໂລກ ຍັງສືບຕໍ່ເພີ້ມຂຶ້ນຢ່າງຕໍ່ເນື່ອງ ແລະ ຍັງບໍ່ທັນສາມາດຢັບຢັ້ງການລະບາດຂອງພະຍາດດັ່ງ ກ່າວນີ້ໄດ້ ຊຶ່ງສະພາບການດັ່ງກ່າວ, ຫາກປະເທດເຮົາບໍ່ມີມາດຕະການທີ່ເໝາະສົມເພື່ອສືບຕໍ່ຄວບຄຸມ, ສະກັດກັ້ນ ແລະ ປ້ອງກັນການລະບາດຂອງພະຍາດ COVID-19 ແລ້ວ, ປະເທດພວກເຮົາອາດມີຄວາມສ່ຽງທີ່ຈະເກີດການລະບາດຂອງພະຍາດດັ່ງກ່າວໃນຮອບໃໝ່. ດັ່ງນັ້ນ, ພວກເຮົາຈຶ່ງມີຄວາມຈຳເປັນທີ່ຈະຕ້ອງໄດ້ສືບຕໍ່ປະຕິບັດການຜ່ອນຜັນ, ມາດຕາການໃນການປ້ອງກັນ, ຄວບຄຸມ, ສະກັດ ແລະ ແກ້ໄຂການລະບາດຂອງພະຍາດ COVID-19 ຢ່າງເຄັ່ງຄັດ, ເຂັ້ມງວດ.
ແຈ້ງການເລກທີ 597/ຫສນຍ ໄດ້ຊີ້ອອກວ່າ: ໃຫ້ຄະນະສະເພາະກິດ, ອົງການປົກຄອງທ້ອງຖິ່ນທຸກຂັ້ນ ສືບຕໍ່ໂຄສະນາກ່ຽວກັບຄວາມເປັນອັນຕະລາຍ ແລະ ວິທີການ, ມາດຕະການປ້ອງກັນ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ນັບທັງທາງເລິກ ແລະ ທາງກວ້າງໃຫ້ລະອຽດ, ເຂົ້າໃຈງ່າຍ ຢູ່ໃນທົ່ວສັງຄົມໃຫ້ກວ້າງຂວາງ, ເລິກເຊິ່ງ ແລະ ທົ່ວເຖິງ. ພ້ອມດຽວກັນນີ້, ກໍສືບຕໍ່ເອົາໃຈໃສ່ວຽກງານຕອບໂຕ້, ຕີຖອຍຂ່າວລວງ, ຂ່າວອະກຸສົນ ທີ່ຈະສ້າງຄວາມປັ່ນປ່ວນຢູ່ໃນສັງຄົມຢ່າງເຂັ້ມງວດ.
ສືບຕໍ່ປະຕິບັດມາດຕະການຜ່ອນຜັນ ທີ່ໄດ້ກຳນົດໄວ້ຢູ່ໃນແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 580/ຫສນຍ, ລົງວັນທີ15 ພຶດສະພາ 2020 ເພື່ອໃຫ້ມີຜົນກະທົບຕໍ່ເສດຖະກິດ-ສັງຄົມ ໜ້ອຍເທົ່າທີ່ຈະໜ້ອຍໄດ້, ສ້າງເງື່ອນໄຂເພື່ອເຮັດໃຫ້ການດຳເນີນຊີວິດຢູ່ໃນທົ່ວສັງຄົມ ເຂົ້າສູ່ສະພາບປົກກະຕິແບບໃໝ່ເທື່ອລະກ້າວ. ແຕ່, ໃຫ້ສືບຕໍ່ປະຕິບັດມາດຕະການປ້ອງການການຕິດເຊື້ອຈຳນວນໜຶ່ງຄື: ການຮັກສາໄລຍະຫ່າງ 1 ແມັດຂຶ້ນໄປ, ລ້າງມືໃຫ້ສະອາດດ້ວຍສະບູ ຫຼື ເຈວລ້າງມື, ໃສ່ຜ້າອັດປາກ-ອັດດັງ, ແທກອຸນຫະພູມໃຫ້ປົກກະຕິ ແລະ ອະນາໄມສະຖານທີ່ໃຫ້ສະອາດ.
ອະນຸຍາດໃຫ້ໂຮງຮຽນ ແລະ ສະຖາບັນການສຶກສາ ເປີດການຮຽນ-ການສອນຄືນໃນໂຮງລ້ຽງເດັກ, ໂຮງຮຽນອະນຸບານ, ຊັ້ນປະຖົມແຕ່ ປ.1-ປ.5, ມ.1-ມ.3, ມ.5-ມ.6, ປີສຸດທ້າຍຂອງວິທະຍາໄລອາຊີວະສຶກສາ, ວິທະຍາໄລຄູ ແລະ ມະຫາວິທະຍາໄລ. ການຈັດຝຶກອົບຮົມ ແລະ ການຮຽນໄລຍະສັ້ນນັບແຕ່ວັນທີ 2 ມິຖຸນາ 2020 ເປັນຕົ້ນໄປ. ສ່ວນບັນດາຊັ້ນຮຽນທີ່ເຫຼືອ ແມ່ນໃຫ້ເລີ້ມເປີດການຮຽນ-ການສອນຄືນນັບແຕ່ວັນທີ 15 ມິຖຸນາ 2020 ເປັນຕົ້ນໄປ, ໂດຍຮັກສາໄລຍະຫ່າງ 1 ແມັດຂຶ້ນໄປ, ລ້າງມືໃຫ້ສະອາດດ້ວຍສະບູ ຫຼື ເຈວລ້າງມື, ໃສ່ຜ້າອັດປາກ-ອັດດັງ, ແທກອຸນຫະພູມໃຫ້ປົກກະຕິ ແລະ ອະນາໄມສະຖານທີ່ໃຫ້ສະອາດ.
ອະນຸຍາດໃຫ້ຈັດການແຂ່ງຂັນກິລາ (ແຕ່ບໍ່ໃຫ້ມີຜູ້ຊົມ), ເປີດຕະຫຼາດນັດກາງຄືນ, ເປີດຮ້ານກິນດື່ມທີ່ໄດ້ຮັບອະນຸຍາດຢ່າງເປັນທາງການ (ທີ່ບໍ່ແມ່ນຮ້ານເຫຼົ້າ, ເບຍ ແລະ ສິ່ງມຶນເມົາ ເພື່ອຊຸມແຊວ), ເປີດໂຮງສາຍຮູບເງົາ. ພ້ອມດຽວກັນນີ້, ກໍອະຍຸຍາດໃຫ້ບັນດາໂຄງການ, ກິດຈະການ ແລະ ໂຮງງານສາມາດເປີດການດຳເນີນກິດຈະການປົກກະຕິ, ໂດຍຮັກສາໄລຍະຫ່າງ 1 ແມັດຂຶ້ນໄປ, ລ້າງມືໃຫ້ສະອາດດ້ວຍສະບູ ຫຼື ເຈວລ້າງມື, ໃສ່ຜ້າອັດປາກ-ອັດດັງ, ແທກອຸນຫະພູມໃຫ້ປົກກະຕິ ແລະ ອະນາໄມສະຖານທີ່ໃຫ້ສະອາດ.
ໃຫ້ສືບຕໍ່ປະຕິບັດບາງມາດຕະການ ທີ່ໄດ້ກຳນົດໄວ້ຢູ່ໃນແຈ້ງການຂອງນາຍົກລັດຖະມົນຕີ, ສະບັບເລກທີ 06/ນຍ, ລົງວັນທີ 21 ມີນາ 2020 ຢ່າງເຄັ່ງຄັດ, ເຂັ້ມງວດຄື: ສືບຕໍ່ປິດຮ້ານບັນເທິງ, ຮ້ານຄາຣາໂອເກະ ແລະ ກາສິໂນ. ຫ້າມບໍ່ໃຫ້ຈັດກິດຈະກຳຊຸມນຸມທີ່ບໍ່ເປັນທາງການ, ການຊຸມແຊວ, ງານລ້ຽງ, ງານປະເພນີທີ່ບໍ່ສາມາດຮັກສາໄລຍະຫ່າງກັນ 1 ແມັດຂຶ້ນໄປໄດ້, ມີຄວາມສ່ຽງທີ່ຈະຕິດເຊື້ອ, ການແຕ່ງດອງໃຫ້ຖືເອົາການຈົດທະບຽນເປັນເນື້ອໃນຕົ້ນຕໍ ແລະ ກໍອາດຈະຈັດພິທີບາສີສູ່ຂັວນຕາມປະເພນີອັນດີງາມໄດ້, ແຕ່, ຕ້ອງຢູ່ບົນພື້ນຖານປະຕິບັດຈິດໃຈປະຢັດມັດທະຍັດ, ຮັບປະກັນໄລຍະຫ່າງ 1 ແມັດຂຶ້ນໄປ ແລະ ບໍ່ໃຫ້ມີຄວາມສ່ຽງທີ່ຈະຕິດເຊື້ອ.
ສືບຕໍ່ປິດດ່ານປະເພນີ ແລະ ດ່ານທ້ອງຖິ່ນທົ່ວປະເທດ, ຍົກເວັ້ນການເຂົ້າ-ອອກຂອງລົດຂົນສົ່ງສິນຄ້າຢູ່ໃນບາງດ່ານ ທີ່ໄດ້ຮັບອະນຸຍາດຈາກລັດຖະບານ. ສຳລັບດ່ານສາກົນຍັງສືບຕໍ່ປິດການເຂົ້າ-ອອກສຳລັບບຸກຄົນທົ່ວໄປ, ສ່ວນລົດຂົນສົ່ງສິນຄ້າແມ່ນສາມາດເຂົ້າ-ອອກໄດ້ຕາມປົກກະຕິ. ສຳລັບບຸກຄົນທີ່ມີຄວາມຈຳເປັນຮີບດ່ວນ ແລະ ໄດ້ຮັບອະນຸຍາດຈາກຄະນະສະເພາະກິດ ກໍສາມາດເຂົ້າ-ອອກໄດ້.
ສືບຕໍ່ໂຈະການອອກວິຊາທ່ອງທ່ຽວ ແລະ ວິຊາຢ້ຽມຢາມ ສຳລັບບຸກຄົນທີ່ເດີນທາງຜ່ານປະເທດທີ່ມີການລະບາດຂອງພະຍາດ COVID -19. ສຳລັບນັກການທູດ, ພະນັກງານຂອງບັນດາອົງການຈັດຕັ້ງສາກົນ, ຊ່ຽວຊານ, ວິຊາການ ແລະ ແຮງງານຕ່າງປະເທດ ທີ່ມີຄວາມຈຳເປັນຮີບດ່ວນ ກໍສາມາດເຂົ້າມາປະຕິບັດໜ້າທີ່ຢູ່ໃນສະຖານທູດ, ຫ້ອງການ, ບັນດາກິດຈະການ ແລະ ໂຄງການຕ່າງໆ, ແຕ່ຈະຕ້ອງຜ່ານການພິຈາລະນາເຫັນດີຈາກຈາກຄະນະສະເພາະກິດ ຊຶ່ງກະຊວງການຕ່າງປະເທດຈະມີຄຳແນະນຳສະເພາະ.
ແຈ້ງການສະບັບເລກທີ 597/ຫສນຍ, ລົງວັນທີ 29 ພຶດສະພາ 2020 ແມ່ນນິຕິກຳທີ່ສຳຄັນ ທີ່ໄດ້ກຳນົດບັນດາມາຕະການຜ່ອນຜັນ ເພື່ອສືບຕໍ່ການປ້ອງກັນ, ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ໃນໄລຍະແຕ່ວັນທີ 2 ມິຖຸນາ ໄປຈົນຮອດວັນທີ 30 ມິຖຸນາ 2020 ຊຶ່ງມັນຮຽກຮ້ອງໃຫ້ແຕ່ລະກະຊວງ, ອົງການທຽບເທົ່າ, ນະຄອນຫຼວງ, ບັນດາແຂວງ ແລະ ທຸກທ້ອງຖິ່ນໃນທົ່ວປະເທດພ້ອມກັນເຊື່ອມຊຶມ, ກຳແໜ້ນ ແລະ ດຳເນີນການຈັດຕັ້ງປະຕິບັດຢ່າງຖືກຕ້ອງ, ຖັນແຖວພະນັກງານ, ທະຫານ, ຕຳຫຼວດ ແລະ ປະຊາຊົນບັນດາຊັ້ນຄົນ ແລະ ເຜົ່າຕ່າງໆ ມີໜ້າທີ່ເຂົ້າຮ່ວມໃນການຈັດຕັ້ງປະຕິບັດດ້ວຍຄວາມຕືນຕົວ, ເປັນເອກະພາບ, ເປັນເຈົ້າການຢ່າງເຄັ່ງຄັດ ແລະ ເຂັ້ມງວດ ເພື່ອສ້າງທຸກເງື່ອນໄຂ ເພື່ອບໍ່ໃຫ້ພະຍາດ COVID-19 ກັບຄືນມາລະບາດຢູ່ປະເທດເຮົາອີກເທື່ອໃໝ່ໄດ້.