ນະຄອນຫຼວງເຊອຸນ ສ ເກົາຫຼີ ໄດ້ເປັນເຈົ້າພາບຈັດກອງປະຊຸມທາງໄກ ສຸດຍອດເຈົ້າຄອງນະຄອນທົ່ວໂລກ ເພື່ອຕ້ານການແຜ່ລະບາດຂອງເຊື້ອພະຍາດອັກເສບປອດຈາກເຊື້ອຈຸລະໂຣກສາຍພັນໃຫມ່ (COVID-19) ວັນທີ 2 ມິຖຸນາ 2020 ເປັນປະທານຂອງທ່ານ ປາກ ວອນຊຸນ ເຈົ້າຄອງນະຄອນຫຼວງເຊອຸນ ເຊິ່ງນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍພະແນກການຕ່າງປະເທດ ແລະ ພະແນກສາທາລະນະສຸກນະຄອນຫຼວງວຽງຈັນເຂົ້າຮ່ວມ.
ກອງປະຊຸມຄັ້ງນີ້ ບັນດາເຈົ້າຄອງນະຄອນໃນທົ່ວໂລກ ໄດ້ຜັດປ່ຽນກັນລາຍງານສະພາບການແຜ່ລະບາດຂອງເຊື້ອພະຍາດໂຄວິດ-19 ແລະ ມາດຕະການໃນການຄວບຄຸມການແຜ່ລະບາດເຊື້ອພະຍາດດັ່ງກ່າວຢູ່ໃນນະຄອນຂອງຕົນ ເພື່ອແລກປ່ຽນຄວາມຮູ້ຄວາມສາມາດ ອຸປະກອນດ້ານການແພດ ແລະ ແຈກຢາຍຂໍ້ມູນໃຫ້ບັນດານະຄອນທີ່ເຂົ້າຮ່ວມກອງປະຊຸມໄດ້ເຮັດວຽກຮ່ວມກັນ ພ້ອມກັນສ້າງນະວັດຕະກຳຜູ້ຕິດເຊື້ອ ແລະ ຜູ້ໄດ້ຮັບເຊື້ອໃນຂົງເຂດຕ່າງໆ ແນໃສ່ໃຫ້ການຮ່ວມມືສາມັກຄີ ແລະ ຈັບມືກັນໃນທົ່ວໂລກ ສ້າງຄວາມເຂົ້າໃຈທີ່ຈະສາມາດສ້າງສິ່ງຕ່າງໆໃຫ້ສາມາດຈຳກັດການແຜ່ເຊື້ອ ພ້ອມນັ້ນ ເພື່ອຮ່ວມມືກັນວາງມາດຕະການຕອບໂຕ້ພະຍາດໂຄວິດ-19 ໃຫ້ໄດ້ໄວ ແລະ ທັນການໃນໄວໆນີ້ ເນື່ອງຈາກວ່າການແຜ່ເຊື້ອພະຍາດໂຄວິດ-19 ໄດ້ສ້າງຄວາມເສຍຫາຍໃຫ້ແກ່ຫຼາຍປະເທດໃນທົ່ວໂລກ ໂດຍສະເພາະກະທົບຕໍ່ດ້ານເສດຖະກິດ ນອກນັ້ນຍັງເປັນໄພຂົ່ມຂູ່ ສ້າງຄວາມຫຍຸ້ງຍາກໃຫ້ແກ່ການດຳລົງຊີວິດຂອງປະຊາກອນ ສະນັ້ນ ຈຶ່ງມີຄວາມຈຳເປັນຕ້ອງໄດ້ປຶກສາຫາລື ແລກປ່ຽນປະສົບການໃນການຄວບຄຸມ ເພື່ອຊອກຫາວິທີປ່ຽນແປງສັງຄົມທີ່ຈະມາທ້າທາຍຊີວິດການເປັນຢູ່ໃນອະນາຄົດ
# ຂ່າວ & ພາບ: ຂັນທະວີ