ວັນທີ 29 ກໍລະກົດ 2022 ຜ່ານມານີ້ ທີ່ຫໍວັດທະນະທຳແຫ່ງຊາດ ສະຖານທູດອິນໂດເນເຊຍ ປະຈຳ ສປປ ລາວ ຈັດງານລ້ຽງ ສະຫຼອງວັນສ້າງຕັ້ງສາຍພົວພັນທາງການທູດຄົບຮອບ 65 ປີ ລະຫວ່າງ ສາທາລະນະລັດອິນໂດເນເຊຍ ແລະ ສາທາລະນະລັດ ປະຊາທິປະໄຕ ປະຊາຊົນລາວ ໂດຍມີທ່ານ ນາງ ສວນສະຫວັນ ວິຍາເກດ ລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທ່ານ ດຣ. ປຣາຕິໂຕ ສູຮາລີໂຢ ເອກອັກຄະລັດຖະທູດແຫ່ງ ສາທາລະນະລັດ ອິນໂດເນເຊຍ ປະຈຳ ສປປ ລາວ ພ້ອມດ້ວຍພະນັກງານວິຊາການ ຊາວໜຸ່ມ ນັກຮຽນ ແລະ ມວນຊົນເຂົ້າຮ່ວມ.
ໃນໂອກາດດັ່ງກ່າວ ທ່ານ ດຣ. ປຣາຕິໂຕ ສູຮາລີໂຢ ໄດ້ໃຫ້ກຽດກ່າວຕ້ອນຮັບວ່າ: ການສະແດງໃນຄືນວັດທະນະທໍາຄັ້ງນີ້ ແມ່ນຢາກສະແດງໃຫ້ເຫັນເຖິງຄວາມໃກ້ຊິດສະໜິດສະໜົມ ແລະ ອຸດົມສົມບູນຂອງວັດທະນະທໍາອິນໂດເນເຊຍ ແລະ ລາວ ແລະ ຊຸກຍູ້ສາຍພົວພັນມິດຕະພາບທີ່ເປັນມູນເຊື້ອອັນແໜ້ນແຟ້ນລະຫວ່າງສອງປະເທດ.
ການຮ່ວມມືລະຫວ່າງສອງປະເທດໃນທຸກດ້ານ ນັບທັງດ້ານການເມືອງ ເສດຖະກິດ ແລະ ການພົວພັນທາງດ້ານສັງຄົມ-ວັດທະນະທຳ ແລະ ປະຊາຊົນໃນໄລຍະ 65 ປີທີ່ຜ່ານມາ ການພົວພັນທາງການທູດຈະສືບຕໍ່ເພີ່ມທະວີການພົວພັນທາງການທູດຕື່ມອີກ ປະກອບສ່ວນສຳຄັນເຂົ້າໃນການກໍ່ສ້າງການຮ່ວມມືທີ່ເປັນເອກະພາບ ແລະ ວັດທະນາຖາວອນລະຫວ່າງສອງປະເທດ.
ສໍາລັບໃນງານຄັ້ງນີ້ ແມ່ນໄດ້ຊົມສະແດງການເຕັ້ນ ແລະ ຮ້ອງເພງຈາກອິນໂດເນເຊຍ ແລະ ສປປ ລາວ ນັກດົນຕີ ແລະ ນັກຮ້ອງອິນໂດເນເຊຍ ສະເໜີໂດຍ ວົງດົນຕີ Paulus Surya Band Orchestra ຈາກ Semarang ອິນໂດເນເຊຍ ເຊິ່ງໄດ້ສະແດງດົນຕີພື້ນເມືອງຂອງອິນໂດເນເຊຍ ຈຳນວນໜຶ່ງຈາກບາງສ່ວນຂອງໝູ່ເກາະ 17.000 ຂອງອິນໂດເນເຊຍ ວົງດົນຕີ ພອນສຸລິຍະວົງ ຮ່ວມມືກັບນັກດົນຕີຈາກໂຮງຮຽນສິລະປະແຫ່ງຊາດລາວ ແລະ ບົດຟ້ອນລາວຈຳນວນໜຶ່ງ ລວມທັງຈຳປາເມືອງລາວ ແລະ ເຢັນສະບາຍຊາວນາ ພ້ອມນັ້ນ ມີການຟ້ອນອິນໂດເນເຊຍ ໄດ້ຮັບການສະແດງໂດຍພະນັກງານຈາກກະຊວງປ້ອງກັນປະເທດ ແຫ່ງ ສປປ ລາວ.
