ສະຖານທູດອິນໂດເນເຊຍ ຮ່ວມກັບສະພາການຄ້າ ແລະ ອຸດສາຫະກຳແຫ່ງຊາດ ຈັດງານວາງສະແດງສິນຄ້າເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ສ. ອິນໂດນີເຊຍ-ສປປ ລາວ ຄົບຮອບ 65 ປີ ຂຶ້ນວັນທີ 30-31 ກໍລະກົດ 2022 ທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ ໂດຍມີທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ທ່ານ ດຣ. ປຣາຕິໂຕ ສູຮາລີໂຢ ເອກອັກຄະລັດຖະທູດແຫ່ງສາທາລະນະລັດອິນໂດເນເຊຍ ປະຈຳ ສປປ ລາວ ທ່ານ ຄຳແສນ ສີສະວົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ສະມາຊິກສະພາແຫ່ງຊາດລາວ ພ້ອມດ້ວຍບັນດາທູຕານຸທູດ ພະນັກງານວິຊາການ ແລະ ບໍລິສັດຫ້າງຮ້ານເຂົ້າຮ່ວມ.
ທ່ານ ດຣ. ປຣາຕິໂຕ ສູຮາລີໂຢ ກ່າວວ່າ:ໃນໄລຍະປີ 2017-2021 ອິນໂດເນເຊຍ ແລະ ລາວ ມີການເພີ່ມຂຶ້ນດ້ານການຄ້າ 282% (ຈາກ 16.103.700 ໂດລາສະຫະລັດ ໃນປີ 2017 ຫາ 45.544.400 ໂດລາສະຫະລັດ ໃນປີ 2021) ແຕ່ເດືອນມັງກອນ ຫາເດືອນພຶດສະພາປີນີ້ ມູນຄ່າການຄ້າທັງໝົດບັນລຸ 22,7 ລ້ານໂດລາສະຫະລັດ ບັນລຸເຄິ່ງໜຶ່ງຂອງມູນຄ່າການຄ້າທັງໝົດຂອງປີກາຍ ຄາດວ່າຈະເຕີບໂຕຫຼາຍຂຶ້ນໃນທ້າຍປີນີ້ ຕົວເລກດັ່ງກ່າວ ສະແດງໃຫ້ເຫັນວ່າ ການທູດດ້ານເສດຖະກິດພວມດຳເນີນໄປເທື່ອລະກ້າວ ລະຫວ່າງອິນໂດເນເຊຍ ແລະ ລາວ.
ງານວາງສະແດງສິນຄ້າອິນໂດເນເຊຍປີ 2022 ເຊິ່ງມີນັກທຸລະກິດອິນໂດເນເຊຍ 12 ແຫ່ງ ທີ່ມີທຸລະກິດທີ່ຫຼາກຫຼາຍຈາກອາຫານ ເຄື່ອງນຸ່ງຫົ່ມ ຫັດຖະກຳ ຝຸ່ນ ແລະ ອຸດສາຫະກຳໜັກເຊັ່ນ: ຜະລິດຕະພັນການທະຫານ ແລະ ເຮືອບິນ ບໍລິສັດເຫຼົ່ານີ້ ສ່ວນໃຫຍ່ເປັນບໍລິສັດໃໝ່ໃນລາວ ແລະ ຫວັງວ່າຈະສາມາດສ້າງໂອກາດທີ່ຈະມີທຸລະກິດຢູ່ທີ່ນີ້ ນອກຈາກນັ້ນ ສະຖານທູດ ບໍ່ພຽງແຕ່ອໍານວຍຄວາມສະດວກໃຫ້ແກ່ຜູ້ປະກອບການຂອງອິນໂດເນເຊຍເທົ່ານັ້ນ ແຕ່ຍັງມີ 19 ບໍລິສັດທ້ອງຖິ່ນມາເປີດບູດຢູ່ພາຍໃນງານ ເພື່ອເພີ່ມຄວາມສຳພັນລະຫວ່າງຄົນກັບຄົນ ໂດຍການແນະນຳທຸລະກິດລາວໃຫ້ຊາວອິນໂດເນເຊຍ ບໍລິສັດທ້ອງຖິ່ນເຫຼົ່ານີ້ ມີຊື່ສຽງສໍາລັບຜະລິດຕະພັນທີ່ມີຄຸນນະພາບສູງຂອງພວກເຂົາ ແລະ ຈະເພີ່ມແນວພັນຂອງຜະລິດຕະພັນໃນງານວາງສະແດງ SME ແລະ ຂ້າພະເຈົ້າຂໍແນະນໍາໃຫ້ທ່ານທຸກຄົນເບິ່ງຜະລິດຕະພັນທີ່ສະແດງ ເຊິ່ງໃນວັນທີ 31 ກໍລະກົດ 2022 ຜ່ານມາ ມີການຈັບຄູ່ທຸລະກິດ ຄາດວ່າການຈັບຄູ່ທາງທຸລະກິດຈະໄດ້ຮັບໝາກຜົນອັນເຕັມທີ່ເຊັ່ນຂໍ້ຕົກລົງລະຫວ່າງ PT. Renner Inti International (PT. PATEN) ຜູ້ຜະລິດຝຸ່ນຊີວະພາບຈາກອິນໂດເນເຊຍ ກັບບໍລິສັດ Genscore Laos ຈໍາກັດ ໃນການຈັດຈໍາໜ່າຍ.
ທ່ານ ມະໄລທອງ ກົມມະສິດ ກ່າວວ່າ: ງານວາງສະແດງຄັ້ງນີ້ ເປັນເຫດການໜຶ່ງທີ່ສຳຄັນ ທີ່ໄດ້ພ້ອມກັນເປັນເອກະພາບຈັດຂື້ນ ໃນປີນີ້ ເປັນປີທີ 65 ທີ່ສອງປະເທດໄດ້ສ້າງສາຍພົວພັນການທູດນຳກັນ ເວົ້າລວມ ເວົ້າເພາະ ກໍແມ່ນສອງລັດຖະບານ ແລະ ປະຊາຊົນລາວ ແລະ ອິນໂດເນເຊຍ ຫວນຄືນການພົວພັນຮ່ວມມືອັນດີ ມີຄວາມສະໜິດແໜ້ນ ແລະ ຍາວນານຕະຫຼອດມາ. ສະແດງອອກໃນແຕ່ລະໄລຍະ ຍາມໃດ ລັດຖະບານຂອງສອງປະເທດ ກໍໃຫ້ຄວາມເອົາໃຈໃສ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມືກັນໃຫ້ກວ້າງຂວາງຫຼາຍຂື້ນ.
ການຈັດງານໃນຄັ້ງນີ້ ຖືວ່າເປັນການຈັດຕັ້ງຜັນຂະຫຍາຍການຮ່ວມມື ພັດທະນາເສດຖະກິດ ການຄ້າ ການລົງທືນ ແລະ ການທ່ອງທ່ຽວຂອງສອງປະເທດ ປີຜ່ານມາ ໄດ້ພິສູດໃຫ້ເຫັນວ່າ ມູນຄ່າການຄ້າລະຫວ່າງລາວ ກັບອິນໂດເນເຊຍ ເພີ່ມຂື້ນຫຼາຍກວ່າ 22 ລ້ານໂດລາສະຫະລັດ ແລະ ການລົງທຶນຂອງວິສາຫະກິດອິນໂດເນເຊຍຢູ່ລາວ ກໍມີຫຼາຍໂຄງການ ມູນຄ່າປະມານ 1.719.551 ໂດລາສະຫະລັດ ຈັດຢູ່ໃນອັນດັບທີ 32 ຂ້າພະເຈົ້າເຊື່ອໝັ້ນວ່າ ງານວາງສະແດງໃນຄັ້ັງນີ້ຈະເປັນເວທີໃນການແລກປ່ຽນຂໍ້ມູນຂ່າວສານ ເຈລະຈາຫາຄູ່ຄ້າ ແລະ ເປັນທ່າແຮງເພື່ອດຶງດູດການຄ້າ ການລົງທຶນ ລະຫວ່າງທຸລະກິດລາວ ແລະ ອິນໂດເນເຊຍ ໃຫ້ມີການເຕີບໃຫຍ່ຂະຫຍາຍຕົວ ແລະ ໃຫ້ມີທິດທາງທີ່ຈະສາມາດຊື້-ຂາຍ ແລະ ແລກປ່ຽນການຄ້າໃຫ້ເພີ່ມຂື້ນ.
ໂອກາດດັ່ງກ່າວ ທ່ານໄດ້ເຊີນຊວນນັກທຸລະກິດຈາກອິນໂດເນເຊຍ ຜ່ານງານວາງສະແດງນີ້ ໃຫ້ມາສຶກສາທ່າແຮງ ແລະ ໂອກາດເຂົ້າມາລົງທຶນຢູ່ລາວ ໂດຍສະເພາະ ໃນຂົງເຂດອຸດສາຫະກຳປຸງແຕ່ງ ແລະ ອຸດສາຫະກຳທ່າແຮງຕ່າງໆພາຍໃນ ສປປ ລາວ ເຊິ່ງມີເງື່ອນໄຂ ແລະ ອຸດົມສົມບູນທາງດ້ານຊັບບພະຍາກອນທຳມະຊາດແຕ່ເໜືອຮອດໄຕ້ ມີທ່າແຮງສູງທາງດ້ານກະສິກຳ ທັງທາງດ້ານພື້ນທີ່ ແລະ ໜໍ່ແໜງການເຮັດກະສິກຳສະອາດ ນອກຈາກນີ້ ຢາກຂໍໃຫ້ມາສຶກສາເບີ່ງສີນຄ້າທີ່ ສປປ ລາວຜະລິດໄດ້ ແລະ ເປັນທີ່ຕ້ອງການຂອງຕະຫຼາດອິນໂດເນເຊຍ ພ້ອມດຽວກັນ ຊຸກຍູ້ໃຫ້ສິນຄ້າຂອງອິນໂດເນເຊຍໄດ້ມາວາງຈຳໜ່າຍໃນຮ້ານສັບພະສິນຄ້າໃນລາວຫຼາຍຂື້ນ ສົ່ງເສີມໃຫ້ມີການນຳເອົາສິນຄ້າລາວໄປວາງຂາຍໃນຮ້ານສັບພະສິນຄ້າຂອງອິນໂດເນເຊຍໃຫ້ເປັນຮູບປະທຳ.