ເນື່ອງໃນໂອກາດວັນເດັກສາກົນ ຜູ້ຂຽນຂໍສະເໜີກ່ຽວກັບນະໂຍບາຍດີໆຂອງ ສປ ຈີນ ມາເລເຊຍ ແລະ ສ ເກົາຫຼີ ເພື່ອສົ່ງເສີມສຸຂະພາບ ແລະ ສະຫວັດດີການຂອງເດັກນັກຮຽນ ຂັ້ນປະຖົມ ແລະ ມັດທະຍົມ ດັ່ງລຸ່ມນີ້.
ຈີນ-ມາເລເຊຍ: ມີຂ່າວຈາກ ສປ ຈີນ ແລະ ມາເລເຊຍ ກ່ຽວກັບທິດທາງຊ່ວຍຫຼຸດຄວາມອິດເມື່ອຍ ແລະ ຄວາມຄຽດຂອງເດັກນັກຮຽນ ຈາກການຮຽນ ການເສັງ ຊຶ່ງໜັກໜ່ວງເກີນໄປສຳລັບຄົນຢູ່ໃນໄວເດັກ ຂ່າວຕ່າງປະເທດໃຫ້ຮູ້ໃນວັນທີ 1 ເດືອນພະຈິກ 2019 ວ່າທາງການຂອງແຂວງເຊຈຽງ (Zhejiang) ສປ ຈີນ ໄດ້ອອກຂໍ້ແນະນຳ ເພື່ອຫຼຸດຜ່ອນການແບກຫາບພາລະການຮ່ຳຮຽນຂອງເດັກ ທີ່ເຫັນວ່າໜັກໜ່ວງເກີນໄປ ສຳລັບເດັກນັກຮຽນປະຖົມ ແລະ ມັດທະຍົມຕົ້ນ ຂໍ້ແນະນຳໄດ້ກຳນົດໃຫ້ເດັກນັກຮຽນເຂົ້ານອນໃນເວລາອັນເໝາະສົມ ຄື: ບໍ່ກາຍ 21 ໂມງ (9ໂມງ) ສຳລັບເດັກນັກຮຽນປະຖົມ ແລະ 22 ໂມງ (10 ໂມງ) ສຳລັບນັກຮຽນມັດທະຍົມຕົ້ນ ເຖິງວ່າບົດເຝິກຫັດທີ່ຕ້ອງເຮັດຢູ່ເຮືອນຍັງເຮັດບໍ່ສຳເລັດກໍຕາມ ແຕ່ຂໍ້ແນະນຳນີ້ຍັງຕ້ອງໄດ້ຮັບຄວາມເຫັນດີຈາກພໍ່ແມ່ ຫຼື ຜູ້ປົກຄອງຂອງເດັກນຳ ບົດແນະນຳຈາກທາງການຂອງແຂວງມີລາຍລະອຽດປີກຍ່ອຍ ຈຳນວນ 33 ຂໍ້ ເພື່ອໃຫ້ທາງໂຮງຮຽນ ສະຖາບັນເຝິກອົບຮົມ ພໍ່ແມ່ຂອງເດັກ ກໍຄື ບັນດາໜ່ວຍງານຄຸ້ມຄອງ ຂະແໜງສຶກສາ ປະຕິບັດແນໃສ່ຫຼຸດຜ່ອນພາລະແບກຫາບການຮຽນ ໂດຍສັງລວມແລ້ວ ຄຳສັ່ງແນະນຳມີເປົ້າໝາຍ ເພື່ອຫຼຸດຜ່ອນບົດຮຽນທີ່ເດັກນັກຮຽນຕ້ອງຫອບມາເຮັດຕໍ່ຢູ່ເຮືອນ ແລະ ເພື່ອຫຼຸດຜ່ອນຄວາມຫຍຸ້ງຍາກຂອງເດັກໃນການກຽມຂໍ້ສອບ ຄຳແນະນຳໄດ້ສັ່ງຫ້າມການຮຽນການສອນເພີ່ມນອກໂມງຮຽນ ເພື່ອກຽມໃສ່ການສອບເສັງ ແລະ ອື່ນໆ ສຳລັບຢູ່ມາເລເຊຍນັ້ນ ທາງກະຊວງສຶກສາຂອງປະເທດນີ້ ກໍໄດ້ກຳນົດແຜນຫຼຸດ ຜ່ອນຄວາມອິດເມື່ອຍຂອງເດັກນັກຮຽນ ຄ້າຍໆກັບຢູ່ແຂວງເຊຈຽງຂອງ ສປ ຈີນ ຂ່າວຕ່າງປະເທດໃນຕົ້ນເດືອນມິຖຸນາ 2018 ໃຫ້ຮູ້ວ່າ: ກະຊວງສຶກສາຂອງມາເລເຊຍ ໄດ້ລິເລີ່ມແຜນປັບປຸງລະບົບການສຶກສາຄືນໃໝ່ ໂດຍສະເພາະແມ່ນການຮຽນໃນຊັ້ນປະຖົມ ດ້ວຍລະບົບການສຶກສາທີ່ສົ່ງເສີມການຄົ້ນຄິດ ການເປັນເຈົ້າຂອງເດັກນັກຮຽນ ໃນການຄົ້ນຄວ້າຊອກສະແຫວງຫາຄວາມຮູ້ແບບບໍ່ຕ້ອງເພິ່ງປຶ້ມ ຫຼື ຕຳລາຮຽນເປັນຕົ້ນຕໍ ຖ້າເຮັດໄດ້ຄືແນວນີ້ ເດັກນັກຮຽນກໍຈະບໍ່ຈຳເປັນຕ້ອງແບກຖົງປຶ້ມໜັກໆໄປໂຮງຮຽນຄືເກົ່າ ເຊິ່ງເປັນການທຳລາຍສຸຂະພາບຂອງເດັກ ທາງກະຊວງສຶກສາມາເລເຊຍ ໄດ້ໃຫ້ເຫດຜົນວ່າລະບົບ ການຮຽນແບບນີ້ ປະຕິບັດກັນຢ່າງແຜ່ຫຼາຍໃນບັນດາປະເທດທີ່ພັດທະນາແລ້ວ ແລະ ໄດ້ຜົນເປັນທີ່ປະຈັກຕາ.
ທີ່ ສ ເກົາຫຼີ: ກົດໝາຍຫ້າມຂາຍເຄື່ອງດື່ມທີ່ມີທາດກາເຟອິນທຸກຊະນິດຢູ່ໂຮງຮຽນຊັ້ນປະຖົມ ມັດທະຍົມຕົ້ນ ແລະ ປາຍ ໃນທົ່ວປະເທດ ເລີ່ມມີຜົນສັກສິດໃນທົ່ວປະເທດ ສ ເກົາຫຼີ ໃນວັນທີ 14 ກັນຍາ 2018 ເປັນຕົ້ນມາ ເປັນອັນວ່າເຄື່ອງດື່ມປະເພດນ້ຳໂຊດາ ນ້ຳໝາກໄມ້ ເຄື່ອງດື່ມປະເພດນົມ ທີ່ມີສ່ວນປະສົມຂອງກາເຟອິນ ໄດ້ກາຍເປັນສິ່ງຕ້ອງຫ້າມໃນບັນດາໂຮງຮຽນ ຍົກເວັ້ນກາເຟທີ່ບີບເອົາຈາກເຄື່ອງຈັກ ສຳລັບຄູ-ອາຈານ ເທົ່ານັ້ນ ກົດໝາຍຫ້າມດັ່ງກ່າວຊີ້ອອກວ່າ ເຄື່ອງດື່ມທີ່ມີທາດກາເຟອິນສູງນັ້ນ ຈະເຮັດໃຫ້ເກີດອາການນອນບໍ່ຫຼັບ ຫົວໃຈເຕັ້ນແຮງຜິດປົກກະຕິ ແລະ ມີອາການງຸດງິດກະວົນກະວາຍ ອາການເຫຼົ່ານີ້ ລ້ວນແຕ່ເປັນອັນຕະລາຍສຳລັບຄົນໃນໄວເດັກ ກົດໝາຍໄດ້ກຳນົດວ່າ ອາຫານ ແລະ ເຄື່ອງດື່ມຊະນິດໃດກໍຕາມທີ່ມີທາດກາເຟອິນປະສົມ ໃນລະດັບ 0,15 ມີລີກຣາມ ກໍຖືວ່າເປັນປະເພດທີ່ມີທາດກາເຟອິນສູງຫຼາຍເກີນກຳນົດ.