ບໍລິສັດ Butterfly Network ຂອງສະຫະລັດອາເມຣິກາ ໄດ້ເປີດຕົວ “Butterfly iQ” ອຸປະກອນທີ່ຊ່ວຍໃຫ້ແພດ ສາມາດກວດສອບອາການຕິດເຊື້ອ COVID-19 ຈາກທາງໄກໄດ້ຢ່າງປອດໄພ ສຳລັບຄົນເຈັບທີ່ອາໄສຢູ່ທີ່ເຮືອນຂອງຕົນເອງໄດ້ ທາງບໍລິສັດໄດ້ລະບຸວ່າ Butterfly iQ ສາມາດທົດສອບປອດຂອງຄົນເຈັບດ້ວຍອັນຕຣາຊາວ ເຊິ່ງຈະເຊື່ອມຕໍ່ເຂົ້າກັບສະມາດ ໂຟນລະບົບ iOS ແລະ Android ໂດຍທາງບໍລິສັດໄດ້ກ່າວວ່າ “ການທົດສອບປອດດ້ວຍອັນຕຣາຊາວ ໄດ້ຮັບການພິສູດແລ້ວວ່າສາມາດຊ່ວຍໃນການຄັດແຍກຄົນເຈັບ ທີ່ມີຄວາມເປັນໄປໄດ້ວ່າອາດຕິດເຊື້ອໄວຣັສ COVID-19 ໄດ້”.
ໃນຂະນະນີ້ Butterfly iQ ໄດ້ຮັບການວາງຈຳໜ່າຍສຳລັບແພດໃນສະຫະລັດອາເມຣິກາ ເທົ່ານັ້ນ ໂດຍຜູ້ໃຊ້ສາມາດເຊື່ອມຕໍ່ອຸປະກອນເຂົ້າກັບສະມາດໂຟນ ລະບົບ iOS ແລະ Android ຂອງຕົນ ແລະ ຈະມີການແນະນຳຂັ້ນຕອນການໃຊ້ຢ່າງມືອາຊີບ ປາກົດເທິງໜ້າຈໍສະມາດໂຟນ
ຖ້າຫາກຜູ້ໃຊ້ຖືອຸປະກອນໃນການກວດຢ່າງຜິດວິທີ ແພດທີ່ກຳລັງໃຫ້ຄຳປຶກສາຢູ່ ສາມາດໃຫ້ຄຳແນະນຳຕ່າງໆ ລວມເຖິງສາມາດດຳເນີນການທົດສອບ ດ້ວຍການຄວບຄຸມໄລຍະໄກ ເຊັ່ນ: ການຊູມເພື່ອເບິ່ງຈຸດທີ່ຄາດວ່າອາດເປັນບັນຫາໃຫ້ແຈ້ງຂຶ້ນໄດ້ ໂດຍພາບດັ່ງກ່າວ ຈະໄດ້ຮັບການບັນທຶກເພື່ອນຳໄປວິເຄາະຕໍ່ໄປ.
ໃນຂະນະນີ້ Butterfly iQ ໄດ້ຮັບການວາງຈຳໜ່າຍໃຫ້ສະເພາະກັບແພດໃນສະຫະລັດອາເມຣິກາເທົ່ານັ້ນ ໃນລາຄາ 2.000 ໂດລາສະຫະລັດ (18.000.000 ກີບ) ຊຶ່ງຖືກກວ່າເຄື່ອງອັນຕຣາຊາວປົກກະຕິທີ່ມີລາຄາປະມານ 75.000 ໂດລາ (675.528.808 ກີບ) ຢ່າງໃດກໍດີ ແພດທີ່ຈະສາມາດຊື້ອຸປະກອນນີ້ໄດ້ ຈະຕ້ອງໄດ້ຮັບອະນຸຍາດຕາມກົດໝາຍຂອງລັດ ໃຫ້ສາມາດເຝິກຝົນການໃຊ້ງານ ຫຼືສັ່ງຊື້ອຸປະກອນໄດ້ ໂດຍແພດແຕ່ລະຄົນຈະເສຍຄ່າສະມາຊິກຢູ່ທີ່ 420 ໂດລາ (3.782.961 ກີບ) ຕໍ່ປີ ສ່ວນທີມແພດຈຳນວນ 5 ຄົນ ຈະຈ່າຍຄ່າສະມາຊິກທີມລະດັບມືອາຊີບຢູ່ທີ່ 1.200 ໂດລາ (10.808.460 ກີບ) ຕໍ່ປີ.
ໂດຍປົກກະຕິແລ້ວ ອົງການອາຫານ ແລະ ຢາແຫ່ງສະຫະລັດອາເມຣິກາ (FDA: Food and Drug Administration) ຈະບໍ່ອະນຸຍາດໃຫ້ຄົນເຈັບດຳເນີນການອັນຕຣາຊາວຕົນເອງໄດ້ ແລະ ອຸປະກອນໃນລັກສະນະດຽວກັບ Butterfly IQ ຈະຖືກນຳມາໃຊ້ສຳລັບການວິໄຈເທົ່ານັ້ນ ແຕ່ເນື່ອງຈາກວິກິດ COVID-19 ທີ່ແຜ່ລະບາດໄປທົ່ວໂລກ ເຮັດໃຫ້ມີການປ່ຽນກົດຂໍ້ບັງຄັບຊົ່ວຄາວ ແລະ ເມື່ອເຫດການໄດ້ກັບມາສູ່ສະພາວະປົກກະຕິ ກໍຈະກັບມາໃຊ້ກົດຂໍ້ບັງຄັບເກົ່າຕາມເດີມ.