ບໍລິສັດ ໂອເຊຍໂນ ຈຳກັດ ໄດ້ຮັບອະນຸຍາດຈາກລັດຖະບານລາວ ກໍຄືແຂວງຊຽງຂວາງ ໃຫ້ສຶກສາສຳຫຼວດຄວາມເປັນໄປໄດ້ໂຄງການລ້ຽງງົວພັນຊີ້ນ ແລະ ງົວພັນນົມ ຮູບແບບກະສິກຳທັນສະໄໝ ຢູ່ບ້ານລາດງ່ອນ ແລະ ບ້ານນາຄູນ ເມືອງແປກ ແຂວງຊຽງຂວາງ ໃນເນື້ອທີ່ 150 ເຮັກຕາ ເພື່ອຈຳໜ່າຍພາຍໃນ ແລະ ສົ່ງອອກຕ່າງປະເທດ ໂດຍຈະໃຊ້ງົບປະມານໃນການລົງທຶນເບື້ອງຕົ້ນ 5 ລ້ານໂດລາສະຫະລັດ ຫຼື ປະມານ 44,96 ຕື້ກີບ ແລະ ຄາດວ່າຈະໃຊ້ເວລາໃນການສຶກສາ ສຳຫຼວດ 12 ເດືອນ.
ພິທີລົງນາມບົດບັນທຶກຄວາມເຂົ້າໃຈໃນການສຶກສາ ສຳຫຼວດຄວາມເປັນໄປໄດ້ໂຄງການດັ່ງກ່າວ ຈັດຂຶ້ນວັນທີ 29 ພຶດສະພາ 2020 ຢູ່ແຂວງຊຽງຂວາງ ລະຫວ່າງທ່ານ ບົວເງິນ ຫຸມໄຊຍະພົມ ຫົວໜ້າພະແນກແຜນການ ແລະ ການລົງທຶນແຂວງຊຽງຂວາງ ແລະ ທ່ານ ຄອນຄຳ ອິນທະວົງ ປະທານບໍລິສັດ ໂອເຊຍໂນ ຈຳກັດ ມີທ່ານ ບຸນຕົ້ນ ໄຊຍະພອນ ເຈົ້າແຂວງຊຽງຂວາງ ພ້ອມດ້ວຍທ່ານເຈົ້າເມືອງແປກ ບັນດາພະແນກການ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດການລົງນາມບົດບັນທຶກຄັ້ງນີ້ ບໍລິສັດ ໂອເຊຍໂນ ຈຳກັດ ຍັງໄດ້ມອບລົດກະບະ REVO ມູນຄ່າ 450 ລ້ານກີບ ໃຫ້ອົງການກາແດງແຂວງຊຽງຂວາງ ເພື່ອຊຸກຍູ້ການປະຕິບັດວຽກງານຂອງອົງການດັ່ງກ່າວ ຕື່ມອີກ.
# ຂ່າວ & ພາບ: ສະບາໄພ