ວັນທີ 1 ມິຖຸນາ 2020 ທີ່ບ້ານນາໂນ ເມືອງໄຊເຊດຖາ ນະຄອນຫຼວງວຽງຈັນ ຫ້ອງການກະສິກຳ ແລະ ປ່າໄມ້ເມືອງໄຊເຊດຖາ ຈັດພິທີປູກຕົ້ນໄມ້ໃນໂອກາດວັນປູກຕົ້ນໄມ້ແຫ່ງຊາດ ເປັນກຽດເຂົ້າຮ່ວມຂອງທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ ທ່ານ ໂພຄຳ ໄຊຍະສອນ ເຈົ້າເມືອງໄຊເຊດຖາ ພ້ອມດ້ວຍຮອງເຈົ້າເມືອງ ຫົວໜ້າ ຮອງຫົວໜ້າຫ້ອງການ ອຳນາດການປົກຄອງບ້ານ ແລະ ພະນັກງານ.
ໃນພິທີທ່ານ ຄຳປ່ຽງ ອ່ອນສີ ຮັກສາການຫົວໜ້າຫ້ອງການກະສິກຳ ແລະ ປ່າໄມ້ ເມືອງໄຊເຊດຖາ ໄດ້ລາຍງານກ່ຽວກັບການປູກຕົ້ນໄມ້ວ່າ ປັດຈຸບັນ ປ່າໄດ້ຖືກທຳລາຍນັບມື້ຫຼຸດໜ້ອຍຖອຍລົງ ດັ່ງນັ້ນ ຈຶ່ງໄດ້ເຮັດໃຫ້ເກີດສະພາບດິນຟ້າອາກາດມີການປ່ຽນແປງ ເປັນຕົ້ນຝົນຕົກບໍ່ຖືກຕາມລະດູການ ແຫ້ງແລ້ງ ນ້ຳຖ້ວມ ໄດ້ສົ່ງຜົນກະທົບຕໍ່ການດຳລົງຊີວິດຂອງມວນມະນຸດ ສະນັ້ນ ຈຶ່ງໄດ້ມີການປູກໄມ້ທົດແທນໃນເຂດດິນເປົ່າວ່າງ ເຂດປ່າໄມ້ທີ່ຖືກທຳລາຍ ເຂດປ່າຊຸດໂຊມ ພ້ອມນີ້ ຍັງເປັນການຜັນຂະຫຍາຍມະຕິກອງປະຊຸມໃຫຍ່ ຂອງອົງຄະນະພັກນະຄອນຫຼວງວຽງຈັນ ເປັນຕົ້ນແມ່ນຄຳຂວັນ 6ສ ໂດຍສະເພາະແມ່ນ ສ ສີຂຽວ.
ສຳລັບມື້ນີ້ໄດ້ປູກໃນເນື້ອທີ່ 2 ເຮັກຕາ ນຳໃຊ້ຕົ້ນໄມ້ 500 ຕົ້ນ ເປັນປະເພດໄມ້ໄຜ່ ໂດຍປູກໃສ່ເຂດປ່າຊຸດໂຊມໃນເຂດບ້ານນາໂນ ພາຍຫຼັງທີ່ປູກແລ້ວ ໄດ້ມອບໃຫ້ບ້ານເປັນຜູ້ປົກປັກຮັກສາ ຄຸ້ມຄອງ ແລະ ນຳໃຊ້ ໃນຍະຜ່ານມາ ກໍໄດ້ປຸກລະດົມພໍ່ແມ່ປະຊາຊົນ ພະນັກງານທຸກຂັ້ນ ເຂົ້າຮ່ວມຂະບວນການປູກຕົ້ນໄມ້ໃນເຂດດິນເປົ່າຫວ່າງຂອງສຳນັກງານ ອົງການ ວັດວາ ໂຮງຮຽນ ປ່າສະຫງວນໃນສະຖານທີ່ຕ່າງໆ ໂດຍນຳໃຊ້ເບ້ຍໄມ້ທັງໝົດ 385.710 ເບ້ຍ.
# ຂ່າວ & ພາບ: ອົ່ນ ໄຟສົນທອງ