ເປັນທີ່ຮູ້ນຳກັນດີວ່າ ໃນໄລຍະ 2 ເດືອນຜ່ານມາ ພາຍຫຼັງທີ່ລັດຖະບານໄດ້ວາງມາດຕະການໃນການປ້ອງກັບຄວບຄຸມ ແລະ ແກ້ໄຂການລະບາດຂອງ COVID-19 ເຮັດໃຫ້ສະພາບການສັນຈອນໃນໄລຍະດັ່ງກ່າວ ມີຍານພາຫະນະຫຼຸດລົງ ໂດຍສະເພາະ ໃນຍາມວິການບໍ່ມີຮອດພາຫະນະທ່ຽວທາງເລີຍກໍວ່າໄດ້ ແຕ່ປັດຈຸບັນ ລັດຖະບານໄດ້ວາງມາດຕະການຜ່ອນຜັນ ເພື່ອໃຫ້ບັນດາສຳນັກງານ ອົງການ ຫົວໜ່ວຍທຸລະກິດ ສະຖາບັນການສຶກສາ ແລະ ອື່ນໆ ໄດ້ເປີດຄືນໃໝ່ ເຊິ່ງຈະເຮັດໃຫ້ຍວດຍານພາຫະນະເພີ່ມຂຶ້ນ ໂດຍສະເພາະແມ່ນເວລາຮີບດ່ວນ ເນື່ອງຈາກວ່າການສັນຈອນໃນເວລານີ້ ກໍຈະກັບຄືນສະພາບປົກກະຕິເລີຍກໍວ່າໄດ້.
ເພື່ອຮອງຮັບກັບສະພາບການ ດັ່ງກ່າວ ກໍຄືເພື່ອສ້າງຄວາມສະດວກສະບາຍໃຫ້ກັບຜູ້ໃຊ້ລົດໃຊ້ຖະໜົນ ໃນໄລຍະເປີດຮຽນຄືນໃໝ່ ຫຼາຍໆເມືອງໃນນະຄອນຫຼວງວຽງຈັນ ໄດ້ກຽມຄວາມພ້ອມໃນການຮັບມືກັບສະພາບການສັນຈອນທີ່ຈະເກີດຂຶ້ນ ໃນນັ້ນ ໄຊເສດຖາ ກໍເປັນອີກເມືອງໜຶ່ງທີ່ໄດ້ກຽມຄວາມພ້ອມ ເພື່ອອຳນວຍຄວາມສະດວກໃຫ້ການສັນຈອນໃນໄລຍະເປີດຮຽນຄືນ.
ຕາມການລາຍງານຂ່າວຂອງນັກຂ່າວ ປກສ ນວ ວ່າ: ທ່ານ ພັຕ ກັນສະແຫວງ ສີວົງສັກ ຮອງຫົວໜ້າກອງຮ້ອຍຕຳຫຼວດຈະລາຈອນ ປກສ ເມືອງໄຊເສດຖາ ນະຄອນຫຼວງວຽງຈັນ ໄດ້ໃຫ້ສຳພາດໃນອາທິດຜ່ານມາ ໂດຍທ່ານໄດ້ເວົ້າເຖິງໃນໄລຍະເປີດໂຮງຮຽນຄືນ ພາຍຫຼັງທີ່ໄດ້ປິດໂຮງຮຽນແຕ່ຕົ້ນເດືອນເມສາ ເປັນຕົ້ນມາ ແລະ ໄດ້ເປີດຮຽນຄືນໃໝ່ໃນວັນທີ 2 ມິຖຸນານີ້ ຈະລາຈອນ ປກສ ເມືອງໄຊເສດຖາ ແມ່ນມີຄວາມກຽມພ້ອມປະຕິບັດໜ້າທີ່ ເພື່ອແກ້ໄຂສະພາບການສັນຈອນແອອັດ ພາຍໃນເມືອງເປັນຕົ້ນແມ່ນ: ສຸມກຳລັງລົງປະຈຳຈຸດປ້ອມ 3 ແຍກ 4 ແລະ ບັນດາໂຮງຮຽນ ຂອບເຂດທີ່ມີຄວາມແອອັດສັບສົນ ເປັນຕົ້ນແມ່ນວົງວຽນສະໜາມມ້າ ໄຟແດງທາດຫຼວງ ແລະ ເສັ້ນທາງ 23 ສິງຫາ ພ້ອມນັ້ນ ຈະສຸມໃສ່ຈັດສັນຄວາມເປັນລະບຽບຮຽບຮ້ອຍຕາມແຄມທາງ ເພື່ອອຳນວຍຄວາມສະດວກໃນການສັນຈອນໄປ-ມາ.
ສຳລັບສະພາບການສັນຈອນຢູ່ເມືອງໄຊເສດຖາ ໃນໄລຍະ 1 ເດືອນຜ່ານມາແມ່ນບໍ່ມີຄວາມແອອັດສັບສົນຫຼາຍປານໃດ ເນື່ອງຈາກວ່າເປັນໄລຍະຜ່ອນຜັນ ການເຝົ້າລະວັງຄວບຄຸມສະກັດກັ້ນການລະບາດຂອງພະຍາດ COVID-19 ເຊິ່ງບັນດາໂຮງຮຽນ ໄດ້ພັກການຮຽນ-ການສອນຊົ່ວຄາວ ແລະ ໄລຍະນີ້ ສະພາບອຸບັດຕິເຫດເກີດຂຶ້ນຮ້າຍແຮງແມ່ນບໍ່ມີ ມີແຕ່ເກີດຂຶ້ນເລັກນ້ອຍ ແລະ ຄູ່ກໍລະນີກໍໄດ້ມີການໄກ່ເກ່ຍກັນເອງ.
ທ່ານຮອງຫົວໜ້າກອງຮ້ອຍຕຳຫຼວດຈະລາຈອນ ປກສ ເມືອງໄຊເສດຖາ ຍັງໄດ້ຮຽກຮ້ອງໃຫ້ຜູ້ໃຊ້ລົດໃຊ້ຖະໜົນ ຈົ່ງເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ ເປັນຕົ້ນແມ່ນ ບໍ່ໃຫ້ຈອດລົດຊະຊາຍຕາມແຄມທາງ ບໍ່ຈອດຕາມປ້າຍຫ້າມ ບໍ່ລ່ວງໄຟອຳນາດ ບໍ່ຢຽບເສັ້ນທາງມ້າລາຍ ໃສ່ໝວກກັນກະທົບທຸກຄັ້ງທີ່ຂັບຂີ່ລົດຈັກ ແລະ ອື່ນໆ.