ອີງຕາມບົດຮຽນຈາກ ສປ ຈີນ ແລະ ຫຼາຍປະເທດ ພົບວ່າກຸ່ມຜູ້ສູງອາຍຸ ແລະ ຜູ້ເປັນພະຍາດຕ່າງໆຢູ່ແລ້ວ ໂດຍສະເພາະ ຜູ້ສູບຢາ ແມ່ນມີຄວາມສ່ຽງສູງທີ່ຈະເປັນໜັກ ແລະ ເສຍຊີວິດສູງກວ່າ ຄົນທົ່ວໄປ 14 ເທົ່າ ກໍເນື່ອງຈາກ ສະພາບປອດຂອງຄົນສູບຢາ ມີຄວາມຜິດປົກກະຕິຢູ່ແລ້ວ ທັງໂຄງສ້າງ ແລະ ເນື້ອເຍື່ອຂອງປອດ ຄົນສູບຢາໃນໄລຍະເວລາດົນຈະສົ່ງຜົນກະທົບຕໍ່ປອດເຮັດໃຫ້ປອດເກີດການປ່ຽນແປງໄປສູ່ຄວາມຜິດປົກະຕິ ແລະ ພູມຄຸ້ມກັນຂອງປອດກໍຫຼຸດລົງ ເວລາເຊື້ອພະຍາດເຂົ້າ ພາຍໃນຮ່າງກາຍຈະເຮັດໃຫ້ຮ່າງກາຍບໍ່ສາມາດຕໍ່ສູ້ໄດ້ຢ່າງມີປະສິດທິພາບເທົ່າກັບຄົນບໍ່ສູບຢາ ທີ່ສຳຄັນຈະເຮັດໃຫ້ປອດຂອງຄົນສູບຢາແມ່ນໄວຕໍ່ການຮັບເຊື້ອ COVID 19 ເນື່ອງຈາກ ຈຸລັງໃນປອດມີໂຕຮັບເຊື້ອຫຼາຍກວ່າຄົນປົກກະຕິຫຼາຍເທົ່າ (receptors) ເຊິ່ງໂຕຮັບນີ້ຈະເພີ່ມຂຶ້ນຫຼາຍທີ່ຜີວຂອງຈຸລັງປອດຂອງຄົນສູບຢາ ເມື່ອ ໄວຣັສ COVID 19 ເຂົ້າມາໂຈມຕີປອດກໍຈະເຂົ້າໃນຈຸດດັ່ງກ່າວ ສະນັ້ນ ເມື່ອປອດຄົນສູບຢາ ມີ ໂຕຮັບຫຼາຍ ເຊື້ອ ໄວຣັສ ທີ່ຫາຍໃຈເຂົ້າມາ ກໍຈະມີປ່ອງທີ່ຈະເຂົ້າສູ່ຈຸລັງແລ້ວກໍເຂົ້າສູ່ເນື້ອປອດໄດ້ຫຼາຍຂຶ້ນ.
ນອກຈາກນີ້ ຄວັນຢາສູບ ແລະ ຄວັນຢາສູບໄຟຟ້າ ຍັງໄປຢັບຢັ້ງ ການເຮັດວຽກຂອງຂົນອ່ອນໃນປອດ ທີ່ເຮັດໜ້າທີ່ປັດກວດ ຂີ້ຝຸ່ນ ຂີ້ກະເທີ່ ຄວັນ ແລະ ເຊື້ອພະຍາດ ໃຫ້ຫຍັບຂຶ້ນມາຈົນຮອດຮູຄໍ ແລ້ວຄົນກໍຈະກືນລົງໄປທາງກະເພາະອາຫານ ຫຼື ຄົນໄອອອກໄປກັບກະເທີ້/ນ້ຳລາຍ ໃນຄົນສູບຢາຂົນອ່ອນນີ້ຈະເປັນອຳມະພາດ ເມື່ອເວລາມີສິ່ງແປກປອມເຂົ້າມາທາງເດີນຫາຍໃຈ ມັນກໍຈະຄ້າງໃນປອດ ໂດຍບໍ່ໄດ້ປັດອອກມາ ຜ່ານມາ ເຮົາຮູ້ແຕ່ວ່າ ເມື່ອຄົນສູບຢາຫາຍໃຈເອົາ ເຊື້ອ ບັກເຕລີ-ໄຂ້ຫວັດໃຫຍ່-ວັນນະໂລກ ປອດຈະຖືກເຊື້ອເຫຼົ່ານີ້ໂຈມຕີໄດ້ງ່າຍ ແລະ ໜັກໜ່ວງ ກວ່າຄົນບໍ່ສູບຢາ ສະນັ້ນ COVID -19 ກໍແມ່ນ ໄວຣັສ ຮ້າຍແຮງຊະນິດໜຶ່ງ ທີ່ສາມາດທຳລາຍ ປອດຂອງຄົນສູບຢາ ເຊິ່ງຄວາມຮຸນແຮງແມ່ນຂຶ້ນກັບໄລຍະເວລາ ແລະ ປອດຖືກທຳລາຍໄປຫຼາຍປານໃດ ຍິ່ງສູບຢາດົນເທົ່າໃດປອດກໍຍິ່ງເສຍຫາຍຫຼາຍຂຶ້ນເຮັດໃຫ້ມີຄວາມສ່ຽງທີ່ຈະເສຍຊີວິດໂດຍສະເພາະກຸ່ມຜູ້ສູງອາຍຸ.
ມີຂໍ້ສັງເກດ ໃນ ອາເມຣິກາ ທີ່ພົບຄົນເປັນ ໄວຣັສ COVID -19 ໃນໄລຍະອາຍຸ 20 ຫາ 45 ປີ ຕ້ອງໄດ້ເຂົ້ານອນໂຮງໝໍປະມານໜຶ່ງສ່ວນສາມ ມີຂໍ້ສັນນິຖານວ່າ ແມ່ນຍ້ອນຄົນອາເມຣິກາ ທີ່ມີ ອາຍຸນ້ອຍ ສູບຢາສູບໄຟຟ້າຫຼາຍ ດັ່ງນັ້ນ ສູນຄວບຄຸມພະຍາດອາເມຣິກາ ກະຊວງສາທາລະນະສຸກ ອັງກິດ ລວມທັງ ອົງການອະນາໄມໂລກ ໄດ້ແນະນຳໃຫ້ອອກ ຫຼື ຊຸດເຊົາຢາສູບ ແລະ ຢາສູບເພື່ອຫຼຸດຜ່ອນຄວາມສ່ຽງຕໍ່ການຕິດເຊື້ອພະຍາດ COVID -19ໃນລັກສະນະທີ່ຮ້າຍແຮງ ແລະ ເສຍຊີວິດ ນອກນີ້ ການສູບຢາສູບ ທັງຢາສູບໄຟຟ້າ ມີຄວາມສ່ຽງສູງທີ່ຈະຕິດ COVID -19 ຍ້ອນການນຳມືໄປຈັບໜ້າເລື້ອຍໆ ແລະ ຄວັນຢາສູບມືສອງຍັງສົ່ງຜົນຮ້າຍຕໍ່ຄົນອ້ອມຂ້າງກໍ່ ໃຫ້ເກີດຄວາມຮຸນແຮງ ເມື່ອຕິດເຊື້ອພະຍາດ COVID -19 .
ການສູບຢາ/ນິໂຄຕີນ ສາມາດປ້ອງກັນການຕິດເຊື້ອ COVID- 19 ນັ້ນຍ້ອນ ທຸລະກິດຢາສູບ ພະຍາຍາມ ສ້າງຄວາມສັບສົນກ່ຽວ ກັບຄວາມສ່ຽງ ຂອງການໃຊ້ຜະລິດຕະພັນ ນິໂຄຕີນ (ຢາສູບໄຟຟ້າ) ແລະ ຢາສູບ ກັບການຕິດເຊື້ອ COVID- 19 ນັ້ນແມ່ນຍັງບໍ່ມີຫຼັກຖານ ຢືນຢັນວ່າ ການສູບຢາ ສາມາດ ປ້ອງກັນ ການຕິດເຊື້ອ COVID -19 ຍັງບໍ່ມີຫຼັກຖານ ຕາມທີ່ໄດ້ຕັ້ງ ສົມມຸດຕິຖານ ວ່າການ ສູບຢາ/ນິໂຄຕີນ ຫຼຸດຈຳນວນໂຕຮັບ (Receptors ACE-2) ເຊິ່ງເປັນປ່ອງທີ່ COVID -19 ເຂົ້າສູ່ຈຸລັງຂອງເສັ້ນທາງຫາຍໃຈ ແລະ ປອດ) ແຕ່ມີຫຼັກຖານຈາກການວິໄຈ ທີ່ຢືນຢັນແລ້ວວ່າ ການສູບຢາເພີ້ມ ຈຳນວນໂຕຮັບ ACE-2 ເຊິ່ງຕາມທິດສະດີແລ້ວ ຈະເຮັດໃຫ້ການຕິດ COVID- 19 ໄດ້ງ່າຍຂຶ້ນ ຄຽງຄູ່ກັນນັ້ນກໍມີຫຼັກຖານທີ່ພິສູດແລ້ວວ່າ ການສູບຢາ ເພີ່ມຄວາມສ່ຽງ ແລະ ຄວາມຮຸນ ແຮງຂອງການຕິດເຊື້ອ ເສັ້ນທາງຫາຍໃຈ ແລະ ປອດ (ຈາກເຊື້ອພະຍາດຊະນິດອື່ນ).
“ຖ້າຄົນທີ່ສູບຢາຕິດເຊື້ອພະຍາດ COVID- 19 ແລະ ອາການໄອ ໃນຂະນະທີ່ກຳລັງສູບຢາ ແມ່ນມີໂອກາດແຜ່ເຊື້ອນີ້ໄດ້ ເພາະ ໄວຣັສ ໄດ້ແຝງມາ ກັບລະອອງ ຂີ້ມູກ ແລະ ນ້ຳລາຍ ໄດ້ປະສົມປະສານມາກັບຄວັນຢາສູບ”.
ປັດຈຸບັນນີ້ແມ່ນຢູ່ໃນໄລຍະການແຜ່ລະບາດຂອງພະຍາດ COVID- 19 ໂດຍສະເພາະ ວັນງົດສູບຢາໂລກ 31 ພຶດສະພາ ທີ່ຈະມາເຖິງນີ້ ເປັນໂອກາດທີ່ ເໝາະສົມທີ່ສຸດທີ່ຈະພ້ອມກັນຫັນມາອອກ ຫຼື ຢຸດເຊົາຢາສູບເຊິ່ງ ການອອກຢາສູບຈະຊ່ວຍໃຫ້ປອດກັບມາແຂງແຮງ ສາມາດສູ້ກັບພະຍາດ COVID-19 ໄດ້ ອອກຢາສູບຕອນນີ້ຍັງບໍ່ຊ້າເກີນໄປຕໍ່ການຮັກສາສຸຂະພາບເຮັດເພື່ອຕົວເອງ ຄົນທີ່ຮັກ ແລະ ສັງຄົມ.