ທ່ານ ພັນໂທ ເພັງສະຫວັນ ທຳມະບູນ ຫົວໜ້າພະແນກຕຳຫຼວດຈະລາຈອນ ນະຄອນຫຼວງວຽງຈັນ ໃຫ້ຮູ້ວ່າ: ພາຍຫຼັງທີ່ລັດຖະບານ ໄດ້ຜ່ອນຜັນມາດຕະການປ້ອງກັນການແຜ່ລະບາດພະຍາດໂຄວິດ-19 ໂດຍອະນຸຍາດໃຫ້ມີການສັນຈອນໄປມາພາຍໃນແຂວງ ເລີ່ມແຕ່ວັນທີ 4 ພຶດສະພາ 2020 ເປັນຕົ້ນມາ ການສັນຈອນຢູ່ນະຄອນຫຼວງວຽງຈັນ ກໍເລີ່ມໜາແໜ້ນຂຶ້ນ ຍ້ອນບັນດາສຳນັກງານ-ອົງການເລີ່ມເຮັດວຽກປົກກະຕິ ເຊິ່ງພະນັກງານທັງພາກລັດ ແລະ ເອກະຊົນກັບມາເຂົ້າການປົກກະຕິ ລວມທັງບໍລິສັດ ຫ້າງຮ້ານຕ່າງໆ ກໍເລີ່ມເປີດໃຫ້ບໍລິການ ຈຶ່ງເຮັດໃຫ້ມີພາຫະນະສັນຈອນໄປ-ມາຕາມເສັ້ນທາງຫຼາຍຂຶ້ນກວ່າເກົ່າ ຖ້າທຽບໃສ່ສະພາບການສັນຈອນໃນໄລຍະຄຸມເຂັ້ມການນຳໃຊ້ມາດຕະການປ້ອງກັນການແຜ່ລະບາດຂອງພະຍາດໂຄວິດ-19.
ປັດຈຸບັນ ສະພາບການສັນຈອນຢູ່ຕາມເສັ້ນທາງໃນນະຄອນຫຼວງວຽງຈັນ ເຫັນວ່າຍັງປົກກະຕິດີ ພາຫະນະຍັງບໍ່ແອອັດເທົ່າທີ່ຄວນ ຂະນະທີ່ວັນທີ 1 ມິຖຸນາ 2020 ນີ້ ເປັນມື້ປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ແລະ ໂຮງຮຽນ ແຫ່ງຕ່າງໆກໍຈະເປີດການຮຽນ-ການສອນຄືນໃໝ່ ຫຼັງຢຸດມາໄດ້ 2 ເດືອນ ໃນໄລຍະການແຜ່ລະບາດຂອງພະຍາດໂຄວິດ-19 ຕໍ່ກັບສະພາບການດັ່ງກ່າວ ເຈົ້າໜ້າທີ່ຕຳຫຼວດຈະລາຈອນນະຄອນຫຼວງວຽງຈັນ ກໍບໍ່ໄດ້ລົດລະໃນການປະຕິບັດໜ້າທີ່ວຽກງານວິຊາສະເພາະ ເພື່ອເຮັດໃຫ້ຜູ້ໃຊ້ລົດ-ໃຊ້ຖະໜົນສັນຈອນໄປມາມີຄວາມສະດວກສະບາຍ ແລະ ປອດໄພ ໂດຍສຸມໃສ່ເຮັດວຽກງານໂຄສະນາ ເຊີນຊວນໃຫ້ມວນຊົນປະຕິບັດກົດລະບຽບຈະລາຈອນຢ່າງເຂັ້ມງວດ ບັນຈຸກຳລັງລົງປະຈຳຢູ່ຕາມເສັ້ນທາງ ປ້ອມຍາມ ເພື່ອເຝົ້າຕິດຕາມລະບາຍການສັນຈອນ ຈັດລະບຽບສາຍທາງ ຕິດຕາມກວດກາການປະຕິບັດລະບຽບການສັນຈອນຂອງນັກຂັບຂີ່ ແລະ ປະຈຳການຄອຍເຫດຕະຫຼອດ 24 ຊົ່ວໂມງ.
ສຳລັບສະພາບການເກີດອຸບັດເຫດໃນເດືອນພຶດສະພາ 2020 ທົ່ວນະຄອນຫຼວງວຽງຈັນມີອຸບັດເຫດເກີດຂຶ້ນຫຼາຍກວ່າ 70 ກໍລະນີ ເຮັດໃຫ້ມີຜູ້ເສຍຊີວິດ 10 ກວ່າຄົນ ເຊິ່ງສາເຫດທີ່ພາໃຫ້ເກີດອຸບັດເຫດແມ່ນລ່ວງໄຟອຳນາດ ແລ່ນລົດໄວເກີນກຳນົດ ແຊງບໍ່ຮັບປະກັນ ປ່ຽນທິດທາງລົດກະທັນຫັນ ແລະ ເມົາແລ້ວຂັບຂີ່ພາຫະນະ.
# ຂ່າວ & ພາບ: ຊີລິການດາ