ພິທີມອບຮັບໃບຢັ້ງຢືນຈົບຊຸດອົບຮົມ ລະບາດວິທະຍາພາກສະໜາມ ຮຸ່ນທີ 13 ໄດ້ຈັດຂຶ້ນໃນວັນທີ 5 ກໍລະກົດ 2022 ຢູ່ໂຮງແຮມຄຣາວ ພລາຊາ ນະຄອນຫຼວງວຽງຈັນ ໂດຍການເປັນປະທານຂອງທ່ານ ດຣ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ທ່ານນາງ Joy Sakurai ອຸປະທູດສະຫະລັດອາເມຣິກາ ປະຈຳ ສປປ ລາວ ແລະ ທ່ານນາງ Ying-Ru J. LO ຜູ້ຕາງໜ້າອົງການອະນາໄມໂລກ ປະຈຳ ສປປ ລາວ ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ມີຜູ້ຕາງໜ້າຈາກບັນດາກະຊວງ ກົມ ສູນ ສະຖາບັນ ແລະ ອົງການ DTRA USCDC WHO ເຂົ້າຮ່ວມ.
ກະຊວງສາທາລະນະສຸກ ສົມທົບກັບກົມຄວບຄຸມພະຍາດຕິດຕໍ່ ອົງການປ້ອງກັນຫຼຸດຜ່ອນໄພຂົ່ມຂູ່ ສູນປ້ອງກັນ ແລະ ຄວບຄຸມພະຍາດຕິດຕໍ່ສະຫະລັດອາເມຣິກາ ແລະ ອົງການອະນາໄມໂລກ ໄດ້ຈັດພິທີມອບຮັບໃບຢັ້ງຢືນໃຫ້ນັກສຶກສາຜູ້ທີ່ຈົບຫຼັກສູດລະບາດວິທະຍາ ເພື່ອສະແດງຄວາມຍ້ອງຍໍຊົມເຊີຍຜົນສຳເລັດທີ່ນັກສຶກສາຍາດມາໄດ້.
ກະຊວງສາທາລະນະສຸກ ໄດ້ຈັດຊຸດອົບຮົມລະບາດວິທະຍາພາກສະໜາມ ແຕ່ປີ 2009 ຈົນເຖິງປັດຈຸບັນ ໃນແຕ່ລະປີ ມີນັກສຶກສາເຂົ້າຮ່ວມທັງໜົດ 8 ທ່ານ ມາຈາກກະຊວງສາທາລະນະສຸກ ກະຊວງກະສິກຳ ແລະ ປ່າໄມ້ ກະຊວງປ້ອງກັນຄວາມສະຫງົບ ແລະ ກະຊວງປ້ອງກັນປະເທດ ໄດ້ຮັບການສະໜັບສະໜູນຈາກອົງການປ້ອງກັນຫຼຸດຜ່ອນໄພຂົ່ມຂູ່ ສູນປ້ອງກັນ ແລະ ຄວບຄຸມພະຍາດຕິດຕໍ່ ສະຫະລັດອາເມຣິກາ ແລະ ອົງການອະນາໄມໂລກ ເປັນຕົ້ນທາງດ້ານງົບປະມານ ແລະ ວິຊາການ.
ຈຸດປະສົງໃນການສ້າງຊຸດອົບຮົມນັກລະບາດວິທະຍາພາກສະໜາມ ແມ່ນເພື່ອຕອບສະໜອງຕາມຄວາມຮຽກຮ້ອງຕ້ອງການຂອງວຽກງານສາທາລະນະສຸກ ໃນການພັດທະນາຄວາມອາດສາມາດທາງດ້ານລະບາດວິທະຍາ ໃຫ້ພະນັກງານຜູ້ທີ່ຮັບຜິດຊອບວຽກງານປ້ອງກັນ ແລະ ຄວບຄຸມພະຍາດແຕ່ສູນກາງລົງຮອດທ້ອງຖິ່ນ.
ໃນປັດຈຸບັນ ແມ່ນຮຸ່ນທີ 13 ແລະ ຈຳນວນນັກສຶກສາຜູ້ທີ່ຈົບໄປແລ້ວ ລວມທັງຮຸ່ນທີ່ກຳລັງຈົບ ແມ່ນມີທັງໝົດ 102 ທ່ານ ຢູ່ຂັ້ນສູນກາງ 34 ທ່ານ ຂັ້ນແຂວງ 51 ແລະ ຂັ້ນເມືອງ 17 ທ່ານ ເຊິ່ງນັກສຶກສາລະບາດວິທະຍາພາກສະໜາມຜູ້ທີ່ຈົບໄປແລ້ວ ມີບົດບາດສຳຄັນຫຼາຍຕໍ່ວຽກງານສາທາລະນະສຸກ ຄືການປະກອບສ່ວນເຂົ້າໃນວຽກງານກັນ ແລະ ຄວບຄຸມພະຍາດຕິດຕໍ່ ແລະ ເຫດການສຸກເສີນດ້ານສາທາລະນະສຸກ ເຊັ່ນ:ປະກອບສ່ວນຢ່າງຕັ້ງໜ້າໃນວຽກງານເຝົ້າລະວັງ ສອບສວນການລະບາດ ວິເຄາະຂໍ້ມູນ ແລະ ຕອບໂຕ້ຕໍ່ການລະບາດ ນອກນັ້ນ ເຄືອຂ່າຍນັກສຶກສາລະບາດວິທະຍາພາກສະໜາມຜູ້ທີ່ຈົບໄປແລ້ວໃນຂອບເຂດທົ່ວປະເທດ ຍັງເປັນເສົາຫຼັກໃນການປະສອບສ່ວນໃຫ້ແກ່ວຽກງານເຝົ້າລະວັງ ແລະ ໂຕ້ຕອບຢູ່ທ້ອງຖິ່ນ ແລະ ໄດ້ສຶກສາຄົ້ນຄວ້າກ່ຽວກັບບັນຫາທາງດ້ານສາທາລະນະສຸກທີ່ມີໃນປັດຈຸບັນ ເພື່ອຊອກຫາສາເຫດຂອງການເຈັບເປັນ ແລະ ສະເໜີຂັ້ນນຳ ໃນການວາງມາດຕະການແກ້ໄຂ ແລະ ປັບປຸງວຽກງານປ້ອງກັນ ແລະ ຄວບຄຸມພະຍາດໃຫ້ດີຂຶ້ນໃນຕໍ່ໜ້າ ເພື່ອປ້ອງກັນ ແລະ ຫຼຸດຜ່ອນໄພຂົ່ມຂູ່ດ້ານສຸຂະພາບຂອງປະຊາຊົນ.
# ຂ່າວ – ພາບ : ສີພອນ