ການລະບາດຂອງພະຍາດ COVID-19 ໄດ້ສົ່ງຜົນກະທົບຕໍ່ຫຼາຍຂົງເຂດວຽກງານ ໃນນີ້ ສະເພາະໂຄງການປັບປຸງເສັ້ນຈະລາຈອນຖະໜົນສາຍຫຼັກ ຢູ່ຕົວເມືອງນະຄອນຫຼວງວຽງຈັນ ເພື່ອຕ້ອນຮັບວັນສຳຄັນຕ່າງໆຂອງພັກ-ຂອງຊາດ ທັງເປັນການສ້າງຄວາມຮັບປະກັນໃຫ້ການສັນຈອນມີຄວາມປອດໄພ ເຊິ່ງໂຄງການດັ່ງກ່າວມີຄວາມຫຼ້າຊ້າຈາກເດີມ ແລະ ຄາດວ່າຈະສຳເລັດໃນກາງເດືອນພຶດສະພານີ້.
ທ່ານ ສີວອນ ຊັບທະວີ ຮອງຫົວໜ້າພະແນກໂຍທາທິການ ແລະ ຂົນສົ່ງນະຄອນຫຼວງວຽງຈັນ (ຍທຂ ນວ) ໄດ້ໃຫ້ຮູ້ວ່າ: ໂຄງການປັບປຸງແຕ້ມເສັ້ນຈະລາຈອນໜ້າເສັ້ນທາງສາຍຫຼັກ ໂດຍນຳໃຊ້ງົບປະມານຂອງລັດ ກອງທຶນຄວາມປອດໄພທາງຖະໜົນປະຈຳປີ 2020 ມູນຄ່າ 7,4 ຕື້ກີບ ປະຕິບັດຢູ່ 8 ເສັ້ນທາງ ຄື: ຖະໜົນໄກສອນ ພົມວິຫານ ຍາວ 10,7 ກິໂລແມັດ ຖະໜົນໜອງບອນ 3,47 ກິໂລແມັດ ຖະໜົນສາມແສນໄທ 3,2 ກິໂລແມັດ ຖະໜົນເສດຖາທິລາດ 2 ກິໂລແມັດ ຖະໜົນເຈົ້າຟ້າງຸ່ມ 2,6 ກິໂລແມັດ ຖະໜົນສຸພານຸວົງ 6 ກິໂລແມັດ ຖະໜົນລ້ານຊ້າງ 1,2 ກິໂລແມັດ ແລະ ຖະໜົນທ່າເດື່ອ 10,5 ກິໂລແມັດ ແລະ ສາຍທາງຕັດເຊື່ອມຕໍ່ລະຫວ່າງເສັ້ນທາງຫາກັນ ໂດຍບໍລິສັດ ລາວມາກເກີ ເປັນຜູ້ຮັບເໝົາ.
ມາຮອດເດືອນເມສາ 2020 ທີ່ເປັນໄລຍະການລະບາດຂອງພະຍາດ COVID-19 ໂດຍປະຕິບັດຕາມແຈ້ງການເລກທີ 06/ນຍ ໂຄງການໄດ້ຢຸດວຽກຊົ່ວຄາວເປັນເວລາ 1 ເດືອນ ພາຍຫຼັງສະພາບຄ່ອຍປົກກະຕິ ກໍໄດ້ລາຍງານເຖິງຂັ້ນເທິງ ໂດຍສະເພາະ ຄະນະສະເພາະກິດຕ້ານພະຍາດ COVID-19 ໄດ້ໃຫ້ທິດຊີ້ນຳວິທີປ້ອງກັນຕ່າງໆ ແລະ ໄດ້ປຶກສາຫາລືກັບບໍລິສັດຜູ້ຮັບເໝົາ ເພື່ອກະກຽມຄືນ ແລະ ໃຫ້ຈັດຕັ້ງປະຕິບັດໂຄງການ ໃນໄລຍະພາຫະນະລົດແລ່ນຕາມຖະໜົນຍັງບໍ່ຫຼາຍ ຈຶ່ງໄດ້ເລີ່ມປະຕິບັດມາແຕ່ຕົ້ນເດືອນພຶດສະພາ 2020 ເປັນຕົ້ນມາ ປັດຈຸບັນກຳປະຕິບັດຢູ່ເສັ້ນທາງທ່າເດື່ອ ເລີ່ມແຕ່ໄຟອຳນາດທາດຂາວ-ຂົວມິດຕະພາບ ລາວ-ໄທ 1 ຕາມແຜນຄາດວ່າຈະໃຫ້ສຳເລັດກາງເດືອນພຶດສະພານີ້ ແຕ່ຍ້ອນໄດ້ຮັບຜົນກະທົບຈາກພະຍາດ COVID-19 ຈຶ່ງແກ່ຍາວເວລາ ແລະ ຄາດວ່າຈະໃຫ້ສຳເລັດໂດຍພື້ນຖານທ້າຍເດືອນພຶດສະພາ 2020.
ນອກຈາກໂຄງການປັບປຸງແຕ້ມເສັ້ນທາງແລ້ວ ຍັງມີໂຄງການຕິດຕັ້ງຈຸດຄົນຂ້າມທາງທີ່ເປັນຄ້າຍຄືກັບໄຟອຳນາດ ເພື່ອອຳນວຍຄວາມສະດວກໃຫ້ຄົນຂ້າມທາງມີຄວາມປອດໄພ ເຊິ່ງປະກອບມີ 6 ຈຸດ ປັດຈຸບັນ ສຳເລັດແລ້ວ 4 ຈຸດ ແລະ ຍັງອີກ 2 ຈຸດຈະສືບຕໍ່ປະຕິບັດ ເຊິ່ງມີຢູ່ຖະໜົນເຈົ້າຟ້າງຸ່ມ ເສັ້ນທາງໂພນ ຕ້ອງ-ດົງໂດກ (ຕໍ່ໜ້າໂຮງໝໍ 150 ຕຽງ) ຖະໜົນມິດຕະພາບ ລາວ-ໄທ (ຕໍ່ໜ້າໂຮງໝໍ 103) ຖະໜົນເສດຖາທິລາດ (ຕໍ່ໜ້າແພດສາດ) ແລະ ຖະໜົນສຸພານຸວົງ ນອກຈາກຈະໃຊ້ເປັນລະບົບໄຟແລ້ວ ຍັງຈະເສີມລະບົບສຽງເຂົ້າຕື່ມ ເພື່ອສະດວກໃຫ້ຄົນພິການເປັນຕົ້ນຄົນພິການທາງສາຍຕາ ເຊິ່ງເປັນໂຄງການທຳອິດຢູ່ປະເທດເຮົາ.
ຂະນະທີ່ໃນເດືອນເມສາ 2020 ທົ່ວປະເທດ ມີອຸບັດເຫດເກີດຂຶ້ນ 435 ລາຍ ມີຄົນເສຍຊີວິດ 71 ຄົນ ໂດຍສະເພາະນະຄອນຫຼວງວຽງຈັນ ຍັງຄອງອັນດັບການເກີດອຸບັດເຫດ ແລະ ຄົນເສຍຊີວິດຫຼາຍກວ່າແຂວງອື່ນ ການເກີດອຸບັດເຫດແຕ່ລະຄັ້ງເຮັດໃຫ້ມີພາຫະນະເປ່ເພ 719 ຄັນ ໃນນີ້ ເປ່ເພເລັກໜ້ອຍ 320 ຄັນ ສົມຄວນ 376 ຄັນ ໃຊ້ການບໍ່ໄດ້ 23 ຄັນ ມີຄົນໄດ້ຮັບບາດເຈັບ 557 ຄົນ ບາດເຈັບເລັກໜ້ອຍ 243 ຄົນ ສົມຄວນ 227 ຄົນ ສາຫັດ 87 ຄົນ ແລະ ເສຍຊີວິດ 71 ຄົນ ສາເຫດຕົ້ນຕໍຂອງການເກີດອຸບັດເຫດແມ່ນ ເມົາແລ້ວຂັບ ຂັບຂີ່ລົດໄວເກີນກຳນົດ ແຊງບໍ່ຮັບປະກັນ ແລະ ບໍ່ເຄົາລົບກົດລະບຽບຈະລາຈອນຢ່າງເຂັ້ມງວດ.