ການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID-19) ໄດ້ສົ່ງຜົນກະທົບຕໍ່ຂະແໜງການສຶກສາ ເພື່ອເປັນການປ້ອງກັນພະຍາດດັ່ງກ່າວ ບໍ່ໃຫ້ແຜ່ລາມ ລັດຖະບານຈຶ່ງໄດ້ປະກາດໃຫ້ທຸກໂຮງຮຽນໃນທົ່ວປະເທດ ຢຸດການຮຽນການສອນ ເຊິ່ງພາຍຫຼັງທີ່ການແຜ່ລະບາດຂອງພະຍາດດັ່ງກ່າວ ໄດ້ເບົາບາງລົງທາງລັດຖະບານ ກໍຄື ຄະນະສະເພາະກິດປ້ອງກັນ ແລະ ຄວບຄຸມພະຍາດ COVID-19 ຈຶ່ງໄດ້ອະນຸຍາດໃຫ້ຊັ້ນຮຽນຈົບຊັ້ນ ຄື ປ5 ມ4 ມ7 ເປີດຮຽນຄືນໃໝ່ ໃນວັນທີ 18 ພຶດສະພາເປັນຕົ້ນມາແຕ່ທຸກໂຮງຮຽນ ຕ້ອງເຂັ້ມງວດຈັດຕັ້ງປະຕິບັດມາດຕະການປ້ອງກັນພະຍາດນີ້ຢ່າງເອົາໃຈໃສ່ ເຊິ່ງໂຮງຮຽນລຽວໂຕເປັນໂຮງຮຽນໜຶ່ງທີ່ໄດ້ເອົາໃຈໃສ່ປະຕິບັດ ມາດຕະການປ້ອງກັນ ສະກັດກັ້ນ ແລະ ຄວບຄຸມພະຍາດ COVID-19.
ທ່ານ ອາຈານ ສະໝານ ບົວຜາວົງ ຫົວໜ້າຫ້ອງການພາສາລາວ ມສ ລຽວໂຕ ໄດ້ກ່າວວ່າ: ໂຮງຮຽນຂອງພວກເຮົາໄດ້ມີການກະກຽມຄວາມພ້ອມ ກ່ອນຈະເປີດຮຽນຈົບຊັ້ນ ປ5 ມ4 ມ7 ເຊິ່ງໄດ້ມີການປຶກສາຫາລື ໃນບັນດາຄະນະຜູ້ບໍລິຫານໂດຍໄດ້ວາງແຜນກະກຽມຄວາມພ້ອມ ເນັ້ນໃສ່ມາດຕະການປ້ອງກັນ ສະກັດກັ້ນ ແລະ ຄວບຄຸມພະຍາດ COVID-19 ເພື່ອໃຫ້ສາມາດຮັບປະກັນໃນການປ້ອງກັນບໍ່ໃຫ້ມີຜູ້ຕິດເຊື້ອເພີ່ມ ຄືດັ່ງລັດຖະບານໄດ້ວາງມາດຕະການຄວບຄຸມໃນໄລຍະນີ້.
ສຳລັບມາດຕະການປ້ອງກັນ ສະກັດກັ້ນ ແລະ ຄວບຄຸມພະຍາດ COVID-19 ພາຍໃນໂຮງຮຽນນັ້ນ ນັກຮຽນທຸກຄົນທີ່ຈະເຂົ້າມາໂຮງຮຽນພວກເຮົາ ໄດ້ຕັ້ງຈຸດວັດແທກອຸນຫະພູມຢູ່ທາງປະຕູໃຫຍ່ ເພື່ອເປັນຈຸດວັດໄຂ້ ຄຽງຄູ່ກັບການຮັກສາໄລຍະຫ່າງຍ່າງເຂົ້າມາຢ່າງເປັນລະບຽບ ແລະ ຢາຍຜ້າປິດປາກໃຫ້ 1 ຄົນ 1 ອັນ ໃຊ້ເຈວລ້າງມື ແລະ ຈັດໃຫ້ນັກຮຽນນັ່ງໂດຍເນັ້ນຮັກສາໄລຍະຫ່າງ ທາງໜ້າ ແລະ ທາງຂ້າງ ແມ່ນຮັກສາໄລຍະຫ່າງ 1 ແມັດ ມີໜ້າກາກໃສຢາຍໃຫ້ນັກຮຽນ 1 ຄົນຕໍ່ 1 ອັນຕໍ່ 1 ມື້ເພື່ອຮັກສາໄລຍະຫ່າງ ໃນການກະກຽມການຮຽນການສອນ ແມ່ນໄດ້ປຶກສາຫາລືກັບບັນດາຄູສອນຈົບຊັ້ນ ໃຫ້ເນັ້ນບົດຮຽນຫຼັກທີ່ຈະໄປສອບເສັງຈົບຊັ້ນ ໃຫ້ມີຄວາມພ້ອມ ໃຫ້ຈົບທັນກັບເວລາສອບເສັງຈົບຊັ້ນ.
ສ່ວນການຮຽນພາຍໃນຫ້ອງ ໃນໄລຍະການລະບາດຂອງພະຍາດ COVID-19 ພວກເຮົາໄດ້ແຍກຫ້ອງ ຈາກຫ້ອງໜຶ່ງ 40 ຄົນ ແມ່ນໄດ້ແຍກອອກເປັນ 2 ຫ້ອງ ເພື່ອໃຫ້ຮັກສາໄດ້ໄລຍະຫ່າງ ນອກຈາກແຍກຫ້ອງແລ້ວ ຍັງຄວບຄຸມຕິດຕາມນ້ອງນັກຮຽນເວລາພັກຜ່ອນ ເພື່ອປ້ອງກັນບໍ່ໃຫ້ນັກຮຽນອອກມາຫຼີ້ນຮ່ວມກັນໂດຍໄດ້ແຕ່ງຄູເຝົ້າສະເພາະ.