ວັນທີ 26 ພຶດສະພາ 2020 ອົງການຮ່ວມມືສາກົນ ສ ເກົາຫຼີ (KOICA) ປະຈຳລາວ ໄດ້ມອບເຄື່ອງອຸປະໂພກ-ບໍລິໂພກ ແລະ ເຄື່ອງປ້ອງກັນພະຍາດໂຄວິດ-19 ໃຫ້ສູນກາງຊາວໜຸ່ມປະຊາຊົນປະຕິວັດລາວ (ສຊປລ) ເພື່ອນຳໄປແຈກຢາຍໃຫ້ບັນດາສູນກັກກັນ ສູນຕິດຕາມພະຍາດ ແລະ ເຝົ້າລະວັງ ບັນດາແຮງງານລາວ ທີ່ເດີນທາງມາຈາກຕ່າງປະເທດ ເຊິ່ງເຄື່ອງທີ່ນຳມອບຄັ້ງນີ້ ປະກອບມີເຂົ້າສານອາຫານແຫ້ງ 3,5 ໂຕນ ເຈວລ້າງມື 3.600 ຕຸກ ຜ້າອັດປາກ 17.000 ອັນ ແລະ ເຄື່ອງໃຊ້ອື່ນໆອີກຈຳນວນໜຶ່ງ ກ່າວມອບໂດຍທ່ານ ຊອງຊຸນ ຊິນ ເອກອັກຄະລັດຖະທູດ ສ ເກົາຫຼີ ປະຈຳລາວ ແລະ ກ່າວຮັບໂດຍທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ໂດຍມີພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ຊອງຊຸນ ຊິນ ກ່າວວ່າ: ການແຜ່ລະບາດຂອງພະຍາດໂຄວິດ-19 ໄດ້ຂະຫຍາຍເປັນວົງກວ້າງ ແລະ ສ ເກົາຫຼີ ກໍເປັນໜຶ່ງໃນປະເທດທີ່ໄດ້ຮັບຜົນກະທົບຕໍ່ການແຜ່ລະບາດຂອງພະຍາດໂຄວິດ-19 ສະນັ້ນ ໃນກາງເດືອນມີນາ 2020 ລັດຖະບານແຫ່ງ ສ ເກົາຫຼີ ໄດ້ເຮັດທຸກວິທີທາງເພື່ອສະກັດກັ້ນບໍ່ໃຫ້ມີການແຜ່ລະບາດ ເປັນຕົ້ນ ໄດ້ມີການເອົາໃຈໃສ່ໃນການກວດກາສຸຂະພາບຂອງປະຊາຊົນ ກວດກາໃນສະຖານທີ່ທີ່ມີຄວາມສ່ຽງ ແລະ ຜູ້ຄົນແອອັດ ພ້ອມກັນນັ້ນ ລັດຖະບານໄດ້ນຳໃຊ້ເຕັກໂນໂລຊີອັນທັນສະໄໝ ເຂົ້າມາຊ່ວຍໃນການປິ່ນປົວ ແລະ ຕິດຕາມກວດກາຫາຜູ້ຕິດເຊື້ອ ມາຮອດປັດຈຸບັນ ສ ເກົາຫຼີ ຖືວ່າສາມາດຄວບຄຸມການແຜ່ລະບາດຂອງພະຍາດໂຄວິດ-19 ໄດ້ຢ່າງມີປະສິດທິດພາບ ເຊິ່ງອົງການກອຍກາເຊື່ອໝັ້ນວ່າລັດຖະບານລາວ ໄດ້ເຮັດສຸດຄວາມສາມາດໃນການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ລວມເຖິງໃຫ້ການເບິ່ງແຍງບັນດາແຮງງານລາວ ທີ່ເດີນທາງມາຈາກຕ່າງປະເທດເປັນຢ່າງດີ ດ້ວຍເຫດຜົນດັ່ງກ່າວ ທາງອົງການກອຍກາ ຈຶ່ງໄດ້ປະກອບສ່ວນເຂົ້າໃນການຊ່ວຍເຫຼືອແຮງງານລາວຄັ້ງນີ້ ເຊັ່ນດຽວກັນ ໂດຍສະເພາະແມ່ນ ເນັ້ນໃສ່ເຮັດໃຫ້ບັນດາແຮງງານລາວທີ່ມາແຕ່ຕ່າງປະເທດ ໃຫ້ໄດ້ມີອຸປະກອນປ້ອງກັນທີ່ຈຳເປັນເພື່ອປ້ອງກັນ ຢຸດການແຜ່ລະບາດຂອງໄວຣັສ ແລະ ແກ້ໄຂຊີວິດການເປັນຢູ່ຂັ້ນພື້ນຖານ.
ທ່ານ ອາລຸນໄຊ ສູນນະລາດ ໄດ້ກ່າວສະແດງຄວາມຂອບໃຈຕໍ່ການຊ່ວຍເຫຼືອຄັ້ງນີ້ ໃນໄລຍະຜ່ານມາ ທາງອົງການກອຍກາ ແລະ ສູນກາງຊາວໝຸ່ມປະຊາຊົນປະຕິວັດລາວ ໄດ້ເຄີຍຈັດຕັ້ງປະຕິບັດກິດຈະກຳຮ່ວມກັນ ໃນການຊ່ວຍເຫຼືອຜູ້ປະສົບອຸທົກກະໄພທີ່ແຂວງອັດຕະປຶ ແລະ ນີ້ກໍຈະເປັນການຮ່ວມມືອີກໂຄງການໜຶ່ງລະຫວ່າງສອງພາກສ່ວນ ສະນັ້ນພວກເຮົາໃຫ້ຄຳໜັ້ນສັນຍາວ່າຈະນຳເຄື່ອງທີ່ໄດ້ຮັບຄັ້ງນີ້ ໄປແຈກຢາຍໃຫ້ບັນດາແຮງງານລາວທີ່ປະຈຳຢູ່ສູນຕ່າງໆໃນທົ່ວປະເທດ ແລະ ຜູ້ທີ່ໄດ້ຮັບຜົນກະທົບຈາກໂຄວິດ-19 ໃຫ້ທົ່ວເຖິງກັນ ໃນອະນາຄົນຕໍ່ໜ້າ ສຊປລ ແລະ ອົງການກອຍກາຍັງຈະໄດ້ມີຫຼາຍກິດຈະກຳຮ່ວມກັນ ເປັນຕົ້ນການເສີມສ້າງທັກສະໃຫ້ບັນດາຊາວໝຸ່ມ-ເຍົາວະຊົນ ແລະ ກິດຈະກຳອື່ນໆ ເຊິ່ງສູນກາງຊາວໜຸ່ມປະຊາຊົນປະຕິວັດລາວ ຕາງໜ້າໃຫ້ລັດຖະບານລາວ ແລະ ອາສາສະໝັກໄວໜຸ່ມຈະໄດ້ດຳເນີນການແຈກຢາຍເຄື່ອງ ຂອງທີ່ໄດ້ຮັບຈາກອົງການກອຍກາໄປຍັງບັນດາສູນຕ່າງໆທົ່ວປະເທດຢ່າງທົ່ວເຖິງ.