ໂຮງແຮມນະຄອນສັກ ເປັນໜຶ່ງໃນໂຮງແຮມທີ່ລັດຖະບານຄັດເລືອກເປັນສູນກັກກັນຊົ່ວຄາວ ໃຫ້ແຂກ ກໍຄື ບຸກຄົນ ນັກຮຽນ-ນັກສຶກສາ ນັກທຸລະກິດ ຈາກປະເທດເພື່ອນບ້ານທີ່ໄດ້ຮັບອະນຸຍາດໃຫ້ເດີນທາງເຂົ້າມາ ສປປ ລາວ ເຊິ່ງໂຮງແຮມດັ່ງກ່າວໄດ້ປະຕິບັດຕາມຄຳສັ່ງ ຄຳແນະນຳ ກໍຄື ມາດຕະການການປ້ອງກັນການຕິດເຊື້ອ ທີ່ຄະນະສະເພາະກິດວາງອອກຢ່າງເຄັ່ງຄັດ ຕໍ່ບັນດາແຂກທີ່ເຂົ້າມາໃຊ້ບໍລິການ.
ທ່ານ ແສງເພັດ ນະຄອນສັກ ປະທານໂຮງແຮມນະຄອນສັກ ໃຫ້ສຳພາດວັນທີ 25 ພຶດສະພາ 2020 ວ່າ: ໂຮງແຮມນະຄອນສັກ ໄດ້ເລີ່ມເປີດເປັນສູນກັກກັນຊົ່ວຄາວແຕ່ຕົ້ນເດືອນພຶດສະພາ 2020 ເປັນຕົ້ນມາ ເຊິ່ງໄດ້ໃຫ້ບໍລິການແກ່ລູກຄ້າຫຼາຍກວ່າ 40 ຄົນ ໃນນີ້ ຄົບກຳນົດ 14 ວັນແລ້ວຈຳນວນໜຶ່ງ ແລະ ຍັງເຫຼືອຜູ້ກັກກັນຈຳນວນໜຶ່ງ ໃນນີ້ ໂຮງແຮມໄດ້ວາງມາດຕະການປ້ອງກັນການຕິດເຊື້ອຢ່າງເຄັ່ງຄັດ ເປັນຕົ້ນ ມີການວັດແທກອຸນຫະພູມທຸກວັນ ແຂກທີ່ເຂົ້າມາໃຊ້ບໍລິການຈະຕ້ອງຢູ່ໃນຫ້ອງຕະຫຼອດ 24 ຊົ່ວໂມງ ຫ້າມຄົນອື່ນເຂົ້າພົບ ໂດຍພະນັກງານໂຮງແຮມຈະອຳນວຍຄວາມສະດວກຕ່າງໆໃຫ້ ໂດຍສະເພາະ ອາຫານ ເຄື່ອງດື່ມ (3 ຄາບຕໍ່ວັນ) ໄປປະໄວ້ໜ້າຫ້ອງ ແລ້ວໃຫ້ຜູ້ກ່ຽວອອກມາເອົາເອງ ແນໃສ່ເວັ້ນໄລຍະຫ່າງ ພ້ອມນີ້ຍັງໄດ້ວາງມາດຕະການຮັກສາຄວາມສະອາດຢ່າງເຄັ່ງຄັດ ໂດຍການສີດຢາຂ້າເຊື້ອທັງພາຍໃນ ແລະ ອ້ອມຮອບບໍລິເວນໂຮງແຮມເປັນປະຈຳທຸກວັນ ແຂກພາຍໃນນະຄອນຫຼວງ ແລະ ຕ່າງແຂວງ ບໍ່ໃຫ້ເຂົ້າມາໃຊ້ບໍລິການ ເພື່ອປ້ອງກັນການຕິດເຊື້ອໂຄວິດ-19.
ສຳລັບແຂກທີ່ຈະເຂົ້າມາໃຊ້ບໍລິການ ຕ້ອງຜ່ານການກວດຫາເຊື້ອພະຍາດໂຄວິດ-19 ແລະ ຕ້ອງມີໃບຢັ້ງຢືນຈາກແພດ-ໝໍ ຫຼື ຄະນະສະເພາະກິດ ຈິ່ງສາມາດເຂົ້າມາໃຊ້ບໍລິການໄດ້ ຂະນະດຽວກັນໂຮງແຮມຍັງມີແພດ-ໝໍ ເຈົ້າໜ້າທີ່ຕຳຫຼວດມາປະຈຳ ເພື່ອຕິດຕາມ ແລະ ວັດແທກອຸນຫະພູມ ແຂກທີ່ເຂົ້າມາໃຊ້ບໍລິການທຸກວັນ ຖ້າພົບວ່າມີອາການຜິດປົກກະຕິ ຫຼື ອຸນຫະພູມສູງເກີນກຳນົດ ກໍຈະນຳສົ່ງໄປໂຮງໝໍທັນທີ.