ທ່ານ ແອ໋ງພອນ ແພງສຸວັນ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດ ລ້ອມ ນະຄອນຫຼວງວຽງຈັນ ໃຫ້ສຳພາດວັນທີ 26 ພຶດສະພາ 2020 ວ່າ: ລັດຖະບານ ສປປ ລາວ ເຫັນໄດ້ຄວາມສຳຄັນຂອງວຽກງານສິ່ງແວດລ້ອມ ເຊິ່ງໄດ້ຍົກຂຶ້ນມາປຸກລະດົມໃຫ້ພໍ່ແມ່ປະຊາຊົນລາວບັນດາເຜົ່າ ຊ່ວຍກັນປົກປັກຮັກສາສິ່ງແວດລ້ອມໃຫ້ມີຄວາມຍືນຍົງ ຄົງຕົວຢູ່ກັບປະຊາຊົນ ແລະ ຊາດລາວຕະຫຼອດໄປ ສະນັ້ນຈຶ່ງໄດ້ກຳນົດເອົາວັນທີ 5 ມິຖຸນາ ຂອງທຸກໆປີເປັນວັນສະເຫຼີມສະຫຼອງວັນສິ່ງແວດລ້ອມແຫ່ງຊາດ ໂດຍກຳນົດຢູ່ໃນກົດໝາຍວ່າດ້ວຍການປົກປັກຮັກສາສິ່ງແວດລ້ອມໃນມາດຕາ 89 ແລະ ເປັນວັນດຽວກັນກັບວັນສິ່ງແວດລ້ອມໂລກ ການກຳນົດວັນດຽວກັນ ຍ້ອນວ່າລັດຖະບານເຫັນວຽກງານຄຸ້ມຄອງປົກປັກຮັກສາສິ່ງແວດລ້ອມເປັນວຽກງານສຳຄັນ ແລະ ນຳເອົາຂະບວນການສະເຫຼີມສະຫຼອງວັນສິ່ງແວດລ້ອມແຫ່ງຊາດ ຕິດພັນກັບຂະບວນການສາກົນ ເຮັດໃຫ້ມີຂະບວນການຟົດຟື້ນ ແນໃສ່ເຮັດໃຫ້ຄົນຮຸ່ນໜຸ່ມ ເຍົາວະຊົນ ປັນຍາຊົນເຫັນໄດ້ຄວາມສຳຄັນຕໍ່ວຽກງານປົກປັກຮັກສາສິ່ງແວດລ້ອມ.
ສຳລັບປີ 2020 ນີ້ ຄະນະພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນວ ຈະໄດ້ຈັດງານສະເຫຼີມສະຫຼອງວັນສິ່ງແວດລ້ອມຂຶ້ນຢູ່ທີ່ພະແນກດັ່ງກ່າວໃນວັນທີ 6 ມິຖຸນາ 2020 ເຊິ່ງງານດັ່ງກ່າວປະກອບມີ 4 ກິດຈະກຳຄື: ສະເຫຼີມວັນສິ່ງແວດລ້ອມໂລກ 5 ມິຖຸນາ ຄົບຮອບ 48 ປີ ພາຍໃຕ້ຄຳຂວັນ ເຖິງເວລາຕ້ອງປົກປັກຮັກສາທຳມະຊາດ ສະເຫຼີມສະຫຼອງວັນສິ່ງແວດລ້ອມແຫ່ງຊາດ ພາຍໃຕ້ຄຳຂວັນ ພັດທະນາໄປຕາມທິດຍຶນຍົງ ຂຽວສະອາດ ແລະ ງາມຕາ ຄືປາຖະໜາຂອງຊາວນະຄອນຫຼວງວຽງຈັນ ແລະ ສະເຫຼີມສະຫຼອງວັນປູກຕົ້ນໄມ້ແຫ່ງຊາດ 1 ມິຖຸນາ ໃນນີ້ຈະເນັ້ນຄຸນນະພາບ ປະສິດທິຜົນຂອງການປູກຕົ້ນໄມ້ ເຊິ່ງພະນັກງານ-ລັດຖະກອນເກືອບ 200 ຄົນ ຜູ້ໜຶ່ງຕ້ອງປູກຕົ້ນໄມ້ໃຫ້ໄດ້ 1 ຕົ້ນພາຍໃນສຳນັກງານຂອງຕົນເອງ ພິເສດປູກແລ້ວຕ້ອງບົວລະບັດຮັກສາຕົ້ນໄມ້ໃຫ້ໃຫຍ່ ນອກນີ້ຍັງຈະໄດ້ເປີດໂຄງການຂຽວ ສະອາດ ງາມຕາອີກດ້ວຍ.
ສຳລັບການຈັດກິດຈະກຳສະເຫຼີມສະຫຼອງດັ່ງກ່າວ ແມ່ນຈະຈັດໃນວົງແຄບ ເນັ້ນດ້ານເນື້ອໃນ ໃນນີ້ຈະໄດ້ເຊີນເອົາບັນດາຄະນະນຳຂັ້ນສູງຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຄະນະນຳຂັ້ນສູງ ນະຄອນຫຼວງວຽງຈັນ ຕະຫຼອດຮອດຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ 9 ຕົວເມືອງເຂົ້າຮ່ວມ.
# ຂ່າວ & ພາບ: ຂັນທະວີ