ພິທີມອບ-ຮັບເຄື່ອງກວດຫາເຊື້ອພະຍາດ COVID-19 ຈັດຂຶ້ນວັນທີ 26 ພຶດສະພາ 2020 ຢູ່ກະຊວງສາທາລະນະສຸກ ເຊິ່ງມອບໂດຍທ່ານ Vladimir Kalinin ເອກອັກຄະລັດຖະທູດສະຫະພັນຣັດເຊຍ ປະຈຳ ສປປ ລາວ ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ມີພາກສ່ວນກ່ຽວຂ້ອງເຂົ້າຮ່ວມ.
ການມອບ-ຮັບອຸປະກອນການແພດຄັ້ງນີ້ ປະກອບມີເຄື່ອງກວດຫາເຊື້ອພະຍາດ COVID-19 ຈຳນວນ 10 ຊຸດ ສາມາດກວດຫາເຊື້ອພະຍາດໄດ້ 1.000 ຄັ້ງ ແລະ ຜ້າອັດປາກ-ດັງ 10.000 ອັນ ເຊິ່ງເຄື່ອງດັ່ງກ່າວຈະມອບໃຫ້ສູນວິເຄາະ ແລະ ລະບາດວິທະຍາ ກະຊວງສາທາລະນະສຸກ ເພື່ອນຳໃຊ້ໃນການວິເຄາະຫາເຊື້ອພະຍາດ COVID-19.
ທ່ານ ບຸນກອງ ສີຫາວົງ ໄດ້ສະແດງຄວາມຂອບໃຈລັດຖະບານສະຫະພັນຣັດເຊຍ ທີ່ໄດ້ສະໜັບສະໜູນອຸປະກອນການແພດ ເພື່ອປ້ອງກັນພະຍາດ COVID-19 ແກ່ ສປປ ລາວ ຄັ້ງນີ້ ພ້ອມທັງຢືນຢັນຈະນຳໃຊ້ອຸປະກອນດັ່ງກ່າວ ເຂົ້າໃນວຽກງານປ້ອງກັນພະຍາດດັ່ງກ່າວ ໃຫ້ເກີດປະໂຫຍດສູງສຸດ.
# ຂ່າວ & ພາບ: ເພັດສະໝອນ