ພິທີມອບ-ຮັບເຄື່ອງຊ່ວຍເຫຼືອອຸປະກອນຫ້ອງວິເຄາະຈາກ ສ ອາເມຣິກາ ໃຫ້ ສປປ ລາວ ຈັດຂຶ້ນວັນທີ 26 ພຶດສະພາ 2020 ຢູ່ສູນວິເຄາະ ແລະ ລະບາດວິທະຍາ ເຊິ່ງມອບໂດຍທ່ານ ປີເຕີ ເຮມ໋ອນ ເອກອັກຄະລັດຖະທູດ ສ ອາເມຣິກາ ປະຈຳ ສປປ ລາວ ແລະ ຮັບໂດຍທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ມີພາກສ່ວນກ່ຽວຂ້ອງ ເຂົ້າຮ່ວມ.
ການມອບເຄື່ອງຊ່ວຍເຫຼືອຄັ້ງນີ້ ເປັນການມອບອຸປະກອນການແພດເພີ່ມອີກຈຳນວນໜຶ່ງຈາກ ສ ອາເມຣິກາ ເພື່ອຊ່ວຍເຫຼືອ ສປປ ລາວ ຕໍ່ສູ້ກັບພະຍາດໂຄວິດ-19 ໃນນີ້ ປະກອບມີນ້ຳຢາລ້ຽງເຊື້ອໄວຣັສ ສຳລັບເກັບຕົວຢ່າງສົ່ງຫ້ອງວິເຄາະ (VTMs) ທີ່ສະໜອງໃຫ້ໂດຍອົງການທາງການກຸສົນ ສ ອາເມຣິກາ (Spirit of America) ເຄື່ອງກັ່ນຕອງອາກາດແບບພິເສດສຳລັບຫ້ອງທົດລອງ (Specialized Laboratory Air Filters) ແລະ ເຄື່ອງອົບຂ້າເຊື້ອ ສະໜອງໃຫ້ໂດຍລັດຖະບານ ສ ອາເມຣິກາ ໂດຍຜ່ານອົງການຫຼຸດຜ່ອນໄພຂົ່ມຂູ່ດ້ານໄພພິບັດ (DTRA) ແລະ ອຸປະກອນທົດລອງສຳລັບກວດຫາຜູ້ຕິດເຊື້ອ ລວມມີເຄື່ອງ RT-PCR ທີ່ສະໜອງໂດຍ IAEA ທີ່ໄດ້ຮັບທຶນຈາກ ສ ອາເມຣິກາ.
ທ່ານ ປີເຕີ ເຮມ໋ອນ ກ່າວວ່າ: ການມອບເຄື່ອງຄັ້ງນີ້ເປັນການຊ່ວຍຄັ້ງຫຼ້າສຸດຈາກ ສ ອາເມຣິກາ ໃນຂະນະທີ່ ສປປ ລາວ ສືບຕໍ່ຮັບມືກັບພະຍາດໂຄວິດ-19 ໃນເດືອນກຸມພາຜ່ານມາ ພວກເຮົາເປັນປະເທດທຳອິດທີ່ໃຫ້ການຊ່ວຍເຫຼືອ ແລະ ຈະສືບຕໍ່ໄປເລື້ອຍໆ ພ້ອມນີ້ກໍກຳລັງຕອບສະໜອງຕາມຄວາມຕ້ອງການຂອງລັດຖະບານລາວ ໃນການຮ່ວມກັນຮັບມືກັບພະຍາດທີ່ຮ້າຍແຮງດັ່ງກ່າວ ເຊິ່ງອຸປະກອນເຫຼົ່ານີ້ ຈະນຳໃຊ້ໃນຫ້ອງທົດລອງຂອງລັດຖະບານລາວ ເພື່ອຂະຫຍາຍການກວດຫາຜູ້ຕິດເຊື້ອໃຫ້ຫຼາຍຂຶ້ນ ໃນຂະນະທີ່ພວກເຂົາກຳລັງສືບຫາ ແລະ ຕິດຕາມຜູ້ທີ່ໄດ້ພົບປະກັບຜູ້ຕິດເຊື້ອທີ່ຜ່ານມາ ການຊ່ວຍເຫຼືອດ້ານສາທາລະນະສຸກຄັ້ງນີ້ ຍັງເປັນການຊ່ວຍເຫຼືອຄັ້ງຫຼ້າສຸດໃນການຮ່ວມມື ສືບເນື່ອງລະຫວ່າງ ສ ອາເມຣິກາ ແລະ ສປປ ລາວ ທີ່ໄດ້ໃຫ້ການສະໜັບສະໜູນການເຝິກອົບຮົມໃຫ້ເຈົ້າໜ້າທີ່ສາທາລະນະສຸກ ຂັ້ນສູນກາງ ແລະ ທ້ອງຖິ່ນ ນັບຕັ້ງແຕ່ປີ 2006 ເປັນຕົ້ນມາ.