ຕ້ອງຍອມຮັບວ່ານັບແຕ່ເດືອນເມສາມາຮອດປັດຈຸບັນ ກະແສຂ່າວກ່ຽວກັບການເໜັງຕີງຂອງລາຄາໄຟຟ້າມາແຮງຫຼາຍ ໂດຍສະເພາະແມ່ນພາຍຫຼັງບິນໄຟຟ້າເດືອນພຶດສະພາ 2020 ເຂົ້າມາ ຖືວ່າເປັນບິນເຈົ້າບັນຫານໍ ? ເຖິງແມ່ນວ່າຄະນະນຳຂອງບໍລິສັດໄຟຟ້າອອກມາຊີ້ແຈງ ແຕ່ຫາງສຽງສັງຄົມຍັງບໍ່ໂລ່ງ.
ໃບບິນເດືອນພຶດສະພາ ເຈົ້າບັນຫານີ້ມີຊ່ອງຫວ່າງຢູ່ສອງຈຸດຄື: ຈຸດທີໜຶ່ງແມ່ນນຳໃຊ້ການຄິດໄລບໍ່ກົງກັບແຈ້ງການເລກທີ 394/ຫສນຍ ເຊິ່ງກຳນົດວ່າລາຄາໃໝ່ໃຫ້ເລີ່ມປະຕິບັດແຕ່ວັນທີ 02 ພຶດສະພາ ເຖິງ 30 ທັນວາ 2025 ນັ້ນກໍໝາຍຄວາມວ່າລາຄາໃໝ່ ຕ້ອງຖືກຄິດໄລ່ໃນໃບບິນເດືອນມິຖຸນາ 2020 ຫາກບໍ່ແມ່ນເປັນເດືອນພຶດສະພາ ເຊິ່ງແມ່ນຕົວເລກການຊົມໃຊ້ຂອງເດືອນເມສາ ຈຸດທີສອງ ແຈ້ງການໄດ້ກຳນົດສຳລັບທີ່ຢູ່ອາໃສແມ່ນມີການຄິດໄລ່ລາຄາສອງຂັ້ນ ແຕ່ໃບບິນເດືອນພຶດສະພາທີ່ເຖິງມືຜູ້ຊົມໃຊ້ແມ່ນຄິດໄລ່ລາຄາດຽວ 710 ກີບ ແຕ່ມີນະໂຍບາຍສຳລັບຜູ້ໃຊ້ໄຟບໍ່ເກີນ 150 ກິໂລວັດໂມງຕໍ່ເດືອນ ຄິດໄລ່ 355 ກີບ.
ມີຜູ້ຕັ້ງບັນຫາວ່າ: ໃນສະພາບວິກິດຈາກການແຜ່ລະບາດຂອງພະຍາດໂຄວິດ-19 ລັດຖະບານໄດ້ອອກຂໍ້ຕົກລົງເລກທີ 31/ນຍ ລົງວັນທີ 02 ເມສາ 2020 ວ່າ: ໃຫ້ຄົ້ນຄວ້າຜ່ອນຜັນລາຄາ ແລະ ຕໍ່ເວລາໃນການຊຳລະຄ່າໄຟຟ້າ ແລະ ນ້ຳປະປາຂອງຜູ້ຊົມໃຊ້ຄົວເຮືອນ ແລະ ພາກທຸລະກິດ.
ແຕ່ການໂປໂລອອກມາຂອງໃບບິນເຈົ້າບັນຫາເດືອນພຶດສະພາ ພັດບໍ່ເປັນໄປຕາມນັ້ນ ມີແຕ່ນ້ຳປະປາປະກາດຫຼຸດ 5% ຂອງຄ່ານ້ຳໃນເດືອນທີ່ຕໍ່ສູ້ກັບໂຄວິດ-19 ແລະ ຄ່າເກັບຂີ້ເຫຍື້ອຢູ່ນະຄອນຫຼວງວຽງຈັນ ປະກາດເກັບລາຄາແຕ່ເຄິ່ງໜຶ່ງ (50%).
ເມື່ອມີປາກົດການແນວນັ້ນ ກໍມີຫາງສຽງສະເໜີໃຫ້ລະງັບບິນຄ່າໄຟຟ້າເດືອນພຶດສະພາໄວ້ກ່ອນ ແລ້ວຄົ້ນຄວ້າຄືນໃໝ່ ວ່າຈະເອົາແບບເກົ່າທີ່ຄິດໄລ່ 6 ຂັ້ນ ຫຼື ຕາມແຈ້ງການເລກທີ 394/ສຫນຍ ທີ່ໃຫ້ເລີ່ມປະຕິບັດລາຄາໃໝ່ແຕ່ວັນທີ 01 ພຶດສະພາ ເຖິງ 31 ທັນວາ 2025.
ເຊິ່ງໃນແຈ້ງການໄດ້ລະບຸລາຄາໄຟຟ້າສຳລັບທີ່ຢູ່ອາໃສມີສອງຂັ້ນຄື: ແຕ່ 0-150 ກິໂລວັດໂມງແມ່ນລາຄາຕ່ຳສຸດ 355 ກີບຕໍ່ໜຶ່ງກິໂລວັດໂມງ ແລະ ຫຼາຍກວ່າ 150 ກິໂລວັດໂມງ ແມ່ນ 710 ກີບຕໍ່ໜຶ່ງກິໂລວັດໂມງ ນີ້ແມ່ນລາຄາຕໍ່ເດືອນ ລາຄານີ້ແມ່ນຈະເພີ່ມຂຶ້ນຈົນເຖິງປີ 2025 ເຊິ່ງລາຄາຕ່ຳສຸດແມ່ນ 373 ກີບ ແລະ ສູງສຸດ 746 ກີບ ແຕ່ແລ້ວທາງອອກກໍໂປໂລອອກມາ ປານວ່າຝົນຮ່າໃຫຍ່ຖອກເທລົງມາດັບຄວາມຮ້ອນ ເຮັດໃຫ້ທົ່ວສັງຄົມຊື່ນຊົມຍິນດີ.
ເມື່ອກອງປະຊຸມລັດຖະບານສະໄໝສາມັນ ປະຈຳເດືອນພຶດສະພາ ທີ່ໄຂຂຶ້ນໃນວັນທີ 21 ແລະ ປິດລົງໃນວັນທີ 22 ພຶດສະພາ 2020 ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ມີບັນດາທ່ານຮອງນາຍົກລັດຖະມົນຕີ ລັດຖະມົນຕີ ສະມາຊິກລັດຖະບານເຂົ້າຮ່ວມຢ່າງພ້ອມພຽງ ກອງປະຊຸມໄດ້ພິຈາລະນາຫຼາຍບັນຫາສຳຄັນ ເຊິ່ງໃນນັ້ນມີຂໍ້ທີ 5 ກ່າວວ່າ “… ໃຫ້ກະຊວງພະລັງງານ ແລະ ບໍ່ແຮ່ ກວດກາຄືນກ່ຽວກັບຄ່າກະແສໄຟຟ້າ ເຫັນວ່າສັງຄົມມີຄວາມສົນໃຈຫຼາຍ ເນື່ອງຈາກຄ່າບໍລິການຊົມໃຊ້ກະແສໄຟຟ້າເພີ່ມຂຶ້ນສູງ ພ້ອມນີ້ກໍໃຫ້ອະທິບາຍຊີ້ແຈງຢ່າງສົມເຫດສົມຜົນ ກ່ຽວກັບຄ່າກະແສໄຟຟ້າໃຫ້ສັງຄົມມີຄວາມເຂົ້າໃຈ ແລະ ມີຄວາມສະຫງົບ ພ້ອມນັ້ນກໍໃຫ້ກວດຄືນລະບົບການຕິດຕັ້ງ ແລະ ເດີນສາຍໄຟຟ້າ ໃນໄລຍະຜ່ານມານີ້ ເຫັນວ່າຈຳນວນອັກຄີໄພເພີ່ມຫຼາຍຂຶ້ນ ໂດຍສະເພາະ ໄຟຟ້າລັດວົງຈອນ ເຮັດໃຫ້ບ້ານເຮືອນຂອງປະຊາຊົນຖືກໄຟໄໝ້ ແລະ ກະທົບຕໍ່ການດຳລົງຊີວິດຂອງເຂົາເຈົ້າ….”
ມາຮອດນີ້ແລ້ວ ! ກໍຂໍໃຫ້ທົ່ວສັງຄົມຕັ້ງສະຕິ ບໍ່ແຕກຕື່ນຕາມແຫຼ່ງຂ່າວຕ່າງໆ ລໍຟັງແຈ້ງການຈາກກະຊວງພະລັງງານ ແລະ ບໍ່ແຮ່ ຜູ້ດຽວ ວ່າເພິ່ນຈະວ່າຢ່າງໃດ ? ເພາະເພິ່ນຖືກມອບໝາຍແລ້ວ… ການຈ່າຍຄ່າໄຟຟ້າຂອງເດືອນພຶດສະພາກໍບໍ່ຟ້າວຈ່າຍນໍ ? ຄິດວ່າຄົງບໍ່ຖືກຕັດໄຟດອກ ເພາະຂ່າວຫຼ້າສຸດຈາກບໍລິສັດໄຟຟ້າ ເພິ່ນໃຫ້ແກ່ຍາວການສຳລະໄປອີກ 45 ວັນ ນັບແຕ່ມື້ໄດ້ຮັບໃບບິນ.
ມີສະຕິເວລາເບິ່ງຂ່າວກ່ຽວກັບການເໜັງຕີງຂອງລາຄາໄຟຟ້າ…
ໂດຍ: ແນວລາວ