ມື້ນີ້ ຂໍພາທ່ານຜູ້ອ່ານໄປຮູ້ຈັກກັບວິທີການຂອງມາເລເຊຍ ໃຫ້ການຊຸກຍູ້ການນຳໃຊ້ສະກຸນເງິນພາຍໃນ ເລື່ອງກຳປູເຈຍສັ່ງຫ້າມສົ່ງອອກດິນຊາຍ ແລະ ມາດຕະການຫຼຸດຜ່ອນການໃຊ້ພະລັງງານຖ່ານຫີນ ເພື່ອປົກປັກຮັກສາສິ່ງແວດລ້ອມໃນຈີນ.
ທີ່ ມາເລເຊຍ: ເມື່ອປະມານ 3 ປີປາຍຢ້ອນຫຼັງ (KPL 06/12/2016) ທະນາຄານກາງຂອງປະເທດມາເລເຊຍ ໄດ້ເຜີຍແຜ່ໃຫ້ຮູ້ກ່ຽວກັບມາດຕະການສົ່ງເສີມການໃຊ້ຣິງກິດ ເຊິ່ງເປັນສະກຸນເງິນຂອງປະເທດນີ້ ໂດຍມີເປົ້າໝາຍເພື່ອລົດຄວາມສ່ຽງດ້ານມູນຄ່າຂອງສະກຸນເງິນພາຍໃນ ເມື່ອທຽບກັບເງິນໂດລາສະຫະລັດ ມາດຕະການດັ່ງກ່າວ ໄດ້ກຳນົດໃຫ້ຜູ້ປະກອບການທຸລະກິດສົ່ງອອກ ຕ້ອງກຳນົດລາຍຮັບຈາກການສົ່ງອອກເປັນສະກຸນເງິນຣິງກິດເຖິງ 75% ນັບແຕ່ວັນທີ 5 ເດືອນພະຈິກ ປີ 2016 ເປັນຕົ້ນມາ.
ກ່ອນໜ້າມີມາດຕະການນີ້ ບັນດາຜູ້ສົ່ງອອກມີພັນທະໂອນເງິນເຂົ້າປະເທດມາເລເຊຍພາຍໃນ 3 ເດືອນ ພາຍຫຼັງສຳເລັດການເຮັດທຸລະກຳ ດັ່ງນັ້ນ ຜູ້ສົ່ງອອກຈຳນວນຫຼາຍ ຈຶ່ງມັກຈະຮັກສາເງິນໂດລາສະຫະລັດຂອງພວກຕົນໄວ້ໃນທະນາຄານດົນໆ ເພື່ອໃຫ້ດອກເບ້ຍເພີ່ມຂຶ້ນ ເຊິ່ງເປັນຜົນເຮັດໃຫ້ຄ່າຂອງເງິນຣິງກິດອ່ອນຕົວລົງ ນັບແຕ່ຕົ້ນປີ 2015 ເປັນຕົ້ນມາ.
ນອກຈາກການຊຸກຍູ້ໃຫ້ນຳໃຊ້ສະກຸນເງິນພາຍໃນຫຼາຍຂຶ້ນແລ້ວ ທະນາຄານກາງຂອງມາເລເຊຍ ຍັງໄດ້ຈຳກັດຈຳນວນເງິນຕາຕ່າງປະເທດ ທີ່ນັກລົງທຶນສາມາດນຳໃຊ້ ເພື່ອການລົງທຶນຢູ່ພາຍໃນ ແລະ ຢູ່ຕ່າງປະເທດ ຄື: ຖ້າເປັນການຈັດຕັ້ງນັ້ນ ກໍສາມາດລົງທຶນເປັນເງິນຕາຕ່າງປະເທດໃນມູນຄ່າເທົ່າກັບ 50 ລ້ານຣິງກິດ ຖ້າເປັນການລົງທຶນສ່ວນບຸກຄົນກໍຈະຢູ່ໃນມູນຄ່າ 1 ລ້ານຣິງກິດ.
ທີ່ ກຳປູເຈຍ: ກົດໝາຍວ່າດ້ວຍສິ່ງແວດລ້ອມສະບັບໃໝ່ຂອງກຳປູເຈຍ ທີ່ມີຜົນບັງຄັບໃຊ້ນັບແຕ່ວັນທີ 10 ເດືອນກໍລະກົດ ປີ 2017 ນັ້ນ ໄດ້ມີຂໍ້ກຳນົດຫ້າມສົ່ງອອກດິນຊາຍຈາກແຄມຝັ່ງໄປຕ່າງປະເທດ ການກຳນົດຂໍ້ຫ້າມນີ້ ກໍຍ້ອນວ່າໃນໄລຍະຜ່ານມາໄດ້ມີການຂຸດຄົ້ນ ແລະ ສົ່ງອອກດິນຊາຍໄປສິງກະໂປຫຼາຍໂພດ ເຊິ່ງໄດ້ສ້າງຄວາມເສຍຫາຍໃຫ້ແກ່ຊຸມຊົນທ້ອງຖິ່ນ ແລະ ທຳລາຍລະບົບນິເວດ ໂດຍສະເພາະແມ່ນໃນແຂວງເກາະກົງ ທາງທິດຕາເວັນຕົກສຽງໃຕ້ຂອງກຳປູເຈຍ ແລະ ຕາມແຄມຝັ່ງແມ່ນ້ຳຂອງ.
ວ່າກັນວ່າ ກົດໝາຍສະບັບນີ້ແມ່ນຜົນງານຂອງເຫຼົ່ານັກເຄື່ອນໄຫວ ເພື່ອປົກປັກຮັກສາສິ່ງແວດລ້ອມ ທີ່ຕ້ອງການໃຫ້ຢຸດເຊົາການສົ່ງອອກດິນຊາຍໄປຕ່າງປະເທດ ສ່ວນການຊື້-ຂາຍດິນຊາຍພາຍໃນປະເທດນັ້ນ ຍັງສືບຕໍ່ໄດ້ຄືເກົ່າ ພ້ອມໆກັບຄວາມຍິນດີຕໍ່ກົດໝາຍສະບັບນີ້ ບັນດານັກເຄື່ອນໄຫວປົກປ້ອງສິ່ງແວດລ້ອມ ຍັງໄດ້ສະແດງຄວາມກັງວົນໃຈ ເພາະວ່າໃນໄລຍະຜ່ານມາ ທາງການກໍເຄີຍໄດ້ສັ່ງຫ້າມສົ່ງອອກດິນຊາຍມາແລ້ວ ແຕ່ຫຼາຍໆບໍລິສັດພັດຍັງສາມາດສົ່ງອອກດິນຊາຍໄປຕ່າງປະເທດຢູ່ຄືເກົ່າ.
ທີ່ ສປ ຈີນ: ໃນສະໜາມຮົບຕ້ານມົນລະພິດທາງອາກາດທີ່ ສປ ຈີນ ໄດ້ຮັບຜົນກະທົບຢ່າງໜັກໜ່ວງໃນແຕ່ລະປີນັ້ນ ທາງການໄດ້ນຳໃຊ້ຫຼາຍມາດຕະການ ໜຶ່ງໃນນັ້ນ ກໍຄືການຫຼຸດປະລິມານການນຳໃຊ້ຖ່ານຫີນລົງ.
ແຫຼ່ງຂ່າວ ຂປລ ໃນຕົ້ນເດືອນມີນາ ປີ 2019 ໃຫ້ຮູ້ວ່າ: ສະມາຄົມອຸດສາຫະກຳຖ່ານຫີນຈີນ ໄດ້ເຜີຍໃຫ້ຮູ້ວ່າ: ມາຮອດໄລຍະທ້າຍປີ 2018 ບໍ່ຖ່ານຫີນຂອງຈີນໄດ້ຫຼຸດລົງເຫຼືອຈຳນວນ 5.800 ແຫ່ງ ເຊິ່ງມີກຳລັງການຜະລິດໂດຍສະເລ່ຍ ປະມານ 920.000 ໂຕນຕໍ່ປີ ໂດຍລວມແລ້ວ ອຸດສາຫະກຳພະລັງງານນັ້ນ ໄດ້ໃຊ້ພະລັງງານຖ່ານຫີນ ຈຳນວນ 2.100 ລ້ານໂຕນ ແລະ ອຸດສາຫະກຳເຫຼັກ ໃຊ້ພະລັງງານຖ່ານຫີນ 620 ລ້ານໂຕນ ແລະ ອື່ນໆ.