ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຖະແຫຼງຂ່າວຕໍ່ສື່ມວນຊົນໃນວັນທີ 26 ພຶດສະພາ 2020 ທີ່ສູນປະຕິບັດງານຄະນະສະເພາະກິດ ຄວບຄຸມພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (Covid-19) ວ່າ: ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 17:00 ໂມງ ຂອງວັນທີ 25 ພຶດສະພາ 2020 ຈຳນວນຜູ້ເດີນທາງເຂົ້າມາ ມີທັງໝົດ 1.934 ຄົນ ຈຸດຜ່ານດ່ານລາວ-ໄທ ທັງໝົດ 1.093 ຄົນ ໃນນັ້ນ ມີແຮງງານກັບຈາກໄທ 30 ຄົນ ເຊິ່ງຜ່ານດ່ານສາກົນວັງເຕົ່າ 28 ຄົນ ແລະ ຜ່ານດ່ານຂົວມິດຕະພາບ ແຫ່ງທີ 2 ແຂວງສະຫວັນນະເຂດ 2 ຄົນ ເຫຼືອນັ້ນ ແມ່ນຄົນຂັບລົດຂົນສົ່ງສິນຄ້າ ຜ່ານດ່ານລາວ-ຈີນ ທັງໝົດ 4 ຄົນ ໃນນັ້ນ ມີແຮງງານລາວກັບຈາກຈີນ 1 ຄົນ ຈຸດຜ່ານດ່ານລາວ-ຫວຽດ ທັງໝົດ 777 ຄົນ ທັງໝົດແມ່ນຜູ້ຂັບລົດຂົນສົ່ງສິນຄ້າ ຈຳນວນຜູ້ເດີນທາງຜ່ານສະໜາມບິນສາກົນວັດໄຕ ມີທັງໝົດ 60 ຄົນ ໃນນັ້ນ ມີນັກສຶກສາລາວ 3 ຄົນ ແລະ ແຮງງານຈີນທີ່ມາສ້າງທາງລົດໄຟ 57 ຄົນ ໃນທຸກດ່ານແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.
ການເຝົ້າລະວັງ ແລະ ວິເຄາະ ໃນວັນທີ 25 ພຶດສະພາ 2020 ໄດ້ເກັບຕົວຢ່າງມາກວດວິເຄາະທັງໝົດ 60 ຄົນ ໃນນັ້ນມີແຮງງານລາວທີ່ກັບມາແຕ່ໄທ 25 ຄົນ ແຮງງານລາວກັບມາແຕ່ຈີນ 31 ຄົນ ກໍລະນີສົງໄສ 1 ຄົນ ແລະ ຄົນເຈັບຕິດເຊື້ອນອນປີ່ນປົວຢູ່ໂຮງໝໍມິດຕະພາບທີ່ເກັບຕົວຢ່າງມາກວດຄືນ 3 ຄົນ ສ່ວນແຮງງານລາວທີ່ກັບມາຈາກປະເທດໄທ 25 ຄົນ ເຊິ່ງມາຈາກທ້ອງຖີ່ນແຕ່ລະແຂວງ ຄື:ຈຳປາສັກ 12 ຄົນ ສາລະວັນ 5 ຄົນ ສະຫວັນນະເຂດ 4 ຄົນ ຄຳມ່ວນ 2 ຄົນ ຫຼວງພະບາງ 1 ຄົນ ອັດຕະປື 1 ຄົນ ແຮງງານລາວທີ່ກັບມາຈາກປະເທດຈີນ 1 ຄົນ ເຊິ່ງມາຈາກທ້ອງຖີ່ນຢູ່ແຂວງຫຼວງນ້ຳທາ ຜົນກວດແຮງງານລາວ ແລະ ກໍລະນີສົງໄສທັງໝົດທີ່ກວດມື້ວານນີ້ ບໍ່ພົບເຊື້ອ ສຳລັບຜົນກວດຄົນເຈັບຕິດເຊື້ອ 3 ຄົນ ໃຫ້ຜົນລົບ 2 ຄົນ ໝາຍຄວາມວ່າໃນວັນທີ 25 ພຶດສະພາ 2020 ບໍ່ມີຜູ້ຕິດເຊື້ອໃໝ່ ສັງລວມການກວດວິເຄາະ ແຕ່ເດືອນມັງກອນ ຮອດວັນທີ 25 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 5.855 ຕົວຢ່າງ ກວດພົບເຊື້ອສະສົມ 19 ຄົນ (44 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).
ການຕິດຕາມຜູ້ຈຳກັດບໍລິເວນຢູ່ສະຖານທີ່ຈຳກັດບໍລິເວນຕ່າງໆທົ່ວປະເທດ ປັດຈຸບັນນີ້ ທົ່ວປະເທດມີສູນຈຳກັດບໍລິເວນທັງໝົດ 90 ສູນ ມີຜູ້ຈຳກັດບໍລິເວນຢູ່ສູນ 3.756 ຄົນ ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ມີຜູ້ຕິດເຊື້ອ ສ່ວນການຕິດຕາມປີ່ນປົວຄົນເຈັບຢູ່ໂຮງໝໍ ປັດຈຸບັນມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ ຍິງ 4 ຄົນ ທັງໝົດເຫັນວ່າມີອາການປົກກະຕິ ຈະໄດ້ສືບຕໍ່ຕິດຕາມຕໍ່ໄປຈົນກວ່າຈະກວດຫາເຊື້ອບໍ່ພົບ.
ການຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ ເຫັນວ່າ: ມາຮອດເວລາ 6:00 ໂມງເຊົ້າຂອງວັນທີ 26 ພຶດສະພາ 2020 ທົ່ວໂລກມີການລາຍງານການລະບາດທັງໝົດ 213 (ປະເທດ/ເຂດ) ການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 5.581.290 (87.207 ໃໝ່) ມື້ວານນີ້ 5.491.448 ເສຍຊິວິດ 347.530 (3.013 ໃໝ່) ກວມເອົາ 6.22% ຂອງຜູ້ຕິດເຊື້ອທັງໝົດ ປີ່ນປົວຫາຍດີ 2.360.975 (61.797 ໃໝ່) ກວມເອົາ 42,30% ຂອງຜູ້ຕິດເຊື້ອທັງໝົດ ສິ່ງສຳຄັນແມ່ນຍັງມີການລະບາດເປັນວົງກວ້າງຢູ່ທະວີບອາເມຣິກາ ແລະ ທະວີບເອີຣົບ ມີບາງປະເທດ ຈຳນວນຜູ້ຕິດເຊື້ອມື້ດຽວມີເຖິງ 19.232 ຄົນ ແລະ ບາງປະເທດເສຍຊີວິດ 757 ຄົນຕໍ່ມື້.
ສ່ວນໃນບັນດາກຸ່ມປະເທດອາຊຽນ ມາຮອດເວລາ 6:00 ໂມງເຊົ້າ ຂອງວັນທີ 26 ພຶດສະພາ ມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 80.298 (1.284 ໃໝ່) ເສຍຊີວິດ 2.466 (25 ໃໝ່) ຍັງມີບາງປະເທດທີ່ມີອັດຕາການຕິດເຊື້ອໃໝ່ສູງເຖິງ 479 ຄົນຕໍ່ມື້.