ວັນທີ 3 ມິຖຸນາ 2022 ເປັນວັນທີ່ທາງລົດໄຟ ລາວ-ຈີນ ເປີດບໍລິການຄົບຮອບເຄິ່ງປີ ການຂົນສົ່ງຜູ້ໂດຍສານ ແລະ ສິນຄ້າຜ່ານທາງລົດໄຟດັ່ງກ່າວ ໄດ້ປາກົດມີສະພາບເພີ່ມຂຶ້ນໃນດ້ານປະລິມານ ແລະ ຄຸນນະພາບພ້ອມກັນ ເປັນຊ່ອງທາງໃຫຍ່ສາກົນດ້ານການຈໍລະຈອນສິນຄ້ານັບມື້ພົ້ນເດັ່ນກວ່າເກົ່າ ເຊິ່ງມາຮອດວັນທີ 2 ມິຖຸນາ 2022 ທາງລົດໄຟ ລາວ-ຈີນ ໄດ້ຂົນສົ່ງຜູ້ໂດຍສານລວມ 3,27 ລ້ານຄົນ ໃນນີ້ ຕອນພາຍໃນປະເທດຈີນ 2,86 ລ້ານຄົນ ຕອນພາຍໃນປະເທດລາວ 410.000 ຄົນ ແລະ ໄດ້ຂົນສົ່ງສິນຄ້າ 4,03 ລ້ານໂຕນ ໃນນີ້ສິນຄ້າຂ້າມຊາດ 647.000 ໂຕນ ເສັ້ນທາງສຳຄັນປຽບເໝືອນເສັ້ນເລືອດໃຫຍ່ດ້ານການຄ້າສາກົນ ທີ່ພັດທະນາຂຶ້ນມາໃໝ່ສາຍນີ້ ພວມກໍ່ຕົວຂຶ້ນ.
ພາຍຫຼັງທາງລົດໄຟ ລາວ-ຈີນ ເປີດການນຳໃຊ້ແລ້ວ ມີ 21 ແຂວງ ເຂດປົກຄອງຕົນເອງ ແລະ ກຳ ແພງນະຄອນຂອງປະເທດຈີນ ໄດ້ເປີດຖ້ຽວລົດໄຟຂົນສົ່ງສິນຄ້າຂ້າມຊາດ ຕາມທາງລົດໄຟ ລາວ-ຈີນ ຕາມລຳດັບ ໄດ້ຂົນສົ່ງສິນຄ້າຫຼາຍກວ່າ 100 ຊະນິດ ໃນໄລຍະເວລາສັ້ນໆ ເຂດພາຍໃນຂອງປະເທດຈີນກັບປະເທດລາວ ໄທ ມາເລເຊຍ ມຽນມາ ແລະ ປະເທດອື່ນໆ ໄດ້ມີການຮ່ວມມືດ້ານການຄ້າຢ່າງໃກ້ຊິດກວ່າເກົ່າ ແລະ ມີການພົວພັນທີ່ດີກວ່າເກົ່າ ໂດຍສະເພາະໃນໄລຍະພະຍາດໂຄວິດ-19 ແຜ່ລະບາດຢ່າງໜັກໜ່ວງ ວິສາຫະກິດການຄ້າກັບຕ່າງປະເທດຈຳນວນຫຼາຍ ລ້ວນແຕ່ໄດ້ປະສົບກັບຄວາມຫຍຸ້ງຍາກໃນລະດັບໃດໜຶ່ງ ໃນການຈໍລະຈອນສິນຄ້າ ຕົ້ນທຶນການນຳເຂົ້າສິນຄ້າເພີ່ມຂຶ້ນ ຕ່ອງໂສ້ອຸດສາຫະກຳ ແລະຕ່ອງໂສ້ການສະໜອງບໍ່ໝັ້ນທ່ຽງ ແລະ ບັນຫາອື່ນໆ ຊ່ອງທາງໃຫຍ່ທາງລົດໄຟສາຍໜຶ່ງທີ່ເປີດປະຕູສູ່ພາຍນອກ ເຮັດໃຫ້ເຂດລຽບຕາມທາງລົດໄຟ ແລະ ວິສາຫະກິດທ້ອງຖິ່ນໄດ້ກ້າວເຂົ້າສູ່ “ທາງດ່ວນ” ດ້ານເສດຖະກິດການຄ້າ.
ພາກສ່ວນທາງລົດໄຟ ຈີນ ແລະ ລາວ ໄດ້ວາງແຜນເຮັດວຽກໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ແລະ ວຽກງານຂົນສົ່ງຜູ້ໂດຍສານຢ່າງເປັນເອກະພາບ ວິເຄາະກົດເກນການອອກເດີນທາງຂອງຜູ້ໂດຍສານຢ່າງມີວິທະຍາສາດ ແລະ ຈັດວາງກຳລັງຂົນສົ່ງຢ່າງຖືກຕ້ອງ ເຮັດໃຫ້ວິທີການອອກເດີນທາງມີຄວາມສົມບູນຂຶ້ນ ສາມາດຕອບສະໜອງຄວາມຕ້ອງການໃນການເດີນທາງຂອງຜູ້ໂດຍສານ ທີ່ອາໄສຢູ່ລຽບຕາມທາງລົດໄຟ ໃນການຢ້ຽມຢາມຍາດຕິພີ່ນ້ອງ ການເຂົ້າຮຽນ ການໄປຫາໝໍ ການທ່ອງທ່ຽວ ການຄ້າ ແລະ ອື່ນໆເປັນຢ່າງດີ ທາງລົດໄຟ ລາວ-ຈີນ ຕອນພາຍໃນປະເທດຈີນ ໄດ້ປະຕິບັດມາດຕະການ “ປັບແຜນອອກເດີນທາງໃນທຸກມື້” ເພື່ອໃຫ້ສອດຄ່ອງກັບຄວາມຕ້ອງການຕົວຈິງ ເຊັ່ນ: ເພີ່ມຖ້ຽວລົດໄຟສາຍດ່ວນ ໂດຍອີງຕາມຄວາມຕ້ອງການ ໄດ້ເປີດແລ່ນລົດໄຟຜູ້ໂດຍສານ 43,2 ຂະບວນສະເລ່ຍຕໍ່ວັນ ໄດ້ເປີດແລ່ນລົດໄຟສາຍດ່ວນ 65 ຂະບວນຕໍ່ວັນ ໃນໄລຍະທີ່ມີຜູ້ໂດຍສານອອກເດີນທາງຫຼາຍທີ່ສຸດ ຂົນສົ່ງຜູ້ໂດຍສານຫຼາຍທີ່ສຸດເຖິງ 3,3 ໝື່ນຄົນ ຈຳນວນຜູ້ໂດຍສານທີ່ເພີ່ມຂຶ້ນເລື້ອຍໆ ໄດ້ຢືນຢັນໃຫ້ເຫັນແລ້ວວ່າປະຊາຊົນທັງສອງປະເທດ ລາວ ແລະ ຈີນ ເຫັນດີເຫັນພ້ອມຕໍ່ທາງລົດໄຟ ລາວ-ຈີນ ໃນລະດັບສູງ.
ໃນ 4 ເດືອນທຳອິດ ປີ 2022 ຍອດມູນຄ່າການຄ້າລະຫວ່າງຈີນ ກັບ ອາຊຽນ ບັນລຸເຖິງ 1.840 ຕື້ຢວນ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 7,2% ອາຊຽນ ໄດ້ກາຍເປັນຄູ່ການຄ້າໃຫຍ່ອັນດັບໜຶ່ງຂອງຈີນ ໃນຖານະເປັນຊ່ອງທາງສຳຄັນທີ່ເຊື່ອມຈອດກັບຕະຫຼາດອາຊີໃຕ້ ແລະ ຕະຫຼາດອາຊີຕາເວັນອອກສຽງໃຕ້ ຄຽງຄູ່ກັບສັນຍາຄູ່ຮ່ວມມືເສດຖະກິດຮອບດ້ານໃນພາກພື້ນ (RCEP) ເລີ່ມມີຜົນບັງຄັບໃຊ້ເປັນທາງການໃນເດືອນມັງກອນ 2022 ທາງລົດໄຟ ລາວ-ຈີນ ໄດ້ສ້າງຊ່ອງທາງຈໍລະຈອນສິນຄ້າຂ້າມຊາດ ທີ່ສະດວກ ແລະ ວ່ອງໄວ ລະຫວ່າງ ຈີນ ກັບ ອາຊຽນ ໄດ້ເພີ່ມພະລັງຊີວິດໃໝ່ເຂົ້າໃສ່ຂະບວນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະພາບສູງ ສ້າງຜົນປະໂຫຍດໃຫ້ປະຊາຊົນທັງສອງປະເທດ ຈີນ ແລະ ລາວ ກໍຄືປະຊາຊົນອາຊຽນ.
ພວກເຮົາເຊື່ອໝັ້ນວ່າ ຄຽງຄູ່ກັບການກໍ່ສ້າງທາງລົດໄຟ ລາວ-ຈີນ ໄດ້ພັດທະນາຢ່າງບໍ່ຢຸດຢັ້ງ ທາງລົດໄຟ ລາວ-ຈີນ ຈະຊຸກຍູ້ການພັດທະນາເສດຖະກິດ-ສັງຄົມຂອງເຂດລຽບຕາມທາງລົດໄຟສາຍນີ້ ແລະ ຈະເພີ່ມພະລັງແຮງອັນເຂັ້ມແຂງໃຫ້ການເຊື່ອມຈອດກັນຂອງພາກພື້ນ ການຮັກສາຄວາມໝັ້ນທ່ຽງ ແລະ ຍົກສູງຄຸນນະພາບຂອງການຄ້າລະຫວ່າງ ຈີນ ກັບ ອາຊຽນ ແລະ ການກໍ່ສ້າງແລວທາງເສດຖະກິດ ລາວ-ຈີນ ຢ່າງແນ່ນອນ.
# ຂ່າວ – ພາບ : ສະບາໄພ