ໂຄງການກໍ່ສ້າງຂົວຂ້າມນໍ້າລາຍ ເຂດບ້ານວັງທຸ່ມ ເມືອງປາກລາຍ ແຂວງໄຊຍະບູລີ ມາຮອດປັດຈຸບັນ ແມ່ນສໍາເລັດແລ້ວ 100% ທ່ານ ແຫຼງ ດວງປັນຍາ ເລຂາພັກບ້ານ ນາຍບ້ານວັງທຸ່ມ ໄດ້ລາຍງານການໄຂນໍາໃຊ້ໂຄງການກໍ່ສ້າງຂົວຂ້າມນໍ້າລາຍ ວ່າ: ໂຄງການດັ່ງກ່າວ ແມ່ນໄດ້ເລີ່ມລົງມືຈັດຕັ້ງປະຕິບັດມາແຕ່ເດືອນມັງກອນ 2015 ກໍານົດການກໍ່ສ້າງ 3 ເດືອນໃຫ້ສໍາເລັດ ເຊິ່ງຂົວມີຄວາມຍາວ 52 ແມັດ ກວ້າງ 3 ແມັດ ສູງ 4,2 ແມັດ ເປັນຂົວໄມ້ ເສົາເບຕົງເສີມເຫຼັກ ລວມມູນຄ່າ 370 ລ້ານກີບ ດ້ວຍທຶນຂອງປະຊາຊົນພາຍໃນບ້ານ ແຕ່ອາຍຸການນໍາໃຊ້ໄດ້ພຽງແຕ່ 7 ປີ ຂົວຈຶ່ງມີການເປ່ ແລະ ນໍາໃຊ້ບໍ່ໄດ້ ດັ່ງນັ້ນ ທາງອົງການການປົກຄອງບ້ານວັງທຸມ ຈຶ່ງໄດ້ລະດົມທຶນນໍາພໍ່ແມ່ປະຊາຊົນພາຍໃນບ້ານ ແລະ ນັກທຸລະກິດຜູ້ປະກອບການພາຍໃນບ້ານ ແລະ ບ້ານອ້ອມຂ້າງຈໍານວນໜຶ່ງ ໂດຍສົມທົບກັບຫ້ອງການໂຍທາທິການ ແລະ ຂົນສົ່ງເມືອງ ເພື່ອເປັນວິຊາການໃນການປັບປຸງຂົວດັ່ງກ່າວຄືນໃໝ່ ປຽ່ນຈາກຂົວໄມ້ມາເປັນຂົວເຫຼັກ ເຊິ່ງໄດ້ເລີ່ມລົງມືກໍ່ສ້າງມາແຕ່ວັນທີ 1 ເມສາ 2022 ແລະ ສໍາເລັດໃນເດືອນມິຖຸນາ 2022 ລວມມູນຄ່າທັງໝົດ 534 ລ້ານກີບ.
ພິທີໄຂການນໍາໃຊ້ຂົວດັ່ງກ່າວ ໄດ້ຈັດຂຶ້ນໃນວັນທີ 7 ມິຖຸນາ 2022 ທີ່ບ້ານວັງທຸ່ມ ເມືອງປາກລາຍ ໂດຍການເຂົ້າຮ່ວມຂອງທ່ານ ກອງສີ ວົງສີ ເລຂາພັກເມືອງ ເຈົ້າເມືອງປາກລາຍ ມີຄະນະປະຈໍາພັກເມືອງ ຫົວໜ້າຮອງຫົວໜ້າຫ້ອງການ ນັກທຸລະກິດ ຜູ້ປະກອບການ ນາຍບ້ານອອ້ມຂ້າງ ແລະ ປະຊາຊົນພາຍໃນບ້ານວັງທຸ່ມເຂົ້າຮ່ວມ ໃນພິທີທ່ານເຈົ້າເມືອງປາກລາຍ ໄດ້ກ່າວເປີດການນໍາໃຊ້ຂົວພາຍໃນບ້ານວັງທຸ່ມຢ່າງເປັນທາງການ ຈາກນັ້ນ ກໍໄດ້ມີການຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນໃນການເປີດນໍາໃຊ້ຂົວດັ່ງກ່າວ.
