ກອງປະຊຸມອົງການປົກຄອງນະຄອນຫຼວງວຽງຈັນ (ນວ) ຄັ້ງທີ 32 ໄດ້ຮັບຟັງ ປຶກສາຫາລື ແລກປ່ຽນບົດຮຽນ ແລະ ປະກອບຄຳຄິດເຫັນຫຼາຍບັນຫາສຳຄັນ ເຊັ່ນ: ພິຈາລະນາ ແລະ ໃຫ້ທິດຊີ້ນຳກ່ຽວກັບສະພາບພົ້ນເດັ່ນປະຈຳເດືອນພຶດສະພາ ແລະ ແຜນວຽກຈຸດສຸມປະຈຳເດືອນມິຖຸນາ 2020 ແຜນສືບຕໍ່ປະຕິບັດມາດຕະການຜ່ອນຜັນ ມາດຕະການປ້ອງກັນ ຄວບຄຸມ ສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ແຕ່ວັນທີ 18 ພຶດສະພາ-1 ມິຖຸນາ 2020 ຢູ່ ນວ ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 580/ຫສນຍ ພິຈາລະນາ ແລະ ໃຫ້ທິດຊີ້ນຳກ່ຽວກັບການສະເໜີຂໍການຍ້ອງຍໍຫຼຽນນາມມະຍົດພັດທະນາດີເດັ່ນແຫ່ງຊາດ ໃຫ້ທ່ານ ແກ່ນຈັນ ພຸດທະວົງ ແລະ ຂໍລາຍງານຜ່ານຮູບແບບໃບນາມມະຍົດພັດທະນາດີເດັ່ນຂອງ ນວ ເພື່ອຈັດພິມ ພິຈາລະນາໃຫ້ທິດຊີ້ນຳກ່ຽວກັບການສະເໜີຂໍອອກໃບຮັບຮອງຜົນສຳເລັດການຊົດເຊີຍໂຄງການພັດທະນາກວມລວມໄຊເສດຖາ ເພື່ອຢັ້ງຢືນການປະກອບຮຸ້ນຝ່າຍລາວ 25% ໃນໂຄງການພັດທະນາກວມລວມໄຊເຊດຖາ ພິຈາລະນາໃຫ້ທິດຊີ້ນຳກ່ຽວກັບການຂໍຮັບຮອງ ແລະ ອະນຸມັດອອກຂໍ້ຕົກລົງວ່າດ້ວຍການກຳນົດຂອບເຂດ ແລະ ຮັບຮອງຫົວໜ່ວຍລາຄາທົດແທນຄ່າເສຍຫາຍໃຫ້ຜູ້ຖືກຜົນກະທົບຈາກໂຄງການພັດທະນາທ່າບົກ-ທ່ານາແລ້ງ ແລະ ເຂດໂລຈິສຕິກ ນວ.
ຮັບຟັງການລາຍງານ ແລະ ໃຫ້ທິດຊີ້ນຳກ່ຽວກັບຮ່າງຂໍ້ຕົກລົງວ່າດ້ວຍການກຳນົດຂອບເຂດ ແລະ ປະເມີນຫົວໜ່ວຍລາຄາທົດແທນຄ່າເສຍຫາຍ ຕໍ່ຜູ້ຖືກກະທົບຈາກໂຄງການກໍ່ສ້າງແລວສາຍສົ່ງໄຟຟ້າລາວ ແຕ່ສະຖານີນາບົງ ເມືອງປາກງື່ມ-ສະຖານີດົງໂພສີ ເມືອງຫາດຊາຍຟອງ ນວ ພິຈາລະນາໃຫ້ທິດຊີ້ນຳກ່ຽວກັບຜົນການຈັດຕັ້ງປະຕິບັດ ການກວດກາການອະນຸມັດທີ່ດິນລັດໃຫ້ບໍລິສັດ ກຣິດຕະພົງ ກຣຸບ ຈຳກັດ ສຳປະທານທີ່ດິນລັດ ແລະ ການອອກໃບຕາດິນໃຫ້ທ່ານ ບຸນກອງ ແສງດາລາ ທີ່ຕັ້ງຢູ່ບ້ານໜອງຈັນ ເມືອງສີສັດຕະນາກ ນວ (ດິນຕະຫຼາດໜອງຈັນ) ທີ່ມີຂໍ້ຂັດແຍ່ງກັນ ແລະ ພິຈາລະນາໃຫ້ທິດຊີ້ນຳກ່ຽວກັບອົງການປົກຄອງບ້ານສະພັງເມິກ ສະເໜີຂໍທີ່ດິນໜອງສະພັງເມິກ ເມືອງໄຊທານີ ມາຄຸ້ມຄອງເປັນດິນລວມບ້ານ.
ກອງປະຊຸມດັ່ງກ່າວ ຈັດຂຶ້ນວັນທີ 26 ພຶດສະພາ 2020 ຢູ່ຫ້ອງວ່າການປົກຄອງ ນວ ໂດຍເປັນປະທານຂອງທ່ານ ສິນລະວົງ ຄຸດໄພທູນ ເຈົ້າຄອງ ນວ ມີບັນດາຮອງເຈົ້າຄອງ ນວ ສະມາຊິກອົງການປົກຄອງ ແລະ ພະແນກການກ່ຽວຂ້ອງ ເຂົ້າຮ່ວມ.
# ຂ່າວ & ພາບ: ຂັນທະວີ