ການແຂ່ງຂັນເຕະບານເອເອັຟຊີ ຄັບ 2020 ຮອບແບ່ງກຸ່ມ F ນັດທີ 3 ສະໂມສອນລາວໂຕໂຢຕາ ເອັຟຊີ ຕົວແທນຈາກລາວເປີດສະໜາມກີລາແຫ່ງຊາດ ຫຼັກ 16 ຕ້ອນຮັບການມາຢາມຂອງສະໂມສອນໂຮ່ຈິມິງຊິຕີເອັຟຊີ ທີມລະດັບແຖວໜ້າຂອງວີລີກ ສສ ຫວຽດນາມ ໃນວັນທີ 10 ມີນາ 2020 ໂດຍນັດດັ່ງກ່າວ ບໍ່ອະນຸຍາດໃຫ້ກອງເຊຍບານຂອງທັງ 2 ສະໂມສອນເຂົ້າຮ່ວມຊົມ ແລະ ເຊຍໃນສະໜາມ ທັງນີ້ກໍເພື່ອເປັນການປ້ອງກັນຄວາມສ່ຽງ ຕໍ່ການຕິດເຊື້ອພະຍາດຈຸລະໂຣກສາຍພັນໃໝ່ ໂຄວິດ-19 ທີ່ກຳລັງແຜ່ລະບາດໃນທົ່ວໂລກ.
ຜ່ານການແຂ່ງຂັນປາກົດວ່າ: ຕະຫຼອດໄລຍະເກມການແຂ່ງຂັນໃນເຄິ່ງເວລາທຳອິດ ເຈົ້າຖິ່ນສະໂມສອນລາວໂຕໂຢຕາ ສາມາດເປີດເກມບຸກສູ້ກັບສະໂມສອນໂຮ່ຈິມິງ ຊິຕີເອັບຊີ ຈາກຫວຽດນາມ ໄດ້ຢ່າງສູສີ ກ່ອນຈະຄົບເວລາ 45 ນາທີ ຍັງສະເໝີກັນ 0-0 ປະຕູ ສ່ວນເຄິ່ງເວລາທີ 2 ທັງສອງທີມຕ່າງກໍໄດ້ມີການແກ້ເກມ ແລະ ປັບປ່ຽນຕຳແໜ່ງນັກເຕະສຳຮອງລົງສະໜາມກ່ອນທີ່ ຫງວຽນ ຊວນ ນຳກອງໜ້າຕົວສຳຮອງມາເໝົາຍິງຄົນດຽວ 2 ປະຕູ ໃນນາທີໆ 72 ແລະ ນາທີໆ 90 ຊ່ວຍໃຫ້ສະໂມສອນໂຮ່ຈິມິງຊິຕີບຸກມາເອົາຊະນະລາວໂຕໂຢຕາເຖິງຖິ່ນ 2-0 ປະຕູ ເກັບ 3 ຄະແນນຈາກ 3 ນັດ ຊະນະ 2 ສະເໝີ 1 ມີ 7 ຄະແນນ ເທົ່າກັນກັບສະໂມສອນຢາງກຸ້ງຢູໄນເຕັດ ຈາກມຽນມາ ແຕ່ລູກໄດ້-ລູກເສຍ ໂຮ່ຈິມິງຈະດີກວ່າ ຈຶ່ງເປັນທີມນຳກຸ່ມດັ່ງກ່າວ ສ່ວນອັນດັບ 3 ສະໂມສອນຮົ່ວກັງຢູໄນເຕັດຈາກສິງກະໂປ ແລະ ລາວໂຕໂຢຕາລົງສະໜາມ 3 ນັດ ເສຍ 3 ນັດຊ້ອນບໍ່ມີຈັກຄະແນນ.
ສ່ວນຕາຕະລາງການແຂ່ງຂັນນັດທີ່ເຫຼືອຂອງລາວໂຕໂຢຕາ ບຸກໄປຢາມສະໂມສອນໂຮ່ຈິມິງ ຊິຕີ ໃນວັນທີ 15 ເມສາ 2020 ແລະ ໄປຢາມສະໂມສອນຮົ່ວກັງຢູໄນເຕັດ ໃນວັນທີ 29 ເມສາ 2020 ແລະ ຕ້ອນຮັບການມາຢາມຂອງສະໂມສອນຢາງກຸ້ງ ຢູໄນເຕັດ ຈາກມຽນມາ ໃນວັນທີ 13 ພຶດສະພາ 2020.