ເມື່ອວັນທີ 11 ພຶດສະພາທີ່ຜ່ານມາ ລັດຖະບານອັງກິດ ໄດ້ຢືນຢັນເລື່ອງແຜນທີ່ຈະກຳນົດໃຫ້ຜູ້ເດີນທາງເຂົ້າປະເທດທຸກຄົນ ຊຶ່ງລວມເຖິງນັກທ່ອງທ່ຽວທີ່ເດີນທາງກັບປະເທດ ຫຼື ຜູ້ເດີນທາງເຂົ້າໄປເຮັດທຸລະກິດໃນອັງກິດ ຕ້ອງກັກຕົວເອງເປັນເວລາ 14 ວັນ.
ໂດຍຕັ້ງແຕ່ເດືອນໜ້າເປັນຕົ້ນໄປ ທຸກຄົນຊຶ່ງເດີນທາງໄປຍັງອັງກິດຈະຕ້ອງແຈ້ງທີ່ຢູ່ສຳລັບການກັກຕົວເອງຕໍ່ເຈົ້າໜ້າທີ່ ແລະ ອາດຖືກປັບໃໝສູງເຖິງ 11 ລ້ານກວ່າກີບ ຫາກຝ່າຝືນກົດເລື່ອງນີ້.
ແຕ່ Airline UK ສະມາຄົມຊຶ່ງເປັນຕົວແທນສາຍການບິນຂອງອັງກິດ ໄດ້ຄັດຄ້ານເລື່ອງນີ້ ໂດຍຊີ້ແຈງວ່າມາດຕະການດັ່ງກ່າວ ຈະທຳລາຍການເດີນທາງລະຫວ່າງປະເທດ ທັງທີ່ອອກຈາກ ແລະ ໄປສູ່ອັງກິດໂດຍສິ້ນເຊິງ ແລະ ຈະສ້າງຄວາມເສຍຫາຍທີ່ບໍ່ອາດປະເມີນຄ່າໄດ້ຕໍ່ອຸດສາຫະກຳການບິນ ລວມທັງຕໍ່ເສດຖະກິດຂອງອັງກິດໂດຍສ່ວນລວມດ້ວຍ.
ສະມາຄົມ Airline UK ເຕືອນດ້ວຍວ່າ ເລື່ອງນີ້ຈະເຮັດໃຫ້ໂອກາດການຟື້ນຕົວຂອງອຸດສາຫະກຳການບິນຂອງອັງກິດເກີດຂຶ້ນບໍ່ໄດ້ເລີຍ.
ເມື່ອເດືອນມີນາຜ່ານມາ Flybe ສາຍການບິນໃນປະເທດລາຍໃຫຍ່ທີ່ສຸດຂອງອັງກິດ ຕ້ອງປະກາດລົ້ມລະລາຍ ແລະ ຂະນະນີ້ ສາຍການບິນ Virgin Atlantic ຂອງເຊີຣິຊາຣ໌ດ ແບຣນສັນ ກໍກຳລັງຂໍຄວາມຊ່ວຍເຫຼືອຈາກລັດຖະບານອັງກິດ ແລະ ຈາກນັກລົງທຶນຢູ່ ສ່ວນ British Airways ກໍມີແຜນຈະຫຼຸດພະນັກງານລົງກວ່າ 25% ເຊັ່ນກັນ.
ຢ່າງໃດກໍຕາມ ບັນຫາຈາກໂຣກຕິດຕໍ່ໂຄວິດ-19 ຊຶ່ງສົ່ງຜົນຕໍ່ການເດີນທາງ ແລະ ທຸລະກິດການບິນນັ້ນ ບໍ່ໄດ້ຈຳກັດຢູ່ສະເພາະໃນອັງກິດເທົ່ານັ້ນ ເພາະ Lufthansa ສາຍການບິນໃຫຍ່ທີ່ສຸດຂອງເອີຣົບ ກໍກຳລັງຮ້ອງຂໍຄວາມຊ່ວຍເຫຼືອຈາກລັດຖະບານ ເພື່ອບໍ່ໃຫ້ຕ້ອງລົ້ມລະລາຍ ແລະ Airfrance-KLM ຫາກໍໄດ້ຮັບການຄ້ຳປະກັນເງິນກູ້ຈາກລັດຖະບານຝຣັ່ງ ມູນຄ່າເຖິງ 7,6 ຕື້ໂດລາສະຫະລັດເຊັ່ນກັນ.
ໃນຂະນະທີ່ນັກວິເຄາະເຊື່ອວ່າ ອຸດສາຫະກຳການບິນຂອງເອີຣົບຈະຕ້ອງໃຊ້ເວລາຫຼາຍປີກວ່າຈະຟື້ນຕົວ ແລະ ໄລຍະເວລາ ລວມທັງຂອບເຂດຂອງການຟື້ນຕົວກໍຈະຂຶ້ນຢູ່ກັບມາດຕະການເລື່ອງການເດີນທາງທີ່ລັດຖະບານຂອງບາງປະເທດ ເຊັ່ນ: ອັງກິດນຳມາໃຊ້ວ່າຈະເຂັ້ມງວດພຽງໃດນັ້ນ ຄວາມກັງວົນອີກດ້ານໜຶ່ງ ກໍຄືປະເທດຕ່າງໆຂອງເອີຣົບອາດຈະໃຊ້ມາດຕະການເລື່ອງການເດີນທາງ ຊຶ່ງມີຄວາມເຂັ້ມງວດ ຫຼື ໂຍະຍານບໍ່ເທົ່າກັນ.
ຕົວຢ່າງ ຫຼາຍປະເທດໃນກຸ່ມປະເທດວີຊ່າເຊງເກ້ນ ບໍ່ນຳພາຕໍ່ຄຳຮຽກຮ້ອງຂອງລັດຖະບານກາງສະຫະພາບເອີຣົບທີ່ເມືອງບຣັສເຊລ ແລະ ກຳນົດເງື່ອນໄຂເລື່ອງການເດີນທາງຂ້າມຊາຍແດນຂອງຕົນເອງ ເປັນຕົ້ນວ່າ ກຸ່ມປະເທດເຂດທະເລບານຕິກ ໄດ້ປະກາດຈະກັບມາເປີດເສລີເລື່ອງການເດີນທາງຂ້າມຊາຍແດນຊຶ່ງກັນ ແລະ ກັນ ຕັ້ງແຕ່ວັນທີ 18 ພຶດສະພານີ້ ສ່ວນໂອຕຣິສ ກໍໄດ້ຫາລືເລື່ອງການເປີດຊາຍແດນກັບສາທາລະນະລັດເຊັກ ແລະ ເຢຍລະມັນ ເປັນຕົ້ນ.
ຄວາມພະຍາຍາມເປີດຊາຍແດນໃນສະເພາະບາງປະເທດນີ້ ເຮັດໃຫ້ Ylva Johansson ເຈົ້າໜ້າທີ່ຜູ້ຮັບຜິດຊອບເລື່ອງກິດຈະການພາຍໃນຂອງສະຫະພາບເອີຣົບ ເຕືອນວ່າປະເທດສະມາຊິກສະຫະພາບເອີຣົບ ກຳລັງເລືອກປະຕິບັດຕໍ່ປະເທດສະມາຊິກລາຍອື່ນ ແລະ ເປັນມາດຕະການທີ່ຂາດການປະສານງານ ແລະ ບໍ່ມີຄວາມເປັນໜຶ່ງດຽວກັນສຳລັບສະຫະພາບເອີຣົບດ້ວຍ.
ການປະຕິບັດໃນນະໂຍບາຍເປີດຊາຍແດນລະຫວ່າງປະເທດສະມາຊິກຂອງສະຫະພາບເອີຣົບ ລວມທັງມາດຕະການເພື່ອຄວບຄຸມຜູ້ເດີນທາງເຂົ້າປະເທດທີ່ໜັກເບົາບໍ່ເທົ່າກັນນີ້ ບໍ່ໄດ້ຊ່ວຍຕໍ່ອຸດສາຫະກຳທ່ອງທ່ຽວ ແລະ ອຸດສາຫະກຳການບິນຂອງເອີຣົບ ຊຶ່ງກຳລັງມີບັນຫາໜັກຢູ່ແລ້ວຢ່າງແນ່ນອນ.
ທ່ານ Laurent Duc ປະທານສະມາພັນທຸລະກິດໂຮງແຮມຂອງຝຣັ່ງ ເຊື່ອວ່າທຸລະກິດທ່ອງທ່ຽວຂອງເອີຣົບ ຈະຍັງຄົງປັ່ນປ່ວນຕໍ່ໄປຢ່າງໜ້ອຍອີກ 18 ເດືອນ ແລະ ຫຼາຍຄົນກໍເຊື່ອວ່າທຸລະກິດທ່ອງທ່ຽວຂອງເອີຣົບ ຫຼັງຈາກທີ່ຟື້ນຕົວຂຶ້ນໄດ້ແລ້ວ ສະພາບບໍ່ເໝືອນເດີມອີກຕໍ່ໄປ ຈາກການທີ່ສາຍການບິນລາຄາປະຢັດຕ່າງໆຕ້ອງເຊົາກິດຈະການໄປ ແລະ ຈະເຮັດໃຫ້ໂອກາດການທ່ອງທ່ຽວໃນເອີຣົບ ຖືກຈຳກັດຢູ່ສະເພາະໃນກຸ່ມຜູ້ມີຖານະດີທີ່ສາມາດຈ່າຍລາຄາແພງໄດ້ເທົ່ານັ້ນ.
ນັກວິເຄາະດ້ານທຸລະກິດທ່ອງທ່ຽວຄາດວ່າ ອຸດສາຫະກຳທ່ອງທ່ຽວຂອງໂລກປີນີ້ອາດຕ້ອງຂາດທຶນເຖິງ 1,1 ຕື້ໂດລາສະຫະລັດ ແລະ ເຊື່ອວ່າຈະເຮັດໃຫ້ຜູ້ປະກອບອາຊີບໃນທຸລະກິດທີ່ກ່ຽວຂ້ອງອື່ນໆ ຕ້ອງຕົກງານເຖິງກວ່າ 100 ລ້ານຄົນດ້ວຍກັນ.
ໂລກະທັດ – ນຳສະເໜີ