ພົບກັນວັນນີ້ ຂໍພາທ່ານຜູ້ອ່ານໄປຮູ້ກັບມາດຕະການຕ້ານພະຍາດໂຄວິດ-19 ຢູ່ຫວຽດນາມ ແລະ ເລື່ອງການບໍລິຈາກອະໄວຍະວະດ້ວຍຄວາມສະໝັກໃຈຢູ່ ສປ ຈີນ.
ທີ່ ຫວຽດນາມ: ເພື່ອສະກັດກັ້ນການແຜ່ລະບາດຂອງໂຄວິດ-19 ທາງການຫວຽດນາມ ໄດ້ປະຕິບັດມາດຕະການຫ້າມຄົນຕ່າງປະເທດເດີນທາງເຂົ້າຫວຽດນາມ ນັບແຕ່ເວລາ 00:00 ໂມງ ຂອງວັນທີ 22 ເດືອນມີນາ 2020 ເປັນຕົ້ນມາ.
ນັບແຕ່ວັນທີ 18 ມີນາເປັນຕົ້ນມາ ຄົນຫວຽດນາມ ແລະ ຊາວຕ່າງປະເທດທີ່ເດີນທາງເຂົ້າປະເທດ ຕ້ອງກັກບໍລິເວນຕົນເອງເປັນເວລາ 14 ວັນ ເພື່ອຕິດຕາມເຊື້ອພະຍາດ ທັງນີ້ ກໍເພາະວ່າກໍລະນີຕິດເຊື້ອໂຄວິດ-19 ທີ່ນັບມື້ເພີ່ມຂຶ້ນນັ້ນ ສ່ວນຫຼວງຫຼາຍແມ່ນແຜ່ມາຈາກນັກທ່ອງທ່ຽວທີ່ເປັນຄົນຫວຽດນາມ ແລະ ຊາວຕ່າງປະເທດທີ່ກັບຈາກບັນດາປະເທດໃນເອີຣົບ ໂດຍສະເພາະແມ່ນປະເທດອັງກິດ ເຊິ່ງຖືກອົງການອະນາໄມໂລກປະກາດວ່າເປັນຈຸດແຜ່ລະບາດໃໝ່ຂອງເຊື້ອພະຍາດນີ້.
ເອກະສານແຈ້ງການຂອງກະຊວງການຕ່າງປະເທດຫວຽດນາມ ກ່ຽວກັບບັນຫານີ້ໄດ້ເວົ້າວ່າ: ສຳລັບຊາວຕ່າງປະເທດທີ່ເດີນທາງເຂົ້າຫວຽດນາມ ເພື່ອຈຸດປະສົງທາງການທູດ ແລະ ທາງການ ກໍຄືເພື່ອເຂົ້າຮ່ວມເຫດການທາງການທູດທີ່ສຳຄັນ ລວມທັງບັນດາຊ່ຽວຊານ ບັນດາຜູ້ຈັດການເຄືອຄ່າຍທຸລະກິດ ຫຼື ແຮງງານທີ່ມີຄວາມຊຳນານງານສູງນັ້ນ ທາງກະຊວງປ້ອງກັນຄວາມສະຫງົບ ແລະ ກະຊວງປ້ອງກັນປະເທດ ຈະໄດ້ປະສານງານກັບກະຊວງການຕ່າງປະເທດ ກະຊວງສາທາລະນະສຸກ ແລະ ພາກສ່ວນກ່ຽວຂ້ອງອື່ນໆ ເພື່ອພິຈາລະນາອອກວີຊ່າໃຫ້ຖ້າມີຄວາມຈຳເປັນ.
ທີ່ ສປ ຈີນ: ນັບແຕ່ປີ 2015 ເປັນຕົ້ນມາ ທາງການ ສປ ຈີນ ໄດ້ອອກກົດລະບຽບຫ້າມເກັບກູ້ອະໄວຍະວະຈາກນັກໂທດທີ່ຖືກປະຫານ ເພື່ອນຳໃຊ້ເຂົ້າທາງການແພດ ແຕ່ເວລານັ້ນເປັນຕົ້ນມາ ການບໍລິຈາກອະໄວຍະວະດ້ວຍຄວາມສະໝັກໃຈ ໄດ້ກາຍເປັນການບໍລິຈາກທີ່ຖືກກົດໝາຍຢ່າງດຽວໃນປະເທດ.
ວິທີບໍລິຈາກນັ້ນສອດຄ່ອງກັບຫຼັກການສາກົນ ຄື: ບົນພື້ນຖານຄວາມສະໝັກໃຈ ມີການກວດກາດ້ານຈັນຍາທຳ ກ່ອນນຳເອົາອະໄວຍະວະດັ່ງກ່າວໄປປ່ຽນຖ່າຍ ແລະ ການແຈກຢາຍອະໄວຍະວະ ເພື່ອການແພດກໍເປັນໄປຢ່າງຍຸຕິທຳ.
ໃນປີ 2016 ຈຳນວນຜູ້ມອບອະໄວຍະວະເພື່ອການແພດໃນຈີນນັ້ນພຸ່ງຂຶ້ນສູງເຖິງ 4.080 ຄົນ ອະໄວຍະວະທີ່ບໍລິຈາກນັ້ນມີຈຳນວນ 11.037 ຊະນິດ ໃນເວລານັ້ນມີການຄາດຄະເນວ່າ ໃນໝົດປີ 2017 ຈະມີຜູ້ບໍລິຈາກອະໄວຍະວະສູງກວ່າ 5.000 ຄົນ.
ຂັ້ນຕອນການບໍລິຈາກນັ້ນ ກໍຄື ຜູ້ບໍລິຈາກດ້ວຍຄວາມສະໝັກໃຈ ຕ້ອງລົງທະບຽນຢັ້ງຢືນການບໍລິຈາກຂອງຕົນ ຫຼັງຈາກຕົນເສຍຊີວິດລົງຂ່າວບອກວ່າ: ເຖິງຈະມີຈຳນວນຜູ້ບໍລິຈາກອະໄວຍະວະຫຼາຍຂຶ້ນໃນຈີນ ແຕ່ຈຳນວນກໍຍັງໜ້ອຍກວ່າຫຼາຍໆປະເທດ ເຊັ່ນ: ໃນປະເທດແອດສະປາຍ (ສະເປນ) ນັ້ນ ໃນຈຳນວນພົນລະເມືອງ 1 ລ້ານຄົນໃດ ກໍມີຜູ້ລົງທະບຽນບໍລິຈາກອະໄວຍະວະກວ່າ 34% ຢູ່ສະຫະລັດອາເມຣິກາແມ່ນກວ່າ 25% ສ່ວນຢູ່ຈີນນັ້ນມີພຽງ 3,8% ຕໍ່ແຕ່ລະ 1 ລ້ານຄົນ ເພື່ອເພີ່ມຈຳນວນຜູ້ບໍລິຈາກອະໄວຍະວະຂອງຕົນດ້ວຍຄວາມສະໝັກໃຈ ທາງການຈີນໄດ້ສືບຕໍ່ປັບປຸງກົດໝາຍ ແລະ ລະບຽບການທີ່ພົວພັນກັບການບໍລິຈາກ ກໍຄື ການປ່ຽນຖ່າຍອະໄວຍະວະມະນຸດຕື່ມໃນອະນາຄົດ (ແຫຼ່ງຂ່າວໜັງສືພິມວຽງຈັນທາມ ວັນທີ 2 ທັນວາ 2017).